Read cisena CHIDZIWISO 18 Bible Online

CHIDZIWISO 18 - cisena bible

CHIDZIWISO 18

¹Pidamala penepi ndidaona mngelo unango akutchitha kudzulu. Iye akhali na utongi ukulu, pontho cheza chache chidamwinikira dziko yonsene yapansi.

²Adakhuwa na fala yamphamvu mbati, “Wagwa! Mzinda ukulu wa Babiloni wagwa! Asanduka mbuto yakukhala mizimu yakuipa, mbuto yakuthawirako mizimu yonsene yakuipa, pontho mbuto zakuthawira mbalame zonsene zakunyansa na zakuipa zene.

³Thangwi adaledzeresa madzinza onsene a anthu na vinyu wa pyakuzuda pyache. Mafumu a padziko yapansi adachita naye pyauputa. Anyamalonda onsene a padziko yapansi adafuma na madyaidyache akuinjipa.”

⁴Kubuluka penepo ndidava fala inango yakubulukira kudzulu kulonga kuti, “Imwe anthu anga, bulukanimo mumzindamo, towera muleke kwata khundu pa pyakudawa pyache, pontho towera muleke gwerwa na miliri inaona iyeyo.

⁵Thangwi pyakudawa pyache ndi mulu ukulu wakuphata kudzulu, pontho Mulungu akumbuka mabasache akuipa.

⁶Mbwezereni pidakuchitanimbo iye; mbwezereni kawiri papinthu pyonsene pidakuchitirani iye. Mdzazireni kawiri khomitcho yache na vinyu wakuwawa ninga adakusasanyirani iye ule.

⁷Msanyiseni na kumchitisa kutsukwala pikulu pene kuthemerana na demelero idapipasa iye yekha ene, pontho na madyaidya akhachita iye. Iye ambadungudza mumtima mwache kuti, ‘Ine mfumu, ndakhala pampando! Si ineve mamfelwa tayu, pontho ine nkhabeve dzasintili tayu.’

⁸Na thangwi yeneyi nsiku inango iye anagwerwa na miliri, utenda, kutsukwala na njala ikulu. Anapiswa moto, thangwi Mbuya Mulungu, nyakumtonga mseru ule, ngwamphamvu zikulu.”

⁹Mafumu a padziko yapansi adachita naye uputa na madyaidya ale analira na kusintili mzindawu iwo angaona utsi wa kupiswa kwa mzindawu.

¹⁰Na mantha na mantha thangwi ya kubonera kunafuna dzachita mzindawu, anaimira kutali mbalira mbati, “Dzedze, una dzedze! Babiloni, mzinda ukulu, pontho wamphamvu! Thangwi watchunyuswa paora ibodzi ene basi!”

¹¹Anyamalonda a padziko yapansi analira na kusintili mzindawu thangwi nkhabe munthu anagula pontho malondawo,

¹²malondawo a golidi, siliva, miyala yakudula na usanga, nguwo zakuchena, zamsuzi wanyemba, zakufewa, zakufira; mitundu yonsene ya miti yokhonda oneka-oneka, pontho na pinthu pyakusasanywa na nyanga za nzowu, pontho pyakusasanywa na miti yakudula; na pinthu pyakusasanywa na mkuwa, masimbi na miyala yakubalika;

¹³pyakukomesera pyakudya pya mtundu na mtundu, pyakununkhira, mure, libano; vinyu na mafuta, ufa, pontho tirigu; ng'ombe na mabira, akavalo na pingolo, mabitchu podi na moyo wa anthu ene.

¹⁴Anyamalonda ale akulonga kuna mzindawu mbati, “Pyakudzipa pikhathanda mtimako pyakumalira. Mfumako na demelero yako konsene kwakumalira, pontho hunapigumanave tayu!”

¹⁵Anyamalonda ale adagulisa pinthu penepi mbafuma napyo kubulukira mumzindawu, anaimira kutali kugoswerwa na nyatwa inaona mzindawo. Analira na kusintili

¹⁶mbati, “Dzedze, una dzedze, Mzinda ukulu! Ukhavala nguwo zakuchena, zakufira na zamsuzi wanyemba, mbupithemesera manungo ako onsene na golidi, miyala yakudula na usanga!

¹⁷Mfuma yonseneyi yavungwa paora ibodzi ene basi!” Akadamu onsene a miyadiya pa bara, onsene anyakufamba pamiyadiyayo, anyakuifambisa, na onsene anyakuganyali na barayo anaimira kutali.

¹⁸Angaona utsi wa kupiswa kwa mzindawo, anakhuwa mbati, “Ayi ukhalipo mzinda unango ukulu ninga wenewu?”

¹⁹Anakapira fumbi pamsolo pawo mbalira na kusintili mbati, “Dzedze, una dzedze, Mzinda ukulu. Kweneku nkhule kudafumisa onsene akukhala na miyadiya pabara kudzera muna mfumache! Avungwa paora ibodzi ene basi!”

²⁰Komerwani imwe kudzulu, thangwi ya kuvungika kwa mzindawu. Komerwani imwe anthu a Mulungu, anyakutumwa na maprofeti, thangwi Mulungu autchunyusa mzindawu thangwi ya pinthu pidakuchitanimbo iye!

²¹Tenepo mngelo unango wamphamvu adathukula chimwala, kukulu kwache ninga libwe ikulu. Adaponya chimwala chile m'bara mbalonga mbati, “Uku ndiye kuponywa pansi kwamphamvu kunafuna dzachitwa Babiloni, mzinda ukulu ule, mbukhonda dzaoneka pontho.

²²Muna iwe nkhabe dzaveka pontho kuimba kwa anyakatangale, kuimba kwa anthu, anyakuimba pitoliro na anyakuliza ngoma tayu. Muna iwe nkhabe misiri waluso anafuna dzakhala mwenemo pontho tayu. Muna iwe nkhabe dzaveka pontho kupeya pamalibwe tayu!

²³Cheza cha nyale nkhabe dzakumwinikira pontho tayu. Fala ya anyakukazhali nkhabe dzaveka pontho muna iwe tayu. Anyamalondako akhali anthu akuveka konsene kwene padziko yapansi, pontho ukhanyengeza anthu a madzinza onsene na matsengako!”

²⁴Chiropa cha maprofeti, anthu akuchena a Mulungu, na anthu onsene adaphiwa padziko yapansi chidagumanwa mumzinda wenewu.