Read cisena CHIDZIWISO 12 Bible Online

CHIDZIWISO 12 - cisena bible

CHIDZIWISO 12

¹Tenepo kudzulu kudaoneka chidziwiso chikulu chakudodomesa: pakhali mkazi wakuvala dzuwa, mwezi mbukhala pansi pa manyalo pache na chipewu chachifumu cha nyenyezi khumi na ziwiri kumsolo kwache.

²Iye akhali chifupi kubala mbalira na mtswotswo wa kubalako.

³Chidziwiso chinango chidaoneka kuthambo. Padaoneka nthonga ikulu yakufira na misolo minomwe, nyanga khumi na chipewu chachifumu m'misolo yonsene minomwe.

⁴Chidagwinya khundu ibodzi ya makhundu matatu a nyenyezi zakudzulu na mchirache mbaziponyera padziko yapansi. Chidaimira patsogolo pamkazi kuti amdyere mwanache sindzidzi nkhumbala.

⁵Tenepo adabala mwana wamamuna, ule anatonga madzinza onsene na mthondodzo wasimbi. Mbwenye mwana ule adagonkhwa mbayendeswa kuna Mulungu, pontho kumpando wache wachifumu.

⁶Mkazi ule adathawira kuthando yatchetcha kule kudamsasanyira kale Mulungu mbuto yache kuti akakoyiwe mwadidi nsiku chikwi na madzana mawiri na makumatanthatu.

⁷Tenepo nkhondo idagundika kudzulu. Mikaele na angelo ache adamenyana na nthonga ile; nthonga idamenyambo na angelo ache,

⁸mbwenye nthonga idakundwa. Tenepo icho pabodzi na angelo ache hadatawirisweve kukhala m'mbuto zawo kudzulu tayu.

⁹Nthonga ikulu idaponyerwa kunja, nyoka yakale ile yakuchemerwa Nyakuipa, penu Satana. Nthonga yeneyi idanyengeza anthu a padziko yonsene yapansi. Yeneyi pabodzi na angelo ache adaponyerwa padziko yapansi.

¹⁰Kubuluka penepo ndidava pontho fala yakugaluza kubulukira kudzulu kuti, “Chinchino chipulumuso cha Mulungu chafika! Chinchino Mulungu aonesadi mphamvu zache ninga mfumu! Chinchino Nyankhombo adasankhula iye kukhala Mfumu aonesadi utongi wache. Thangwi nyakupangirira abale athu pamaso pa Mulungu wathu mosiku na masikati ule, aponywa padziko yapansi.

¹¹Abale athu adamkunda na chiropa cha Mwanabira, pontho na umboni udachita iwo; iwo adapipereka okha ene kufa okhonda ikha konta kutaya moyo wawo.

¹²Natenepo kudzulu na anthu onsene akukhala kweneko mbakomerwe! Mbwenye dzedze kuna dziko yapansi na bara! Thangwi Satana atchithira kuna imwe. Iye ngwakudzala na ukali thangwi akupidziwa kuti ndzidzi wache wasala pang'ono basi.”

¹³Pidaona nthonga ile kuti yaponywa padziko yapansi, idatoma kuthamangisa mkazi adabala mwana wamamuna ule.

¹⁴Mkazi ule adapaswa maphaphido mawiri a gokomola kuti akwanise kuthawira kumbuto yache kuthando yatchetcha kule kunafuna iye dzakoyiwa mwadidi pyaka pitatu na theka gopesera kuphatwa na nthonga ile.

¹⁵Tenepo nthonga ile idapaira madzi makulu m'nduli mwa mkazi ule, towera akukulule mkazi ule.

¹⁶Mbwenye dziko yapansi idaphedza mkazi ule, idayashamula kukanwa kwache mbakhudyula madzi makulu adapaira nthonga ile.

¹⁷Nthonga ile idazhangali naye mkazi ule mbienda kamenyana na pidzukulu pyache pikhadasala pile. Enewa akhali ale ambavera matongero a Mulungu mbakukhulupirika kuna pyakuonadi pidatchulula Yesu pile.

¹⁸Nthonga ile idenda kaimira[5] m'khundu mwa bara.