Read cisena CHIDZIWISO 20 Bible Online

CHIDZIWISO 20 - cisena bible

CHIDZIWISO 20

¹Tenepo ndidaona mngelo akutchitha kudzulu. M'manja mwache adaphatirira mfungulo wa Chiphompho chikulu na njema zakulemera.

²Adaphata nthonga, nyoka yakale ile dzinache ndi Nyakuipa, penu Satana, mbachimanga uperezo pyaka chikwi chibodzi.

³Iye adachiponya ku Chiphompho chikulu, adachifungira mbazwirimitha kuti chileke dzanyengeza madzinza pyaka chikwi chibodzi. Pyaka chikwi pingagwanda anasudzulwa pandzidzi wakuchepa.

⁴Natenepo ndidaona mipando yachifumu, pontho anyakuikhalira adapaswa mphamvu zakutonga nazo mseru. Ndidaona pontho mizimu ya anthu ale adagwandwa msolo thangwi yakulalika pyakuonadi pidatchulula Yesu pile, pontho na thangwi ya kulalika mafala a Mulungu. Enewa hadapembedza chirombo, penu mfanikizo wache ule tayu, pontho adakhonda kudindwa chidindo chile papipumu penu m'manja mwawo. Adalamuka kuimfa mbatonga dziko pabodzi na Khristu pyaka chikwi chibodzi.

⁵Anyakufa anango onsene hadalamuke kuimfa tayu kufikirana pyaka chikwi chibodzi pile pidagwanda. Kweneku nkhulamuka kuimfa kwakutoma.

⁶Ngakutsanzaya, pontho ngakupambulika ale analamuka na anthu pakulamuka kuimfa kwakutomaku. Imfa yachiwiri inakhala nkhabe mphamvu pana iwo tayu. Enewa anakhala anyansembe a Mulungu na Khristu, mbatonga pabodzi na iye pyaka chikwi chibodzi.

⁷Pyaka chikwi chibodzi pingamala, Satana anasudzulwa pauperezo wache

⁸mbaenda kanyengeza madzinza a mphepo zonsene zinayi za dziko yapansi, madzinza enewa ndi Gogi na Magogi. Satana anaagumanyisa pabodzi pene onsene kwenda kamenya nkhondo. Iwo anakhala akuinjipa ninga tchetcha ya pagombe ya bara.

⁹Iwo adamwazikana padziko yonsene yapansi mbazungulira msasa wa anthu a Mulungu na mzinda wapamtima pache. Mbwenye moto udatchitha kudzulu mbuavunga.

¹⁰Tenepo Satana, nyakuanyengeza ule, adaponywa m'nyanza ya moto wa sulufule, kule kudaponywa kale chirombo pabodzi na mprofeti wakunama. Iwo anakhala akubonereswa mosiku na masikati kwenda na kwenda.

¹¹Tenepo ndidaona mpando ukulu wakuchena wachifumu na nyakuukhalirache. Dziko yapansi na kudzulu idathawa pamaso pache mbaikhonda oneka pontho.

¹²Pontho ndidaona anthu akufa, mkulu penu mwana, aimira patsogolo pampando wachifumu. Mabukhu adafungulwa, kubuluka penepo bukhu inango idafungulwambo, ikhali bukhu ya moyo. Anyakufa adatongwa mseru malingana na mabasa akhadaphata iwo ninga mudalemberwa iwo m'mabukhu mule.

¹³Tenepo bara idabulusa anyakufa mwenemo. Imfa na dziko ya anyakufa idabulusambo anyakufa akhakoya iwo. Tenepo onsene adatongwa mseru malingana na mabasa akhadaphata iwo.

¹⁴Tenepo imfa na dziko ya anyakufa pidaponywa m'nyanza ya moto. Nyanza ya motoyi ndi imfa yachiwiri.

¹⁵Onsene adakhonda lembwa madzinawo m'bukhu ya moyo adaponywa m'nyanza ya moto.