Read cisena CHIDZIWISO 17 Bible Online

CHIDZIWISO 17 - cisena bible

CHIDZIWISO 17

¹Mngelo mbodzi mwa angelo anomwe adathukula ndilo zinomwe ale adadza kuna ine mbalonga mbati, “Bwera ndikuonese kutchunyuswa kunafuna dzachitika kuna puta wakuveka, ule ndi mzinda ukulu wakumangwa pakati pa mikulo mizinjiyi.

²Mafumu a dziko yapansi adachita uputa na mzinda wenewu. Anthu a dziko yapansi adaledzereswa na vinyu wa uputache.”

³Mzimu Wakuchena adandigudumira, mngelo mbandithukula kwenda nane kuthando yatchetcha. Kweneko ndidaonako mkazi akhala pamsana pa chirombo chakufira chile chidalembwa madzina akushola Mulungu m'manungo mwache monsene; chirombo chenechi chikhali na misolo minomwe na nyanga khumi.

⁴Mkazi ule adavala pyamsuzi wanyemba na pyakufira mbampsampsirwa na golidi, miyala yakubalika pontho na usanga wakudula. M'manja mwache adaphatirira khomitcho ya golidi yakudzala na pyakuipa na pyakunyansa, pinthu pyauputa pidachita iye pile.

⁵Pachipumu pache padalembwa dzina yakuzimbaisa yakulonga kuti, “Babiloni, mzinda ukulu iwe, mama wa maputa onsene, pontho wa pyakunyansa pyonsene pya dziko yapansi.”

⁶Tenepo ndidaona kuti mkaziyo akhadaledzera na chiropa cha anthu a Mulungu, pontho na chiropa cha anthu onsene adaphiwa thangwi ya kukhala akukhulupirika kuna Yesu. Pidaona ine mkazi ule, ndidadodoma pyakwanga.

⁷Natenepo mngelo ule adandivunza mbati, “Unadodomeranji? Ine ndinakutchululira pyakubisika pyache pya mkazi weneyu, na chirombo chapakira iye, chakukhala na misolo minomwe na nyanga khumichi.

⁸Chirombo chidaona iwe chile, chikhali na moyo kale ene, mbwenye chinchino nkhabeve moyo tayu. Kwache chinabuluka ku Chiphompho chikulu mbachienda kavungwa. Anthu akukhala padziko yapansi ale madzina adakhonda lembwa m'bukhu ya moyo kutomera kulengwa kwa dziko yapansi, anadodoma angachiona chirombochi, chile chikhali na moyo kale ene, mbwenye chinchino nkhabeve moyo tayu, kwache chinaoneka pontho.

⁹“Penepa panafunika nzeru na kuvesa mwadidi. Misolo minomwe ile ndi mapiri manomwe panakhala mkazi ule, pontho enewa ndi mafumu manomwe.

¹⁰Pakati pa mafumu enewa mashanu adagwa, mbodzi akutonga, mbwenye unangoyo hadzati fika tayu. Kwache angafika anakhala kwene ndzidzi wakuchepa.

¹¹Mbwenye chirombo chile chikhali na moyo kale ene, mbwenye chinchino nkhabeve moyo tayu, chenecho maka ndiye mfumu wachisere. Kwache weneyu ndi mbodzi wa gulu ya mafumu manomwe ale, pontho akwenda kavungwa.

¹²“Nyanga khumi zaona iwe zile ndi mafumu khumi, ale hadzati toma kutonga tayu, mbwenye anapaswa utongi ninga mafumu pabodzi na chirombo paora ibodzi basi.

¹³Chakufuna cha onsene khumiwa ntchibodzi chene, tenepo iwo anapasa chirombo mphamvu pabodzi na utongi wawo.

¹⁴Iwo anamenya nkhondo na Mwanabira; kwache Mwanabira pabodzi na anthu ache akuchemerwa, akusankhulwa na anyakumtewerache akukhulupirika anakunda chirombo thangwi Mwanabira ndi Mbuya wa ambuya, pontho Mfumu wa mafumu.”

¹⁵Mngelo adandipanga pontho mbati, “Madzi aona iwe ale, pale pakhala puta, ndi madziko, madzinza, mitundu ya anthu na pilongero pyawo.

¹⁶Nyanga khumi zaona iwe zile pontho chirombo chile pinazonda putayo. Anampokosera pyonsene pina iye mbamsiya chipezi-pezi. Anamdya manungo ache mbampisa na moto.

¹⁷Thangwi Mulungu aikha manyerezero mumtima mwawo kuchita pinthu pinafuna iye kuti iwo aphatizane pyakupereka mphamvu zawo zakutonga nazo kuna chirombo kufikirana mafala a Mulungu akwane-kwane.

¹⁸“Mkazi aona iwe ule ndi mzinda ukulu ule akutonga mafumu a padziko yapansi.”