Read cisena ATONGI 9 Bible Online

ATONGI 9 - cisena bible

ATONGI 9

¹Abimeleki mwana wamamuna wa Gideoni adenda kuluwani ya Shekemu, kule kukhakhala abale ache mache onsene mbalonga kuna iwo na kuna mbumba yonsene ya mache ule mbati,

²“Vunzani mzika za ku Shekemu kuti, ‘Chadidi ninji kuna imwe; kutongwa na ana achimuna onsene makumanomwe a Gideoni, penu kutongwa na munthu mbodzi ene basi? Kumbukani kuti inembo ndine mbaleanu chadi-chadi.’ ”

³Abale ache mache adalonga kuna amuna a ku Shekemu pya pinthu penepi, tenepo iwo adanyerezera kutewera Abimeleki, thangwi iye akhali mbaleawo.

⁴Iwo adampasa kobiri zasiliva makumanomwe zakubulukira m'nyumba yakupembedzeramo ya Baala-Beriti, tenepo na kobiri zenezi iye adalemba ganyo malova kukhala kunduli kwache.

⁵Tenepo iye adenda kumusa kwa babache ku Ofara, tenepo na nsonga ya mwala ubodzi iye adapha nawo abale ache makumanomwe, ale akhali ana a Gideoni. Kwache Yotamu, mwana wamng'onoletu wa Gideoni adabisala, tenepo hadaphiwe tayu.

⁶Kubuluka penepo amuna a ku Shekemu na ku Beti-Milo adagumanyikana pabodzi pansi pa muti wakupambulika wamthundu mu Shekemu mbadzoza Abimeleki ufumu.

⁷Pidapiva Yotamu, adenda kaimira pansonga ya phiri ya Gerizimu mbakhuwa kuna iwo mbati, “Veserani kuno, imwe amuna a ku Shekemu, tenepo Mulungu anati akuveserenimbo.

⁸Pidachitwa na miti, ile idagumanyikana pabodzi kupisankhulira okha ene mfumu. Mitiyo idalonga kuna muti waolivi kuti, ‘Khala mfumu wathu.’

⁹Muti waolivi ule udatawira kuti, ‘Kuti ine ndikhale mfumu wanu ine ndathema kusiya kubulusa mafutanga, ale ambaphatiswa basa kulemedza nawo milungu pontho anthu.’

¹⁰Miti ile idalonga kuna muti wamkuyu ule kuti, ‘Idza ukhale mfumu wathu.’

¹¹Mbwenye muti wamkuyu ule udatawira kuti, ‘Kuti ine ndikhale mfumu wanu ine ndathema kusiya kubala nsapo zanga zadidi pontho zakutapirazi.’

¹²Miti ile idalonga kuna mtawi wamfesa kuti, ‘Idza ukhale mfumu wathu.’

¹³Mbwenye mtawi wamfesa ule udatawira kuti, ‘Kuti ine ndikhale mfumu wanu ine ndathema kusiya kubulusa vinyu ambachitisa milungu na anthu kukomerwa ule.’

¹⁴Kubuluka penepo miti yonsene idalonga kuna thundudzi ya minga mbati, ‘Iwe idza ukhale mfumu wathu.’

¹⁵Thundudzi ya minga idatawira kuti, ‘Ngakhala munafunadi kuti ine ndikhale mfumu wanu idzani mukhale pamthunzi m'tchinde mwangamu. Ngakhala munakhonda kuchita tenepo moto unagaka kubulukira m'minga mwangamu mbupisa mikungudza ya ku Lebanoni.’ ”

¹⁶Penepo Yotamu adathimiza kulonga mbati, “Ayi imwe mukhachitadi penepi na mtima wakuona, pontho na mtima onsene pikhadzoza imwe Abimeleki kukhala mfumu wanu? Ayi imwe mudachita pinthu pyadidi kuna Gideoni na banjache pyakuthemerana na pidachita iye?

¹⁷Kumbukani kuti babanga adakumenyerani nkhondo. Iye adasasanyika kufa kufuna kupulumusa imwepo kuna Amidiani.

¹⁸Kwache lero mwasandukira banja ya babanga. Imwe mudapha anache, amuna makumanomwe pamwala ubodzi mbamudzoza Abimeleki, mwana wamamuna adambalira bitchu wache ule, kukhala mfumu wa ku Shekemu, thangwi ndi mbaleanu.

¹⁹Apo chinchino pidachita imwe kuna Gideoni na kuna banjache ngakhala mudapichita na mtima wakuona, pontho na mtima onsene, penepo komerwani na Abimeleki iyembo akomerwe namwe.

²⁰Mbwenye ngakhala si tenepo tayu, moto mbugake kubulukira muna Abimeleki kupisa mzika za Shekemu, na za Betimilo; moto mbugake pontho kubulukira muna mzika za Shekemu, Betimilo kupisa Abimeleki.”

²¹Podi Yotamu akhachita mantha na Abimeleki nanache, iye adathawa mbaenda pyache kakhala ku Beeri.

²²Abimeleki adatonga Israele pyaka pitatu.

²³Mulungu adagwisa mzimu okhonda vana pakati pa Abimeleki na amuna a mu Shekemu, tenepo iwo adapandukira Abimeleki.

²⁴Penepi pidachitika kuti Abimeleki na amuna a mu Shekemu, ale adamuwangisa mtima kupha ana Gideoni makumanomwe, abwezerwe upandu udachita iwo ule.

²⁵Amuna a mu Shekemu adabisalira Abimeleki m'tsanga pansonga ya phiri, tenepo iwo adaphata munthu onsene wakugwanda na njira yeneyo. Mbwenye Abimeleki adapangwa pya penepi.

²⁶Kubuluka penepo Gaala mwana wamamuna wa Ebedi adadza ku Shekemu na abale ache, tenepo amuna a mu Shekemu adamnyindira.

²⁷Onsene adenda kumunda wamfesa katchola mfesa mbasasanya vinyu mbachita phwando. Iwo adapita m'nyumba yakupembedzeramo milungu yawo, mule mudadya iwo na kumwa kwene mbasedegula Abimeleki.

²⁸Gaala adalonga mbati, “Ayi amuna a mu Shekemu muno ndife akutani? Thangwi yache ninji tikutumikira Abimeleki? Abimeleki mbani? Mwana Gideoni! Kadi Zebulu si nyachiwiriache tayu. Apo ninji ife tikumtumikira? Verani kholo wanu Hamori phata ya mbumbanuyi!

²⁹Mtongi wa anthu enewa mbidakhala ine, Abimeleki mbidamkhutcha mano basi. Ine mbidalonga[19] kuna Abimeleki kuti, ‘Buluka na anyankhondo ako onsene mbatichite nkhondo!’ ”

³⁰Zebulu, mtongi wa mzinda ule adazhangali pidava iye Gaala akulonga pinthu ninga penepi.

³¹Iye adatumiza mphangwa kuna Abimeleki ku Aruma kalonga kuti, “Gaala mwana Ebedi pabodzi pene na abale ache adza ku Shekemu, tenepo iwo nkhabe kukutawirisa kupita mumzindamo tayu.

³²Tenepo iwe na amuna ana iwe mwathema kwenda na mosiku kaabisalira m'minda.

³³Mangwana na machibese pakubuluka dzuwa mulamuke mbamukasose mzindawo mwakututumusa. Tenepo Gaala na amunache angabuluka dzamenyana namwe, akang'antheni pikulu pene ninga munakwanisira imwe.”

³⁴Tenepo Abimeleki na amunache onsene adenda na mosiku mbakaabisalira m'magulu manayi kunja kwa Shekemu.

³⁵Pidaona Abimeleki na amunache kuti Gaala na amunachembo akubuluka kunja mbaimira pamsuwo wa mzindawo, adalamuka m'mbuto zikhabisala iwo zile.

³⁶Gaala adaaona mbalonga kuna Zebulu mbati, “Ngayang'anani amuna akutchitha pansonga ya phiri!” Zebulu adatawira mbati, “Enewo si anthu tayu mphithunzi-thunzi pyawo kwene paphiri.”

³⁷Gaala adalonga pontho mbati, “Ngayang'anani mbamuna akutchitha pamsana wa phiri, pontho gulu ibodzi ikhadza na njira yokhokha kubulukira kumuti wamthundu wa anyakuombedza!”

³⁸Tenepo Zebulu adalonga kuna iye mbati, “Apo kupithanda kwako konsene kule kuli kupi? Ndiwe ene ukhavunza thangwi inatumikira ife munthu weneyu Abimeleki. Enewo mbamuna akhalulupisa iwe ale. Apo, ndoko chinchino ukamenyane nawo.”

³⁹Gaala adatsogolera amuna a ku Shekemu kamenyana na Abimeleki.

⁴⁰Abimeleki adathamangisa Gaala, tenepo iye adathawa. Amuna azinji adakuwazwa, podi na ale akhali pamsuwo wa mzinda ene.

⁴¹Abimeleki adakhala ku Aruma, tenepo Zebulu adathamangisa Gaala na abale ache ene kubuluka mu Shekemu, towera aleke khalave mwenemo.

⁴²Mangwana mwache Abimeleki adapidziwa kuti anthu a mu Shekemu akhasasanya pyakwenda kuminda.

⁴³Natenepo iye adakwata amunache mbaagawa m'magulu matatu mbaabisalira m'minda. Pidaona iye anthu akubuluka mumzinda mule, adavumbuka mukhabisala iwo mule mbaasosa.

⁴⁴Pikhachimbiza Abimeleki na gulu yache kwenda kalondali pamsuwo wa mzinda ule, magulu anango awiri ale adasosa anthu mumzinda mule mbaapha onsene.

⁴⁵Kumenyana kudakwata nsiku yonsene, tenepo Abimeleki adapokosera mzinda ule mbapha anthu a mwenemo. Iye adagwisa mzindawo mbawaza munyu ponsene pene mwenemo.

⁴⁶Pidava akadamu onsene akukhala munsanja mu Shekemu penepi, adapita m'subi yakutchinjirizwa ya nyumba yakupembedzera ya Eli-Beriti.

⁴⁷Abimeleki adapangwa kuti iwo akhagumanyikana kweneko,

⁴⁸natenepo iye adakwira phiri ya Zalimoni na amunache. Tenepo iye adakwata mbadzo mbagwanda matsamvu a muti mbaathukula paphewa pache. Iye adapanga amunache kuti achimbize kachita chibodzi-bodzi.

⁴⁹Natenepo mamuna onsene adatema matsamvu mbatewera Abimeleki, tenepo adamuluka matsamvu ale pasubi yakutchinjirizwa ile. Iwo adagasa moto mbapisa anthu onsene m'bwalo mule. Anthu onsene pansanja ya Shekemu adafa; amuna na akazi akukwana ninga chikwi chibodzi.

⁵⁰Kubuluka penepo Abimeleki adenda ku Tebezi mbazungulira mzindawo, tenepo iwo adaupokosera.

⁵¹Kweneko kukhali nsanja yamphamvu, tenepo amuna, akazi na akadamu ene adathawira mwenemo. Iwo adapifungira mwenemo mbaenda kakhala pansoyi.

⁵²Abimeleki adadza kusosa nsanja ile. Pidenda iye kumsuwo kuipisa,

⁵³mkazi unango adaponya libwe mbimgwera mumsolo mwache mbiswa chibade cha msolo wache.

⁵⁴Penepo pene iye adachemera mphale akhaphatira pida pyache ule mbampanga mbati, “Kwata talasadako undiphe, towera iwo aleke longa kuti mkazi ndiye andipha.” Tenepo mphale ule adamulasa mbafa.

⁵⁵Pidava Aisraele kuti Abimeleki afa, adabwerera m'misa mwawo.

⁵⁶Na njira yeneyi Mulungu adabwezera Abimeleki upandu udachita iye kuna babache pakupha abale ache makumanomwe ale.

⁵⁷Mulungu adachitisambo anthu a mu Shekemu kubonera thangwi ya kudawika kwawo ninga mudalongera Yotamu, mwana Gideoni, kuti pinaachitikira ndzidzi udaatemberera iye.