Read cisena ATONGI 4 Bible Online

ATONGI 4 - cisena bible

ATONGI 4

¹Pidafa Ehudi Aisraele adachita pontho pyakuipa pamaso pa MBUYA.

²Tenepo MBUYA adatawirisa Mfumu Yabini wa ku Kanani akhatonga mumzinda wa Hazori ule kuakunda. Mkadamu wa anyankhondo akhali Sisera, akhakhala pa Harosheti-Hagoimu ule.

³Yabini akhali na pingolo pyasimbi madzana mafemba mbatonga Aisraele mwavinga pontho na mungu pyaka makumawiri. Tenepo Aisraele adalira kuna MBUYA kuti aaphedze.

⁴Debora mkazi Lapidoti akhali mprofeti mbaphata basa ninga mtongi wa miseru wa Aisraele pandzidzi wenewo.

⁵Debora adakhala pansi pa muti unango wamdikhwa pakati pa Rama na Betele m'nthemba ya mapiri ya Eferemu, tenepo Aisraele akhaenda kweneko katongwa miseru.

⁶Nsiku inango iye adatuma mphangwa kuna Baraki mwana Abinoamu wa kumzinda wa Kedeshi kunthemba ya Nafitali mbalonga kuna iye mbati, “MBUYA Mulungu wa Israele akupasa matongero awa: kwata amuna pikwi khumi a madzinza a Nafitali na Zebuloni mbuatsogolere kuphiri ya Tabori,

⁷ine ndinachitisa Sisera, mkadamu wa anyankhondo a Yabini kudzamenyana nawe nkhondo pamkulo wa Kishoni. Iye anadza na pingolo na anyankhondo ache, kwache ine ndinakuchitisa kumkunda.”

⁸Tenepo Baraki adatawira mbati, “Ndinaenda ngakhala imwe munaenda nane, mbwenye ngakhala imwe nkhabe kwenda nane tayu, ine sinaendambo tayu.”

⁹Iye adatawira mbati, “Pyakoma, ndinati ndiende nawe, kwache iwe nkhabe dzasimbwa tayu, thangwi MBUYA anachitisa mkazi kukunda Sisera.” Tenepo Debora adalamuka kwenda ku Kedeshi pabodzi pene na Baraki.

¹⁰Baraki adachemera madzinza a Nafitali na Zebuloni ku Kedeshi, pontho amuna pikwi khumi adamtewera. Debora adenda naye pabodzi.

¹¹Pandzidzi wenewo Heberi, Mkeni, adamanga khumbi yache chifupi na Kedeshi, pontho na pamuti wamthundu pa Zaananimu. Iye adafedzera kutali na Akeni anango ale, pidzukulu pya Habobu, mkamwiniache Mose.

¹²Pidava Sisera kuti Baraki adenda kuphiri ya Tabori,

¹³adagumanyisa pingolo pyache pyasimbi madzana mafemba na amunache onsene mbaagwinya kumkulo wa Kishoni kubulukira ku Harosheti-Hagoimu.

¹⁴Tenepo Debora adalonga kuna Baraki mbati, “Ndoko! MBUYA anakutsogolera! Lero anakuchitisa kukunda Sisera.” Natenepo Baraki adatchitha kuphiri ya Tabori na amunache pikwi khumi ale.

¹⁵Pidasosa Baraki anyankhondo a Sisera, MBUYA adamchitisa Sisera kukhala pampani-pani pabodzi pene na pingolo pyache pyonsene na amunache ene. Penepo Sisera adatchitha pachingolo chache mbathawa na miyendo.

¹⁶Baraki adathamangisa pingolo na anyankhondo mpakana ku Harosheti-Hagoimu, tenepo anyankhondo onsene a Sisera adamala phiwa. Nkhabe mamuna na mbodzi ene adasala okhonda phiwa tayu.

¹⁷Sisera adathawira kukhumbi ya Yaele, mkazi Heberi, Mkeni, thangwi Mfumu Yabini wa ku Hazori akhakhala na mtendere na banja ya Heberi.

¹⁸Yaele adabuluka kagumanikana na Sisera mbalonga kuna iye mbati, “Pitani m'khumbi mwanga muno, Mbuya. Lekani chita mantha.” Tenepo iye adapita, natenepo mkazi ule adampsampsira na chinguwo.[9]

¹⁹Iye adalonga kuna mkazi ule mbati, “Ndaphata miyendo ngandipasembo madzi akumwa; ndina nyota.” Mkazi ule adafungula dudu ya mkaka mbampasa kuti amwe, tenepo adambisa pontho.

²⁰Sisera adampanga mkazi ule mbati, “Imira pamsuwopo, ngakhala panadza munthu unango mbakuvunza kuti pana munthu unangombo adza pano, longa kuti nkhabe.”

²¹Sisera adatopa pyakwanga mwakuti adagona mbachita mkhonono. Penepo Yaele adakwata nyundo na ntchiri ya chisimbi mbaenda kukhali iye kule mwakumatama mbapha Sisera pakumkhomera ntchiri ya chisimbi mumsolo mwache kufikirana pansi kukhundu inango.

²²Pidafika Baraki kusaka Sisera, Yaele adagumanikana naye mbalonga kuna iye mbati, “Tendeni kuno, ndinakuonesani munthu anasaka imwe ule.” Tenepo Baraki adenda pabodzi pene na Yaele mbakagumana Sisera ali thasa ninga na apo uku ntchiri ya chisimbi ili totopi mumsolo mwache.

²³Nsiku yeneyo Mulungu adachitisa Aisraele kukunda Yabini, mfumu wa ku Kanani,

²⁴tenepo iwo adathimiza pyakwanga pene kuchita naye nkhondo kufikirana adamvunga.