Read cisena CHIDZIWISO 19 Bible Online

CHIDZIWISO 19 - cisena bible

CHIDZIWISO 19

¹Pidamala penepi ndidava kubuma kwa mwinji ukulu wa anthu kudzulu kulonga mbati, “Kuzani Mulungu! Chipulumuso, demelero na mphamvu mphyache pya Mulungu wathu!

²Kutonga kwache mseru nkhwakuonadi, pontho kwakulungama. Iye akonwesa puta wamkulu, ule adaipisa dziko yapansi na uputache. Mulungu amtchunyusa kubwezera chiropa cha anyabasache.”

³Iwo adakhuwa pontho mbati, “Kuzani Mulungu! Utsi wakupiswa kwa mzinda ule, ukhali tolo-tolo kwenda na kwenda!”

⁴Akulu-akulu makumawiri na anayi pabodzi na pyakulengwa pyamoyo pinayi pile, adalamba mbapembedza Mulungu ule adakhala pampando wachifumu. Iwo adakhuwa mbati, “Ameni! Kuzani Mulungu!”

⁵Tenepo fala idaveka kubulukira pa mpando wachifumu ule kulonga kuti, “Kuzani Mulungu wathu, imwe anyabasache monsene, na imwe anyakumgopa, mkulu penu mwana!”

⁶Tenepo ndidava chinango chakuveka ninga mwinji ukulu wakukhala ninga kutitima kwa madzi pamatiti, pontho ninga kuguma kukulu kwa chiphaliwali mbukhuwa kuti, “Kuzani Mulungu! Thangwi Mbuya Mulungu wathu Wamphamvu zonsene ndi Mfumu!

⁷Tendeni tikomerwe na kusekera; tendeni tikuze ukulu wache! Thangwi kukazhali kwa Mwanabira kwafika. Nyakufuna iye kukazhali naye amala kale sasanyika.

⁸Mkaziyo apaswa nguwo zakuchena zakuyetima kuti avale.” Nguwo zakuchena zikuimirira mabasa akulungama a anthu a Mulungu.

⁹Tenepo mngelo adalonga kuna ine mbati, “Lemba ipi: Ngakutsanzaya ale achemerwa kuti adye nawo phwando ya kukazhali ya Mwanabira.” Iye adathimiza kulonga mbati, “Enewa ndi mafala akuonadi a Mulungu.”

¹⁰Penepa pokha ndidagwa pansi pamanyalo ache kumpembedza, mbwenye iye adalonga kuna ine mbati, “Leka chita tenepo! Ine ndi nyabasa mwanzako wa iwe na abale ako, ale adakhulupira pyakuonadi pidatchulula Yesu pile. Pembedzani Mulungu! Thangwi pyakuonadi pidatchulula Yesu ndiye pimbapepesera maprofeti.”

¹¹Tenepo ndidaona kudzulu kwafunguka, mbandionako kavalo wakuchena. Nyakumpakira ambachemerwa Nyakukhulupirika pontho Nyakuonadi; iye ambatonga mseru na kumenya nkhondo pakuphatisa basa chilungamo.

¹²Maso ache akhali ninga malulume a moto, mbavala pipewu pyachifumu pizinji. Pamanungo pache padalembwa dzina yokhonda dziwika kuna unango, mbwenye iye yekha ene basi.

¹³Mkhanjo udavala iye udavikwa m'chiropa. Dzinache ndi Mafala a Mulungu.

¹⁴Anyankhondo a kudzulu akupakira akavalo akuchena uku avala nguwo zakuchena zakuyetima adamtewera.

¹⁵M'kanwa mwache mudabuluka talasada yakutwa, ile inafuna iye dzakunda nayo madzinza. Iye anatonga na mthondodzo wachisimbi mbapondedza mfesa m'dzenje yakutchitchithira vinyu wa ukali wakugoswa wa Mulungu Wamphamvu zonsene.

¹⁶Pamkhanjo wache na pantchafu pache padalembwa dzina yakuti, “Mfumu wa mafumu, na Mbuya wa ambuya.”

¹⁷Tenepo ndidaona mngelo aimira padzuwa. Adakhuwa mwakugaluza fala mbapanga mbalame zonsene zakumbuluka m'dzulu mbati, “Gumanyikanani pabodzi kuti mudzadye phwando ikulu ya Mulungu!

¹⁸Bwerani mudzadye manungo a mafumu, akadamu ankhondo, anyankhondo, nyama ya akavalo na manungo a anyakuapakira, pontho manungo a anthu onsene, mabitchu na atumbe, mkulu penu mwana!”

¹⁹Tenepo ndidaona chirombo na mafumu a dziko yapansi pabodzi na anyankhondo awo agumanyikana pabodzi kuti amenyane na ule adapakira kavalo wakuchena pabodzi na anyankhondo ache.

²⁰Mbwenye chirombo chidamangwa uperezo pabodzi na maprofeti akunama ale adachita pyakudodomesa pamaso pache. Na pyakudodomesa adanyengeza napyo anthu ale adadindwa chidindo cha chirombo mbapembedza mfanikizo wa chirombocho. Chirombo chile pabodzi na maprofeti akunama adaponywa amoyo m'nyanza ya moto wa sulufule.

²¹Anyankhondo awo adaphiwa na talasada yakutwa yakubulukira m'kanwa mwa nyakupakira kavalo ule. Mbalame zonsene zidadya manungo awo ninga mukhafunira izo.