Read cisena YUDA 1 Bible Online

YUDA 1 - cisena bible

YUDA 1

¹Kubulukira kuna ine, Yuda, mbaleache Yakobo, pontho nyabasa wa Yesu Khristu. Kwenda kuna anthu achemerwa na Mulungu, ambafunwa na Mulungu Baba, mbatchinjirizwa na Yesu Khristu ale:

²Nsisi, mtendere na kufunana pyakubulukira kuna Mulungu pikhale namwe mwakuinjipa.

³Ashamwali anga apamtima, podi kwene kuti ine ndidapifuna pyakwanga kukulemberani pya chipulumuso china ife tonsene, kwache mtimanga udandikhakhamiza kuti ndikuwangiseni mtima kuti muthimize mumenye nkhondo yakutchinjiriza chikhulupiro, chidachita Mulungu nyamphera-phera kuchipereka kuna anthu ache kabodzi kene basi chile.

⁴Thangwi anthu anango okhonda tsalakana pya Mulungu adapita pakati pathupa mwakukhonda dziwika, anthu ale ambapotoza mphangwa za kukoma mtima kwa Mulungu wathu ninga chinthu chakuapasa utumbe wakuchitira pyakuzuda, pontho ngale ambakhonda Yesu Khristu, Mbuyathu pontho Mfumu yekha ene ule. Kalene Malemba adalongeratu pya kutchunyuswa kwatambira iwo.

⁵Podi kwene kuti imwe mukupidziwa pyonsenepi, chinchino ndikufuna kukukumbusani mule mudapichita Mbuya[1] nyamphera-phera kupulumusa anthu a ku Israele kabodzi kene basi kubulukira m'dziko ya Iguputo, mbwenye pidamala penepo, iye adavunga anthu adakhonda khulupira ale.

⁶Kumbukani angelo ale hadakhutire tayu na utongi ukhadaperekwa kuna iwo ule, mbwenye iwo adasiya mbuto zawo zikhakhala iwo zile: iwo adamangwa na njema kumdima kwenda na kwenda, kule kunaakoya Mulungu kudikhira Nsiku ikulu inafuna iwo dzatchunyuswa.

⁷Kumbukani Sodomu na Gomora na maluwani a chifupi ale. Ninga angelo, anthu a m'maluwani enewa akhachita pyakuzuda mbateweza pikhumbo pyakupokanyisana na makhaliro aumunthu; kutchunyuswa kwawo na moto okhonda thima mphyakucheuza anthu anango onsene.

⁸Mbwenye anthu enewa akuchita chibodzi-bodzi kuteweza masomphenya awo, ale ambaachitisa kuti adawire manungo awo; iwo ambalulupisa utongi wa Mulungu mbatikana pyakulengwa pyamoyo pyademelero pya kudzulu.

⁹Nee Mikaele[2] ene, mkadamu wa angelo onsene, adachita penepi tayu. Ndzidzi ukhapokanyana iye na Satana kukanganirana mtembo wa Mose, iye hadawange mtima tayu kulonga na mafala akumtikana nawo kuti akonwa, mbwenye adalonga mbati, “Mbuya mbakusumulule!”

¹⁰Mbwenye anthu enewa ambalongera pyakuipa pinthu pyonsene pimbakhonda iwo kuvesa; tenepo pinthu pimbadziwa iwo na nzeru zawo zakubalwa nazo pile, ninga mumbachitira pirombo pyam'tsanga, mphyontho-pyonthopyo pimbaavunga.

¹¹Dzedze kuna anthu enewa. Iwo atsanzira pinthu pidachita Kaini pile. Iwo adawa pikulu ninga mudachitira Balamu, thangwi ya kukhumba kobiri. Iwo agalukira ninga mudachitira Kora, tenepo iwo avungikambo ninga iye.

¹²Na lidyo yawo yakusowa nayo manyadzo iwo akhala ninga pyakuswipisa maphwando anu ambachita imwe pabodzi kuonesa kufunana[3] kwanu. Iwo ambatsalakana pyawo pene basi. Iwo akhala ninga makole akugwinywa uku na uku na mphepo, kwache okhonda dzesa mvula. Iwo akhala ninga miti yokhonda bala nsapo, penu ukhale pyawo ndzidzi wache tani; miti ile yadulwa mitsitsi mbiferatu.

¹³Mabasawo akuchitisa manyadzo akhala ninga mapovu akubulukira kuna mabimbi akugoswa pabara. Iwo akhala ninga nyenyezi zakufamba-famba, tenepo Mulungu akuakoyera mbuto kumdima wakugoswaletu kwenda na kwenda.

¹⁴Enoki chidzukulu chachinomwe cha Adamu, ule kale ene adalongaletu pya anthu enewa mbati, “Mbuya anabwera na pikwi pizinji pya angelo ache akuchena

¹⁵kudzatonga mseru onsenewo, kuatchunyusa thangwi ya makhaliro awo okhonda tsalakana pya Mulungu adachita iwo, pontho thangwi ya mafala onsene akutikana adamulongera anthu akudawa okhonda tsalakana pya Mulungu!”

¹⁶Anthu enewa ndzidzi onsene kwawo nkhudungunya na kudawisa anzawo; iwo ambateweza pikhumbo pyawo pyakuipa; iwo ambatumbama pya okha ene mbalonga pyadidi pya anthu anango, towera aganyali napyo.

¹⁷Kwache, ashamwali anga, kumbukani pidapangwa imwe kale ene na anyakutumwa a Mbuyathu Yesu Khristu.

¹⁸Iwo adalonga kuna imwe mbati, “Nsiku yakumalisa ingafika anthu anafuna dzakuselusani anati adze, anthu akuteweza pikhumbo pyawo pyokhonda tsalakana pya Mulungu ale.”

¹⁹Anthu enewa ngale ambalamusa magawikano pakati pa anthu, anthu ambateweza pikhumbo pya anthu a padziko yapansi, anthu akusowa Mzimu Wakuchena ale.

²⁰Mbwenye imwe, ashamwali anga, thimizani kukhazikisa moyo wanu pamaziko a chikhulupiro chanu chakupambulikaletuchi. Pempherani na mphamvu za Mzimu Wakuchena,

²¹pontho khalani mukukufunani kwa Mulungu ndzidzi unadikhira imwe Mbuyathu Yesu Khristu kuti akupaseni moyo okhonda mala na kukoma kwache mtima.

²²Verani nsisi anthu akupenuka ale;

²³pulumusani anthu anango pakuaphula pamoto; onesani nsisi kuna anango, kwache mupichite na mantha, mbwenye muzondane na nguwo zawo zene, pile pyaipiswa thangwi ya pikhumbo pyawo pyakuipa.

²⁴Kuna iye ule anakwanisa kukuchitani kuti muleke kugwa, pontho kukufikisani kuna demelero yache akusowa chinthu chakukupokanyisani, pontho akukomerwa pikulu

²⁵kuna Mulungu mbodzi basi, Nyankhombo wathu, kukhale demelero, ufumu, mphamvu na utongi kudzera muna Yesu Khristu Mbuyathu, kutomera pakutomaletu, lero, pontho kwenda na kwenda! Ameni.