Read cisena ATONGI 8 Bible Online

ATONGI 8 - cisena bible

ATONGI 8

¹Kubuluka penepo amuna a dzinza ya Eferemu adalonga kuna Gideoni mbati, “Thangwi yache njanji mudakhonda kutichemerambo pikhamenya imwe nkhondo na Amidiani? Wachitiranji pinthu ninga penepi kuna ife?” Iwo adampokanyisa pyakwanga pene.

²Mbwenye Gideoni adalonga mbati, “Pinthu pidakwanisa ine kuchita nee si pinthu tayu kusangiza na pinthu pyachita imwepo. Podi na ping'ono pene pidachita imwe amuna a ku Eferemu mphyamaso pyakwanga kupiringana pinthu pyachita mbumbanga yonsene.

³Na mphamvu za MBUYA imwe mudapha mafumu mawiri a ku Midiani, Orebu na Zeebu. Ninji chachita ine kusangiza na chenechi?” Pidalonga iye penepi, iwo hadamzhangalirave pikulu pene tayu.

⁴Gideoni na amunache madzana matatu ndzidzi wenewo akhadafika kumkulo wa Yorodani mbawambuka. Iwo adamala topa, kwache adathimiza kuthamangisa anyamalwawo.

⁵Pidafika iwo ku Sukoti, iye adalonga kuna amuna a muluwanimo mbati, “Ndaphata miyendo, apasenimbo amunangawa mikate pang'ono. Iwo amala topa, pontho ndikuthamangisa Zeba na Zalimuna mafumu awiri a ku Midiani.”

⁶Mbwenye akadamu a ku Sukoti adalonga mbati, “Thangwi yache njanji inafunira ife pasa anyankhondo kudya? Imwe nee mudzati phata Zeba na Zalimuna tayu.”

⁷Gideoni adalonga mbati, “Thangwi ya penepi, MBUYA angaikha Zeba na Zalimuna m'manja mwathu ndinakumenyani na matsanjo a minga, pontho na gogodo yathika pya m'thando yatchetcha muno.”

⁸Gideoni adathimiza kwenda kuna Penuele mbapempha pibodzi-bodzipi kuna anthu a kweneko, kwache amuna a kweneko adatawira chibodzi-bodzi ninga amuna a ku Sukoti.

⁹Natenepo Gideoni adalonga kuna iwo mbati, “Ndingakunda kunaenda ineku pakubwerera panga ndinagwisa nsanjayi.”

¹⁰Zeba na Zalimuna akhali pa Karikori na anyankhondo awo. Pakati pa anyankhondo onsene a madzinza akumabulukiro dzuwa adasalira okha akhalipo pikwi khumi na pishanu; anyankhondo pikwi dzana na makumawiri adaphiwa.

¹¹Gideoni adenda na njira yakuphatiswa basa na anyakukhala m'makumbi, kumabulukiro dzuwa a Noba na Yogibeha mbasosa anyankhondo mwakuatutumusa.

¹²Mafumu awiri, Zeba na Zalimuna a ku Midiani adathawa, kwache iye adaathamangisa basi mbaaphata mbachitisa anyankhondo awo onsene kukhala pampani-pani.

¹³Pikhabwera Gideoni kubulukira kunkhondo na pamakata a Heresi,

¹⁴adaphata mphale mbodzi wa ku Sukoti mbamvunza. Mphale ule adalembera pansi Gideoni madzina makumanomwe na manomwe a mu Sukoti.

¹⁵Tenepo Gideoni adenda kuna amuna a ku Sukoti mbalonga mbati, “Kumbukani kuti pidakhonda imwe kundiphedza. Imwe mudalonga kuti nkhabe kwanisa tayu kupasa pyakudya anyankhondo anga adamala topa ale, thangwi ndikhadadzati kunda tayu Zeba na Zalimuna. Apo lero ndaaphatatu!”

¹⁶Iye adakwata minga na matsanjo a gogodo yathika pya m'thando yatchetcha mbatchunyusa napyo akadamu a ku Sukoti.

¹⁷Iye adagwisa nsanja ya ku Penuele mbapha amuna a mumzindamo.

¹⁸Kubuluka penepo Gideoni adavunza Zeba na Zalimuna mbati, “Amuna adapha imwe ku Tabori akhali akutani?” Iwo adatawira mbati, “Iwo akhaoneka ninga iwepo, onsene a iwo akhaoneka ninga mwana wa mfumu.”

¹⁹Gideoni adalonga mbati, “Iwo akhali abale anga, ana a mama nyakundibala. Ine ndinadumbira kuti ngakhala imwe nee mudaapha tayu, inembo mbidakuphani tayu.”

²⁰Tenepo iye adalonga kuna Yetere mwanache wautombo mbati, “Lamuka mbuaphe!” Kwache Yetere hadacholole talasadache tayu, thangwi akhali mphale, pontho akhachita mantha.

²¹Penepo Zeba na Zalimuna adalonga kuna Gideoni mbati, “Lamuka mbutiphe ndiwe ene pyako, thangwi iwe unachita chamuna.” Natenepo Gideoni adaapha mbakwata mikufu yakubalika ikhali mkhosi mwa ngamila zawo zile.

²²Kubuluka penepo Aisraele adalonga kuna Gideoni mbati, “Khala mtongi wathu, iwe, mwanako na chidzukulu chako. Iwe watipulumusa m'manja mwa Amidiani.”

²³Gideoni adatawira mbati, “Ine nkhabe khala mtongi wanu, nee mwananga tayu. MBUYA mbakhale mtongi wanu.”

²⁴Mbwenye iye adathimiza kulonga mbati, “Ndinakupemphani chinthu chibodzi. Munthu onsene wa imwe andipase mphete za m'khutu zidakwata iye.” (Amidiani ninga Aishimaele akhavala mphete zagolidi m'khutu.)

²⁵Anthu adatawira mbati, “Tinakomerwa kuzipereka kuna iwe.” Iwo adathasika nguwo, tenepo munthu onsene adaikha mphete za m'khutu zidakwata iye zile.

²⁶Mphete za m'makutu zagolidi zidatambira Gideoni zidalemera chifupi-fupi makilogramu makumawiri kupambula mikufu yakubalika, pyakuthemesera manungo, na nguwo zamsuzi wanyemba zikhavala mafumu a ku Midiani, pontho bande yakumangirirwa m'khosi mwa ngamila zawo zidatambira iye zile.

²⁷Gideoni adasasanya mfanikizo wagolidi mbauikha muluwani mwache ya Ofara. Aisraele onsene adakhonda Mulungu mbaenda kweneko kapembedza mfanikizo ule. Tenepo icho chidasanduka msampha kuna Gideoni na kuna banjache.

²⁸Tenepo Amidiani adakundwa na Aisraele, pontho pakhali nkhabeve chakugoswa tayu. Dzikoyo ikhali pamtendere pyaka makumanayi kufikirana Gideoni adafa.

²⁹Gideoni adabwerera kwawo mbakakhala kweneko.

³⁰Iye akhali na ana makumanomwe, thangwi iye akhali na akazi azinji ene.

³¹Iye akhali pontho na mkazi wachibitchu mu Shekemu, ule akhadambalira mwana wamamuna mbamthula Abimeleki.

³²Gideoni mwana Yoasi adafa uku akalamba mwadidi mbaikhwa m'masiye a babache pa Ofara, luwani ya mbumba ya Abiazeri.

³³Sindzidzi Gideoni nkhufa Aisraele hadakhulupirike kuna Mulungu tayu mbapembedza milungu Baala. Iwo adaikha Baala-Beriti kukhala mulungu wawo

³⁴mbaduwalira MBUYA Mulungu wawo, akhadaapulumusa m'manja mwa anyamalwawo onsene akuazungulira ule.

³⁵Iwo hadakomere mtima tayu banja ya Yerubaala, ule ndi Gideoni, podi kwene kuti iye adachitira Aisraele pinthu pyadidi.