Read cisena 2 YOHANI 1 Bible Online

2 YOHANI 1 - cisena bible

2 YOHANI 1

¹Kubulukira kuna Mkulu wa mpingo. Kwenda kuna mkazi wakusankhulwa na Mulungu na kuna anache[1] ambafuna ine na mtimanga onsene ale. Si ine ndekha tayu, mbwenye anyakudziwa pyakuonadi onsene ambakufunani,

²thangwi pyakuonadi pimbakhala muna ife, pontho pinakhala na ife kwenda na kwenda.

³Kukoma mtima, nsisi na mtendere pyakubulukira kuna Mulungu Baba pabodzi na Yesu Khristu, Mwanache, pikhale pyathu mwakuonadi na kufunana.

⁴Ndikhali wakukomerwa pyakwanga pidagumana ine kuti ananu anango akuteweza pyakuonadi, ninga montho mudatipangira Baba.

⁵Natenepo ndikupempha imwe, mkazi wakusankhulwa na Mulungu, kuti tifunane unango na mwanzache. Matongero anakulemberani inewa si achinchino tayu. Enewa ndi matongero akhali na ife kubulukira pakutoma.

⁶Kufunana kunalonga ineku nkhwakuti tikhale akuvera matongero a Mulungu. Matongero ache ninga mwavera imwe kubulukira pakutoma ngakuti monsene mukhale akufunana.

⁷Anyakunyengeza anthu azinji, pontho anyakukhonda tawira kuti Yesu Khristu adadza ninga munthu chadi-chadi, afalikira padziko yonsene yapansi. Munthu wakuchita tenepo ngwakunama, pontho ndi nyamalwa wa Khristu.

⁸Onesesani kuti muleke dzataya pidaphatira ife[2] basa pile, mbwenye kuti mutambire mfupo wanu wamumphu.

⁹Munthu anakhonda thimiza kukhala na chifunziso cha Khristu, mbwenye mbathimizirapo pyachembo, weneyo nkhabe Mulungu tayu. Munthu anathimiza kukhala nacho chifunziso chenechi ana Baba na Mwana ene.

¹⁰Tenepo, ngakhala munthu unango anadza kuna imwe mbakhonda funzisa chifunziso chenechi, lekani kumtambira kumusa kwanu, pontho lekani na kumpasa kwene mwenyikiro.

¹¹Thangwi nyakumtambira mwadidiyo anasanduka mwanzache wakuchita naye pinthu pyakuipa pimbachita iye pile.

¹²Ndina pizinji pyakuti ndikupangeni, kwache sinafuna kuti ndichite kupilemba m'kalata tayu. M'mbuto mwache ndikudikhira kudza kwanuko kuti ndilonge namwe maso na maso, towera tidzakomerwe monsene mwene.

¹³Ana a nanako wakusankhulwa[3] na Mulungu akupereka mwenyikiro kuna imwe.