Read cisena ATONGI 6 Bible Online

ATONGI 6 - cisena bible

ATONGI 6

¹Aisraele adachita pyakuipa pamaso pa MBUYA, natenepo iye adatawirisa Amidiani kuatonga pyaka pinomwe.

²Amidiani akhali amphamvu pyakwanga kupiringana Aisraele mwakuti iwo adabisala m'nkhwimba na m'mbuto zinango zakupata m'mapiri.

³Ndzidzi onsene ukhabzala Aisraele mbewu, Amidiani akhadza pabodzi pene na Aamaleki na madzinza anango a m'thando yatchetcha dzaasosa.

⁴Iwo akhamanga msasa m'dzikomo mbavunga mbewuzo mpakana kumbuto zakuzungulira Gaza kumwera. Iwo akhakwata mabira, ng'ombe na mabulu onsene mbakhonda siya chinthu na chibodzi chene kuti Aisraele adye.

⁵Iwo akhadza na pifuyo pyawo na makumbi awo ninga nyadzombe. Iwo na ngamila zawo akhali okhonda lengeseka. Iwo adadza mbasakaza dzikoyo,

⁶mwakuti Aisraele akhasowa nyakuaphedza.

⁷Tenepo Aisraele adalira kuna MBUYA kuti aaphedze kuna Amidiani,

⁸tenepo iye adaatumizira mprofeti ule adadza kuna iwo na mphangwa zakubulukira kuna MBUYA Mulungu wa Israele kuti: “Ine ndidakubulusani paubitchu m'dziko ya Iguputo.

⁹Ine ndidakupulumusani m'manja mwa Aiguputo, pontho m'manja mwa anthu adamenyana na imwe m'dziko muno ale. Ine ndidaathamangisa ndzidzi ukhaenda imwe, tenepo ine ndidakupasani dziko yawoyo.

¹⁰Ine ndidakupangani kuti ine ndine MBUYA Mulungu wanu pontho kuti muleke pembedza milungu ya Aamori, m'dziko inakhala imwe chinchinoyi. Kwache imwe nee mudandivesere tayu.”

¹¹Natenepo mngelo wa MBUYA adadza kumudzi wa Ofara mbakhala pansi pa muti wamthundu ule mwenechiroache akhali Yoasi wa mbumba ya Abiezere. Mwanache wamamuna, Gideoni akhabubuda tirigu m'dzenje yakutchitchithira vinyu, towera Amidiani aleke kumuona.

¹²Mngelo wa MBUYA adaonekera kuna iye penepo mbalonga mbati, “MBUYA ali nawe, iwe munthu wakuwanga mtima pontho wamphamvu!”

¹³Gideoni adalonga kuna iye mbati, “Mbuya, ndikuvunzenimbo, thangwi yache ninji pyonsenepi pyachitika ngakhala MBUYA ali nafe? Apombo pya pinthu pyakudodomesa pikhachitika pidatipanga makolo athu pile, pya mule mudaabulusira iye m'dziko ya Iguputo? MBUYA atisiya tekha, pontho atisiya m'manja mwa Amidiani.”

¹⁴Tenepo MBUYA adampanga mbati, “Ndoko na mphamvu zako zonsene ukapulumuse Aisraele kuna Amidiani. Ndakutuma ndine pano.”

¹⁵Gideoni adatawira mbati, “Apo Mbuya, ine ndinakwanisa tani kuapulumusa Aisraele? Mbumbanga njakusowa mphamvu pakati pa dzinza ya Manase, pontho ine ndine wamng'onoletu m'banja mwathu.”

¹⁶MBUYA adatawira mbati, “Iwe unakwanisa kupichita, thangwi ndinakuphedza. Iwe unakang'antha Amidiani mwakukhonda nensa khala ninga akhali munthu mbodziyo.”

¹⁷Gideoni adatawira mbati, “Ngakhala mwakomerwa nane, ndipaseni chitsikimizo kuti ndimwedi MBUYA.

¹⁸Ndaphata miyendo, lekani kwenda kufikirana ndadza na pyakupereka pyanga kuna imwe mbandipiikha pamaso panu.” MBUYA adalonga mbati, “Ine ndinati ndidikhire kufikirana iwe wadza.”

¹⁹Tenepo Gideoni adapita m'nyumba mwache mbaphika mwanambuzi mbaphatisa basa ndowa ya ufa kuphika mkate wakusowa chakufufumisira. Iye adaikha nyama m'chitundu mbaikha msuzi m'ndilo, tenepo adadza napyo kuna mngelo wa MBUYA pansi pa muti wamthundu ule, mbapipereka kuna iye.

²⁰Mngelo wa MBUYA ule adampanga mbati, “Ikha nyama na mkate pamwalapa mbukhuthulirepo msuzi.” Gideoni adachita tenepo.

²¹Penepo mngelo wa MBUYA adafuthula dzanjache mbakhuya nyama na mkate na ndodo ikhadaphatira iye m'manja mwache. Moto udabuluka m'mwala mule mbupyereza nyama na mkate ule. Natenepo mngelo ule adabisika.

²²Gideoni adadzindikira kuti mngelo wa MBUYA akhadamuonekera, tenepo adalonga mwamantha mbati, “MBUYA Mulungu! Ndaona mngelo wanu maso na maso!”

²³Mbwenye MBUYA adalonga kuna iye mbati, “Mtendere. Leka chita mantha. Iwe hunafa tayu.”

²⁴Gideoni adamangira MBUYA guwa yansembe penepo mbaithula na dzina yakuti, “MBUYA ndi mtendere.” Na lero guwayo ilipo basi pa Ofara, ile nja mbumba ya Abiezere.

²⁵Mosiku onthowo MBUYA adapanga Gideoni mbati, “Kwata ng'ombe imuna ibodzi ya babako, ng'ombe imuna ya pyaka pinomwe mbugwise guwa ya babako idamangira iye milungu Baala, pontho ubuluse dzimunthu wa milungu Ashera, ali m'khundu mwache ule.

²⁶Umangire mwadidi MBUYA Mulungu wako guwa yansembe pamuluwu. Tenepo kwata ng'ombe ile mbuipyereze nsembe pakuphatisa basa dzimunthu wamuti wa Ashera, milungu yawo udabulusa iwe ule ninga nkhuni.”

²⁷Natenepo Gideoni adakwata khumi a anyabasache mbachita pikhadampanga MBUYA pile. Na thangwi yakuti iye akhagopa a pabanja pache, pontho na anthu a muluwanimo, iye hadapichite na masikati tayu, mbwenye adapichita pyache na mosiku.

²⁸Mangwana mwache na machibese pidalamuka anthu a muluwanimo adagumana kuti guwa yansembe ya Baala na dzimunthu wa Ashera, milungu yawo pyagwiswapo, pontho ng'ombe imuna yachiwiri yapyerezwa nsembe paguwa ikhadamangwa penepo ile.

²⁹Iwo adavunzana unango na mwanzache mbati, “Mbani adachita penepiyu?” Iwo adapivunzisa mwadidi mwene mbagumana kuti adapichita ndi Gideoni mwana Yoasi.

³⁰Iwo adalonga kuna Yoasi mbati, “Mbuluse panja pano mwanako, towera timphe! Iye adagwisa guwa yansembe ya Baala mbabulusa dzimunthu wa milungu Ashera akhali m'khundu mwache ule.”

³¹Mbwenye Yoasi adalonga kuna anthu onsene akhadamfikira ale mbati, “Ayi, imwe muli kukhundu kwa Baala? Kani imwe mukuyesa kumuikhira kunduli? Munthu onsene anaikhira kunduli Baala anati aphiwe pinafuna fika machibese. Ngakhala Baala ndi mulungu mulekeni apitchinjirize yekha ene; idagwiswa ndi guwache.”

³²Kubuluka ndzidzi wenewo kwenda m'tsogolo Gideoni akhadziwika na dzina yakuti Yerubaala,[18] thangwi Yoasi akhadalonga mbati, “Mulekeni Baala apitchinjirize yekha ene; idagwiswa ndi guwache.”

³³Kubuluka penepo Amidiani, Aamaleki onsene na madzinza anango akumabulukiro dzuwa adagumanyikana kumtunda unango wa mkulo wa Yorodani mbamanga msasawo paphedi ya Yezereele.

³⁴Mzimu wa MBUYA adamgudumira Gideoni, tenepo adaliza ngoma kuchemera mbumba ya Abiezere kumtewera.

³⁵Iye adatuma anyamphangwa kukhundu zonsene ziwiri za Manase kuachemera kuti amtewere. Iye adatuma pontho anyamphangwa kuna madzinza onsene a Asheri, Zebuloni na Nafitali, tenepo iwo adadza kuna iye.

³⁶Penepo Gideoni adalonga kuna Mulungu mbati, “Imwe mukulonga kuti mwanyerezera kuphatisa basa ine pano kupulumusa Israele,

³⁷ngayang'anani ndikuikha ubweya wa bira pansi pa mbuwa pambabubudira ine tirigu pale. Ngakhala mangwana na machibese ndinagumanapo bume yokha pa ubweyapo uku pambuwa ponsenepo mphakuuma, penepo ndinapidziwa kuti munaphatisa basa ine pano kupulumusa Israele.”

³⁸Penepyo pidachitikadi ninga monthomo. Mangwana mwache na machibese pidalamuka Gideoni adakamula ubweya ule mbujoja madzi akukwana kudzala chitomba.

³⁹Tenepo Gideoni adalonga kuna Mulungu mbati, “Lekeni kundizhangalira; ndilekeni ndilonge pontho kabodzi basi. Ndaphata miyendo nditawiriseni ndiyese pontho kabodzi basi na ubweyawu. Ndzidzi uno ubweya ukhale wakuuma pambuwapo pakhale mtota.”

⁴⁰Mosiku wenewo Mulungu adachitadi ninga monthomo. Mangwana mwache na machibese ubweya ukhali wakuuma mwenemo pambuwapo padatota na bume.