Read cisena ATONGI 7 Bible Online

ATONGI 7 - cisena bible

ATONGI 7

¹Nsiku inango Gideoni na amunache onsene adalamuka na machibese mbamanga msasa m'khundu-khundu mwa mphuno ya madzi ya Harodi. Msasa wa Amidiani ukhali paphedi kumpoto kwawo chifupi na phiri ya More.

²MBUYA adalonga kuna Gideoni mbati, “Amuna ana iwewa ngazinji pyakwanga kuti ine ndiachitise kukunda Amidiani. Iwo anakwanisa kunyerezera kuti akunda na mphamvu zawo mbakhonda kundikuza.

³Tenepo lalika kuna anthu kuti, ‘Munthu anachita manthayo abwerere pyache m'mudzi, ife mbatikhala pyathu paphiri ya Gileadi pano.’ ” Natenepo amuna pikwi makumawiri na piwiri adabwerera pyawo mbasalapo amuna pikwi khumi.

⁴Penepo MBUYA adalonga kuna Gideoni mbati, “Anthu ana iwe ngazinji pyakwanga basi. Akwate uende nawo kumadzi, tenepo ine ndinakaakhetha m'mbuto mwako. Ngakhala ndinalonga kuti mamuna ushu athema kwenda nawe, iye anati aende nawedi. Mbwenye ngakhala ndinalonga kuti mamuna ushu aleke kwenda nawe, iye hanaenda nawedi tayu.”

⁵Gideoni adatchithira na amuna ale kumadzi, tenepo MBUYA adalonga kuna Gideoni mbati, “Pambula mamuna onsene ule anakhaphwira madzi ninga mwanambwa pakati pa anthu onsene anagodama kuti amwe madziwa.”

⁶Pakhali amuna madzana matatu ale adatunga madzi na manjawo mbakhaphwira; anango onsene adagodama kuti amwe.

⁷MBUYA adalonga kuna Gideoni mbati, “Ine ndinakupulumusa pontho ndinakuchitisa kukunda Amidiani pakuphatisa basa amuna madzana matatu adamwa madzi mwakukhaphwira ale. Panga anango onsene kuti aende pyawo m'mudzi.”

⁸Tenepo Gideoni adagwinya Aisraele onsene pyawo m'mudzi kupambula amuna madzana matatu, ale adakwata pitomba na ngoma za amuna anango ale. Msasa wa Amidiani ukhali paphedi m'tchinde mwa phiri.

⁹Mosiku onthowo MBUYA adapanga Gideoni mbati, “Lamuka mbukasose msasawo; ndinakuchitisa kukunda.

¹⁰Kwache ngakhala unachita mantha, ndoko kumsasako pabodzi pene na nyabasako Pura.

¹¹Iwe unati ukave pinafuna iwo kalonga; penepo unawanga mtima kuasosa.” Tenepo Gideoni pabodzi pene na nyabasache Pura adatchithira kunkhomo kwa msasa wa anyamalwawo.

¹²Amidiani, Aamaleki na madzinza anango onsene akumabulukiro dzuwa adafalikira paphedi pale ninga nyadzombe, pontho iwo akhali na ngamila zakuinjipa pyakwanga ninga tchetcha ya pagombe ya bara.

¹³Pidafika Gideoni adava munthu unango akupanga mwanzache pya ndoto zache. Iye adalonga mbati, “Ndalota mkate wakuphikwa na ufa wa barele udagulung'undira mumsasa mwathu muno mbumenya khumbi. Khumbiyo idagweratu pansi phwatha.”

¹⁴Mwanzache ule adamtawira mbati, “Penepi nkhabe khala chinthu chinango tayu, mbwenye talasada ya Gideoni mwana Yoasi, Muisraele. Mulungu aikha m'manja mwache msasa onsenewu pabodzi pene na anyankhondo athu ene.”

¹⁵Pidava Gideoni ndoto za munthu ule mbadziwa kuti ipyo pikhalonganji, adagodama mbapembedza MBUYA. Kubuluka penepo adabwerera kumsasa wa Aisraele kule mbalonga mbati, “Lamukani, MBUYA atichitisa kukunda anyankhondo a Amidiani!”

¹⁶Iye adagawa amuna madzana matatu ale m'magulu matatu mbapereka ngoma kuna munthu onsene na chitomba chakukhala na nsakali m'bwalo mwache.

¹⁷Iye adaapanga mbati, “Ndingafika kunkhomo kwa msasa mundiyang'ane mbamuchita pinachita ine.

¹⁸Gulu yanga na ine tingaliza ngoma zathu, penepo imwe mulizembo zanu konsene kuzungulira msasawo mbamukhuwa kuti, ‘Kuna MBUYA na kuna Gideoni.’ ”

¹⁹Gideoni na gulu yache ya anthu dzana ibodzi adatchithira kunkhomo kwa msasa kule mbakudzati fika chiti-chiti pidamala chinjana anyakulondali. Iwo adaliza ngoma mbaswa pitomba pidaphatira iwo pile.

²⁰Tenepo magulu anango awiri ale adachitambo chibodzi-bodzi. Onsene adaphatira nsakali zile kumabzere kwawo, ngoma kumadyo kwawo mbakhuwa mbati, “Talasada ya MBUYA na ya Gideoni!”

²¹Munthu onsene adaimira pambuto pache kuzungulira msasawo, tenepo anyankhondo onsene adathawa akukhuwa,

²²Mwenemo Gideoni na amunache akhaliza ngoma zawo, MBUYA adachitisa anyamalwawo kumenyana okhokha na matalasadawo. Iwo adathawira ku Zarenati mpakana ku Beti-Shita, mbafika kuluwani ya Abele-Mehola chifupi na Tabati.

²³Tenepo amuna a madzinza a Nafitali, Asheri pabodzi pene na makhundu onsene awiri a Manase adachemerwa, tenepo iwo adathamangisa Amidiani.

²⁴Gideoni adatuma anyamphangwa kudziko yonsene ya m'mapiri ya Eferemu kalonga mbati, “Idzani dzamenya nkhondo na Amidiani. Khalirani pamkulo wa Yorodani na m'mikhwawa mpakana ku Beti-Bara towera Amidiani aleke wambuka.” Amuna a dzinza ya Eferemu adachemereswa onsene pabodzi mbakhalira pamkulo wa Yorodani na m'mikhwawa mpakana ku Beti-Bara.

²⁵Iwo adaphata mafumu awiri a ku Midiani, Mfumu Orebu na Zeebu; iwo adaphera Orebu pa Phanzwi ya Orebu, adaphambo Zeebu pambuto yakutchitchithira vinyu ya Zeebu. Iwo adathimiza kuthamangisa Amidiani mbadza na misolo ya Orebu na Zeebu kuna Gideoni ule ndzidzi wenewo akhali kumabulukiro dzuwa a mkulo wa Yorodani.