Read cisena CHIDZIWISO 16 Bible Online

CHIDZIWISO 16 - cisena bible

CHIDZIWISO 16

¹Tenepo ndidava fala yakugaluza kulonga kuna angelo anomwe ale kubulukira m'Nyumba ya Mulungu kuti, “Ndoko kakhuthule ndilo zinomwe za ukali wa Mulungu padziko yapansi!”

²Mngelo wakutoma adenda mbakakhuthula ndilo yache padziko yapansi. Pironda pyakugoswa na pyakupha pidabuluka m'manungo mwa ale akhali na chidindo cha chirombo na mwa ale adapembedza mfanikizo wache.

³Tenepo mngelo wachiwiri adakhuthulambo ndilo yache pabara. Madzi adasanduka ninga chiropa cha munthu wakufa. Tenepo pinthu pyonsene pyamoyo pidafa m'baramo.

⁴Mngelo wachitatu adakhuthula ndilo yache m'mikulo na m'mphuno za madzi; madzi ache adasanduka chiropa.

⁵Ndidava mngelo wakuyang'anira madzi kulonga mbati, “Kutonga mseru kwachita imwe nkhwakulungama. Imwe nyakuchena, ndimwe ule alipo chinchino, pontho ule akhalipo kale!

⁶Anthu enewa adachuchisa chiropa cha anthu a Mulungu na cha maprofeti, natenepo mwaapasambo chiropa kuti amwe. Tenepo akutambira pyakuthemerana na pidachita iwo.”

⁷Penepo ndidava fala yakubulukira pa guwa yansembe kulonga kuti, “Mbuya Mulungu Wamphamvu zonsene, kutonga kwanu mseru nkhwakuonadi pontho kwakulungama!”

⁸Tenepo mngelo wachinayi adakhuthulira ndilo yache padzuwa. Dzuwayo idatawiriswa kuti ipise anthu na moto wache.

⁹Iwo adapiswa na kupisa kwakugoswa, tenepo anthu ale adatemberera Mulungu, ule ana utongi pamiliri yeneyi. Kwache iwo hadaleke pyakudawa pyawo mbakuza Mulungu tayu.

¹⁰Tenepo mngelo wachishanu adakhuthulira ndilo yache pampando wachifumu wa chirombo. Mdima udagwera ufumu wa chirombo. Anthu adadzadzada malulume awo thangwi ya kuva kwawo kupha.

¹¹Iwo adatemberera Mulungu wa kudzulu thangwi ya pironda na kuva kwawo kupha. Kwache iwo hadaleke pyakudawa pyawo tayu.

¹²Tenepo mngelo wachitanthatu adakhuthulira ndilo yache pamkulo ukulu wa Yufurate. Mkulo udauma kupereka njira kuna mafumu akubulukira kumabulukiro dzuwa.

¹³Tenepo ndidaona mizimu mitatu yakuipa ile idaoneka ninga anyanchidwe. Mizimu yeneyi ikhabulukira m'kanwa mwa nthonga, m'kanwa mwa chirombo na m'kanwa mwa mprofeti wakunama.

¹⁴Yeneyi ndi mizimu mitatu yakuipa, ile imbachita pyakudodomesa. Mizimuyi imbaenda kuna mafumu a padziko yonsene yapansi kugumanyisa mafumu onsene pabodzi kudzamenya nkhondo pa Nsiku ikulu ya Mulungu Wamphamvu zonsene.

¹⁵Mbuya akulonga kuti, “Ngavani! Ndikudza ninga mbava! Ngwakutsanzaya ule anakhala m'maso mbakoya nguwo zache chifupi na iye, towera akhonde dzafamba chipezi-pezi mbachita napyo manyadzo!”

¹⁶Tenepo mizimu ile idagumanyisa mafumu onsene ale pabodzi pene pambuto yakuchemerwa Aramagedo.[8]

¹⁷Kubuluka penepo mngelo wachinomwe adawazira ndilo yache m'dzulu. Fala yakugaluza idaveka kubulukira kumpando wachifumu m'Nyumba ya Mulungu kulonga kuti, “Pyamala!”

¹⁸Pakhali kuchetuma kwa njazi, mungu na kuguma kwa chiphaliwali, pontho chiteke-teke chakugoswa. Chipo nkhabe chiteke-teke chinango chakukhala ninga chenechi chidachitika kutomera kulengwa kwa munthu tayu; chenechi chikhali chakugoswa pyakwanga kupiringana pyonsene.

¹⁹Mzinda ukulu udagawikana m'mapindi matatu. Mizindambo ya madziko onsene idavungika. Mulungu adakumbuka mzinda ukulu wa Babiloni mbaumwesa vinyu wa m'khomitcho mwache, vinyu wa ukali wache wakugoswa.

²⁰Ntchuwa zonsene zidabisika; mapiri onsene adamala fudzika.

²¹Matalala akulu-akulu, akulemera ninga makilogramu makumashanu na ibodzi adagwera anthu kubulukira kudzulu. Tenepo iwo adatemberera Mulungu thangwi ya miliri ya matalalawo, podi miliri ikhali yakugoswa pyakwanga.