Read cisena ATONGI 5 Bible Online

ATONGI 5 - cisena bible

ATONGI 5

¹Pansiku yeneyo Debora na Baraki mwana Abinoamu adaimba nyimbo ishi:

²MBUYA mbakuzwe! Akadamu a Aisraele adachita phinga kumenya nkhondo; anthu adapipereka mwakukomerwa.

³Veserani, imwe mafumu! Ikhani makutu anu kuno, imwe atongi! Ndinati ndiimbe, ndinati ndiimbe nyimbo kuna MBUYA, ndinati ndipeke nyimbo za MBUYA Mulungu wa Israele.

⁴MBUYA, pidabuluka imwe ku Seiri, pidabuluka imwe m'dziko ya Edomu, dziko idatekenyeka. Mvula mbivumba kubulukira kuthambo, ande, madzi adagwa m'makole.

⁵Mapiri adatekenyeka pamaso pa MBUYA wa Sinai ule, pamaso pa MBUYA Mulungu wa Israele.

⁶Nsiku za Shamagara mwana Anati, nsiku za Yaele, anyakupakira pingolo nee akhagwandave na m'dzikomu tayu, pontho anyaulendo akhapita na njira zakufa thangwi ya kugoswa.

⁷Midzi ya Israele idasanduka madembe, kufikirana iwe, Debora, udadza[10] mbukhala mama wa Israele.

⁸Pidasankhula Aisraele kutumikira milungu yachilendo, m'dziko mukhali nkhondo. Kwache pakati pa amuna pikwi makumanayi a Aisraele, nkhabe chakugedera matswimo penu dipa pidaoneka tayu.

⁹Mtimanga uli pana akadamu a nkhondo a Israele, pana imwe ale adapipereka mwakukomerwa pakati pa anthu. MBUYA mbakuzwe!

¹⁰Pilongeni,[11] imwe anyakupakira pamabulu akuchena uku mwakhalira nguwo pamsana pawo, pontho imwe ale mumbafamba-famba konsene kwene.

¹¹Veserani kusokosa kwa mwinji m'michera. Iwo akulonga pya kukunda konsene kwa MBUYA, kukunda konsene kwa Aisraele! Tenepo anthu a MBUYA adafamba pamulikiti kutchithira kubulukira m'mizinda mwawo.[12]

¹²Tsogolera, Debora, ndoko na kutsogolera! Tsogolera! Imba nyimbo! Ndoko na kutsogolera! Ndoko patsogolo, Baraki mwana Abinoamu, tsogolera anyakuphatwa kunkhondo!

¹³Tenepo anyakukhulupirika adatchithira pamulikiti kuna akadamu awo; anthu a MBUYA adadza kuna iye[13] pamulikiti akusasanyika kamenya nkhondo.

¹⁴Iwo adadza[14] kuphedi[15] kubulukira ku Eferemu, m'nduli mwako, Benjemani, na anthu ako. Akadamu adatchithira pamulikiti kubulukira ku Makiri, mathubu kubulukira ku Zebuloni.

¹⁵Akadamu a dzinza ya Isakara adadza na Debora; ande, dzinza ya Isakara adadza na Baraki ene, pontho iwo adamtewera mpakana kuphedi. Mbwenye dzinza ya Rubeni adagawanikana; iwo adapenuka pyawo pyakwenda.

¹⁶Thangwi yache ninji iwo adasala pyawo kuthanga kuvesera amakabuswa kuchemera mabira? Ande, dzinza ya Rubeni adagawanikana; iwo adapenuka pyawo pyakwenda.

¹⁷Dzinza ya Gadi adakhala kumabulukiro dzuwa a mkulo wa Yorodani, dzinza ya Dani adasalira pyawo chifupi na miyadiya mikulu-mikulu. Dzinza ya Asheri idasalira pagombe ya bara; iwo adasalira pyawo m'khundu-khundu mwa bara.

¹⁸Mbwenye anthu a madzinza a Zebuloni na Nafitali, adasasanyika kutaya moyo wawo kunkhondo.

¹⁹Pa Taanaki m'khundu mwa mkulo ya Megido mafumu adadza dzamenya nkhondo; mafumu a ku Kanani adamenya nkhondo, kwache iwo hadapokosere siliva tayu.

²⁰Kubulukira kuthambo nyenyezi zidamenya nkhondo; pikhafamba izo kugwanda na kuthambo, izo zidamenya nkhondo na Sisera.

²¹Madzi makulu a mumkulo wa Kishoni adaakukulula, madzi akuthamanga a mumkulo wa Kishoni. Likitika, moyo wanga; khala wamphamvu!

²²Tenepo akavalo adaguduka, kujondola pansi na njondo zawo kuthawa.

²³Mngelo wa MBUYA adalonga mbati, “Dzedze kuna Merozi. Dzedze ikulu ene kuna anthu ache, thangwi iwo hadadze dzaphedza MBUYA tayu; dzamphedza kumenyana na anyankhondo tayu.”

²⁴Yaele mbakhale mkazi wakutsanzayiswa pikulu pakati pa akazi onsene, mkazi Heberi, Mkeni ule, mkazi wakutsanzayiswa pikulu pakati pa akazi onsene akukhala m'makumbi.

²⁵Sisera adapempha madzi, mbwenye iye adampasa mkaka; iye adampasa mafuta amkaka m'khomitcho yakukoma m'maso.

²⁶Kumkono ubodzi iye adakwata ntchiri yasimbi, kumkono unango iye adakwata nyundo ya misiri; iye adakhomera nayo Sisera mbaswa chibade cha msolo wache; iye adaikhomera mpakana kubulukira kukhundu inango ya msolo.

²⁷Iye adabzongonyoka mbagwa pansi thasa pamanyalo pa mkaziyo; iye adabzongonyoka mbagwa pamanyalo pache; penepo pene iye adagwa pansi mbafa.

²⁸Mache Sisera adasuzumira[16] pazhanera; iyeyo adakhuwa kunduli kwa mangalade. Iye adavunza mbati, “Thangwi yache njanji chingolo chache chikudembuka kudza? Thangwi yache njanji akavalo ache akukhonda kudza mwakuchimbiza?”

²⁹Anyabasache achikazi anzeruletu adamtawira, mbalonga yekha ene mwakubwereza-bwereza mbati,

³⁰“Mwinango iwo akugumanyisa na kugawa pinthu pyapokosera iwo, mtsikana mbodzi, penu awiri kada nyankhondo, nguwo zadidiletu kuna Sisera, nguwo zakukhala na pirezi pyakubalika kuikha m'khosi mwa matsano.”[17]

³¹Anyamalwanu onsene mbamale kufa ninga tenepo, MBUYA, mbwenye ashamwali anu mbakhale ninga dzuwa pimbabuluka iyo mwamphamvu! Tenepo mukhali mtendere m'dzikomo pyaka makumanayi.