Read cisena CHIDZIWISO 1 Bible Online

CHIDZIWISO 1 - cisena bible

CHIDZIWISO 1

¹Bukhu yeneyi ikulonga pya chidziwiso chidalonga Yesu Khristu chile. Mulungu adampasa chidziwiso chenechi kuti aonese anyabasache pinthu pyathema kuchitika chinchino pano. Khristu adaonesa nyabasache Yohani pinthu penepi kudzera muna mngelo wache adatuma iye ule.

²Yohani alonga pyonsene pidaona iye mbachitira umboni mafala a Mulungu na pyakuonadi pidatchulula Yesu Khristu.

³Ngwakutsanzaya munthu anawerenga bukhu yeneyi, pontho ngakutsanzaya ale anavera mafala a mphangwa zauprofeti m'bukhumu mbaakoya mumtima mwawo! Thangwi ndzidzi wakuti pyonsenepi pichitike uli chifupi kudza.

⁴Kubulukira kuna ine Yohani, Kwenda kuna mipingo minomwe m'nthemba ya Asia: Kuna imwe mbakukhale mtendere na kukoma mtima pyakubulukira kuna Mulungu, ule alipo chinchino, akhalipo kale, pontho anakhalapo kwenda na kwenda, pontho pyakubulukira kuna mizimu minomwe yakukhala pamaso pampando wache wachifumu,

⁵pontho pyakubulukira kuna Yesu Khristu, mboni yakukhulupirika, nyakutoma kulamuka kuimfa, pontho mfumu wa mafumu onsene a padziko yapansi ule. Iye ambatifuna, tenepo na imfache ya pamtanda ninga nsembe, iye adatisudzula kuna pyakudawa pyathu.

⁶Iye adatisanduza kukhala dzinza yachifumu, pontho anyansembe kuti tiphatire basa Babache Mulungu. Kuna Yesu Khristu kukhale demelero na mphamvu kwenda na kwenda! Ameni.

⁷Ngayang'anani, iye akudza pamakole! Munthu onsene anamuona. Podi na adamlasa ene ale anamuona. Anthu a madzinza onsene a padziko yapansi analira thangwi ya iye. Pilekeni pikhale tenepo! Ameni.

⁸Mbuya Mulungu Wamphamvu zonsene, ule alipo chinchino, akhalipo kale, pontho anakhalapo kwenda na kwenda alonga mbati, “Ine ndine nyakutoma, pontho nyakumalisa.”

⁹Ine ndine Yohani, mbaleanu, pontho mwanzanu wakukwata naye khundu m'nyatwa, mu Ufumu, na mukupirira mwakufulika, ninga nyakutewera Yesu. Ndidaponywa pantchuwa ya Patimo thangwi ndikhalalika mafala a Mulungu na pyakuonadi pidatchulula Yesu.

¹⁰Pa Nsiku ya Mbuya ndidagudumirwa na Mzimu Wakuchena, tenepo ndidava kunduli kwanga fala yamphamvu ninga kulira kwa ngoma.

¹¹Fala ile idaveka kuti, “Lemba mumpukutu pinaona iwe mbuutumize kuna mipingo minomwe: Mpingo wa ku Efeso, wa ku Simirina, wa ku Perigamu, wa ku Tiatira, wa ku Saridi, wa ku Filadelifia, na wa ku Laodikea.”

¹²Pidazungunuka ine kuti ndione ule akhalonga na ine, ndidaona pyakuikhirapo nyale pinomwe pya golidi.

¹³Pakati pa nyale zile ndidaona unango wakukhala ninga munthu. Iye adavala mkhanjo wakufika kumanyalo, pagangafuwa pachembo adamangapo na bande ya golidi.

¹⁴Tsisi yache ikhali ninga ubweya wakuchena wa bira, penu ninga matalala. Maso ache akhayerima ninga malulume a moto;

¹⁵manyalo ache akhayetima ninga utale wakunyunguluswa m'dzenje ya moto. Falache ikhatitima ninga madzi mazinji.

¹⁶M'dzanjache yamadyo adaphatira nyenyezi zinomwe. M'kanwa mwache mudabuluka talasada yakutwa uku na uku. Nkhope yache ikhayetima ninga kugaka kwa dzuwa masikati.

¹⁷Pidamuona ine, ndidagwa pansi pamanyalo ache ninga munthu wakufa. Mbwenye iye adandisanjika dzanjache yamadyo mbandipanga mbati, “Leka gopa! Nyakutoma, pontho nyakumalisa ndine pano.

¹⁸Ana moyo ule ndine pano! Ine ndikhali wakufa, mbwenye chinchino ndina moyo kwenda na kwenda. Imfa na dziko ya anthu akufa[1] ene pili pansi pa utongi wanga.

¹⁹Tenepo, lemba pyaona iwepi, pinthu pinachitika ndzidzi uno na pile pene pinafuna dzachitika m'tsogolo muno.

²⁰Pyakubisika pya nyenyezi zinomwe zaona iwe m'dzanjanga yamadyo, na pyakuikhirapo nyale pinomwe pya golidi pile pikulonga tenepa: nyenyezi zinomwe zile ndi angelo a mipingo minomwe, pyakuikhirapo nyalembo pinomwe pile ndi mipingo minomweyo.