Read cisena CHIDZIWISO 14 Bible Online

CHIDZIWISO 14 - cisena bible

CHIDZIWISO 14

¹Kubuluka penepo ndidayang'ana mbandiona Mwanabira aimira paphiri ya Zioni. Pabodzi na iye pakhali anthu pikwi dzana na makumanayi na pinayi. Enewa mbanthu akukhala na chidindo cha dzina ya Mwanabira, pontho na dzina ya Babache papipumu pawo.

²Ndidava fala yakubulukira kudzulu yakuveka ninga kukuka kwa madzi pamatiti, pontho ninga kuguma kwa chiphaliwali. Idaveka ninga nyimbo zakuimbwa na anyakuimba anyakatangale.

³Anthu ale adaimba nyimbo yachinchino patsogolo pampando wachifumu, pontho pamaso pa pyakulengwa pyamoyo pinayi na akulu-akulu. Nkhabe na mbodzi ene adakwanisa kufunza nyimboyo tayu kupambula anthu pikwi dzana na makumanayi na pinayi, adaombolwa pakati pa anthu onsene ale.

⁴Enewa akhali amuna ale adakhonda kupiipisa okha ene na akazi; iwo akhakhala ninga amiyali okhonda dziwa mamuna.[6] Ambatewera Mwanabira konsene kunaenda iye. Iwo adaombolwa pakati pa anthu onsene mbaperekwa ninga pyakuvuna pyakutoma kuna Mulungu na kuna Mwanabira.

⁵Iwo hadagumanwe akulonga chakunama na chibodzi chene tayu, pontho nkhabe chinthu chakuapokonya tayu.

⁶Kubuluka penepo ndidaona mngelo unango akumbuluka chidzulu-dzulu na Mphangwa Zadidi zokhonda mala kuzilalika kuna anthu a padziko yapansi, anthu a mitundu, madziko, madzinza na pilongero pyonsene.

⁷Adalonga mwakugaluza fala mbati, “Gopani Mulungu na kukuza ukulu wache! Thangwi ndzidzi wafika wakuti atonge anthu mseru. Pembedzani iye, nyakulenga kudzulu, dziko yapansi, bara na mphuno za madzi!”

⁸M'nduli mwa mngelo wakutoma ule, mngelo wachiwiri adalonga mbati, “Wagwa! Mzinda wa Babiloni ukulu wagwa! Iye adamwesa madzinza onsene vinyu wakuwawa, vinyu wakuwawa wa pikhumbo pyache pyakuzuda!”

⁹M'nduli mwa angelo awiri adatumwa ale, mngelo wachitatu adalonga mwakugaluza fala mbati, “Nyakupembedza chirombo na mfanikizo wache mbatambira chidindo pachipumu pache, penu m'manja mwacheyo

¹⁰anamwa yekha ene vinyu wa ukali wa Mulungu, vinyuyo adatsanyulira iye na mphamvu zache zonsene m'khomitcho ya ukali wache. Onsene anachita penepi anabonereswa na moto pontho sulufule pamaso pa angelo akuchena na Mwanabira.

¹¹Utsi wa moto wakuaboneresa umbakhala tolo-tolo kwenda na kwenda. Anyakupembedza chirombo na mfanikizo wache mbakhala na chidindo cha dzinache, nkhabe puma tayu mosiku na masikati.”

¹²Penepa panafunika kupirira maka-maka kuna anthu ache a Mulungu, ale ambakoya matongero a Mulungu mbakukhulupirika kuna Yesu.

¹³Tenepo ndidava fala yakubulukira kudzulu kulonga kuti, “Ulembe kuti: Ngakutsanzaya ale kutoma chinchino kwenda m'tsogolo, anafa mbali kuphata basa ya Mbuya!” Mzimu Wakuchena atawira mbati, “Andedi! Anakomerwa na kupuma kuna mabasawo akuwanga akhaphata iwo, thangwi udidi wa mabasawo anaenda nawo pabodzi pene.”

¹⁴Kubuluka penepo ndidayang'ana mbandiona makole akuchena. Pamakolepo padakhala unango wakuoneka ninga munthu. Iye adavala chipewu chachifumu cha golidi mumsolo mwache. M'manja mwache akhali na chikwakwa chakutwa.

¹⁵Padadza pontho mngelo unango wakubulukira ku Nyumba ya Mulungu mbalonga mwakugaluza fala kuna ule adakhala pamakole mbati, “Phatisa basa chikwakwa chako uvune, thangwi ndzidzi wafika; pinthu pya padziko yapansi pyatokota kuti pivunwe!”

¹⁶Natenepo ule adakhala pamakole adaphatisa basa chikwakwa chache mbavuna pyonsene pya padziko yapansi.

¹⁷Kubuluka penepo ndidaona mngelo unango akubuluka m'Nyumba ya Mulungu kudzulu, iyembo akhali nacho chikwakwa chache chakutwa.

¹⁸Tenepo mngelo unango wakuyang'anira moto adadza kubulukira pa guwa yansembe. Iye adakhuwa mwakugaluza fala kuna mngelo akhali na chikwakwa chakutwa ule mbati, “Phatisa basa chikwakwa chako, ugwande mfesa zakubulukira m'minda yamfesa ya padziko yapansi thangwi mfesa zatokota!”

¹⁹Natenepo mngelo adaphatisa basa chikwakwa chache chakutwa chile padziko yapansi mbavuna mfesa mbaziponyera pachakutchitchithira vinyu chikulu cha ukali wa Mulungu.

²⁰Mfesa zidapondedzwa m'dzenje yakutchitchithira vinyu ile kunja kwa mzinda, pontho chiropa chidatayikira kufikirana mathanyo pikwi madzana matatu mbachikwira na makhono mawiri.