Read cisena CHIDZIWISO 10 Bible Online

CHIDZIWISO 10 - cisena bible

CHIDZIWISO 10

¹Tenepo ndidaona mngelo unango wamphamvu akutchitha kudzulu. Iye adakukutizwa na makole, taleza mbazungulira kumsolo kwache; nkhope yache ikhali ninga dzuwa, pontho miyendo yache ikhali ninga mizati ya moto.

²Iye adaphatira mpukutu ung'ono wakufungula m'manja mwache. Adapondesa dzinyalo yache yamadyo pabara mbapondesa dzinyalo yache yamabzere pamtunda,

³mbachemera mwakugaluza fala kule kudaveka ninga kubangula kwa nkhalamu. Pidamala iye kuchemera piphaliwali pinomwe pidatawira na kuguma.

⁴Sindzidzi pidaguma piphaliwali pile, inembo ndikhali chifupi kulemba. Mbwenye ndidava fala yakubulukira kudzulu kulonga kuti, “Bisa, pontho leka lemba pinalonga piphaliwali pinomwepi.”

⁵Tenepo mngelo adaona ine apondesa mwendo ubodzi pabara pontho mwendo unango pamtunda ule, adakwiza mkono wache wamadyo m'dzulu

⁶mbadumbira na dzina ya Mulungu, nyakukhala na kukhala, ule adalenga kudzulu, dziko yapansi na bara na pyonsene pili mwenemo. Mngelo adalonga mbati, “Nkhabeve dzadembuka tayu!

⁷Mbwenye mngelo wachinomwe angaliza ngomache, penepo manyerezero akubisika a Mulungu anakwana-kwana ninga mukhadalongera iye kuna anyabasache, maprofeti.”

⁸Tenepo fala idava ine kulonga kubulukira kudzulu pakutoma ile idalonga pontho kuna ine kuti, “Ndoko kakwate mpukutu wakufuthulwa waphatira mngelo wakuponda pabara na pamtunda pene ule.”

⁹Ndidenda kuna mngelo ule mbandikampempha kuti andipase mpukutu ung'ono ule. Adandipanga mbati, “Kwata uudye; iwo unasanduka wakuwawa m'chifu mwako, mbwenye unakhala wakutapira ninga uchi m'kanwa mwako.”

¹⁰Ndidakwata mpukutu ule kubulukira m'manja mwache mbandiudya, iwo ukhali wakutapira ninga uchi m'kanwa mwanga, mbwenye pidamala ine kuudya, udasanduka wakuwawa m'chifu mwanga.

¹¹Tenepo ndidapangwa kuti, “Iwe wathema kulonga pontho mphangwa zakubulukira kuna Mulungu zakulonga pya madzinza, mitundu, pilongero na mafumu.”