Read cisena CHIDZIWISO 22 Bible Online

CHIDZIWISO 22 - cisena bible

CHIDZIWISO 22

¹Mngelo adandionesa pontho mkulo wa madzi akupasa moyo. Akhayetima ninga mwala wa khulustali, kukuka kubulukira pa mpando wachifumu wa Mulungu pontho wa Mwanabira.

²Ukhatchithira pakati na kati pa msewu wa mumzinda mule. Makhundu onsene mawiri a mkulo ule akhali na muti wakupasa moyo. Muti wenewu ukhabala nsapo kakhumi na kawiri pachaka, kabodzi pamwezi. Masambache ngakuwangisa nawo madzinza.

³Nkhabe chibodzi chakutembererwa na Mulungu chinafuna dzagumanwa mumzindamu tayu. Mpando wachifumu wa Mulungu pontho wa Mwanabira unakhala mumzindamu, anyabasachembo anampembedza.

⁴Iwo anaona nkhope yache, pontho dzinache inalembwa papipumu pawo.

⁵Panakhala nkhabeve mosiku, pontho iwo nkhabe dzafuna nyale, penu cheza cha dzuwa tayu, thangwi Mbuya Mulungu anakhala cheza chawo, pontho iwo anatonga ninga mafumu kwenda na kwenda.

⁶Tenepo mngelo adalonga kuna ine mbati, “Mafala enewa ngakuonadi, pontho anakwanisa kunyindirwa. Mbuya Mulungu ambapasa maprofeti Mzimu wache ule, atumiza mngelo wache kudzaonesa anyabasache pinthu pyathema dzachitika chinchino pano.”

⁷Yesu alonga mbati, “Ngavani! Ndikudza chinchino pano! Ngakutsanzaya ale ambavera mafala auprofeti a m'bukhumu!”

⁸Ine pano, Yohani, ndava na kupiona pinthu penepi. Pidamala ine kupiva na kupiona, ndidalamba pamaso pa mngelo adandionesa pinthu penepi ule. Ndikhali chifupi kumpembedza,

⁹mbwenye iye adandipanga mbati, “Leka chita penepi! Ndine nyabasa mwanzako pontho wa abale ako maprofeti, pontho na ale onsene ambavera mafala a m'bukhu yeneyi. Pembedza Mulungu!”

¹⁰Tenepo adandipanga mbati, “Leka kubisa mafala auprofeti a m'bukhuyi, thangwi ndzidzi wakuti pinthu pyonsenepi pichitike uli chifupi.

¹¹Nyakuchita pyakuipa mbachite pyache pyakuipapyo. Nyakunyansa mbakhale pyache wakunyansa. Nyakulungama mbathimize kukhala wakulungama. Nyakuchena mbathimize kukhala wakuchena.”

¹²Yesu alonga mbati, “Ngaveserani! Ndikudza chinchino pano! Ndinabwera na mfupo yanga kupasa kada munthu malingana na mabasa akhaphata iye.

¹³Ndine Alefa pontho Omega, nyakutoma na nyakumalisa, kutoma na kumalisa.”

¹⁴Ngakutsanzaya ale afula mikhanjo yawo, towera akhale na utongi kudya nsapo za muti wakupasa moyo mbapita mumzinda na pamsuwo.

¹⁵Mbwenye kunja kwa mzinda kuna anyakuchita pyaunambwa, anyamatsenga, anyakuchita pyakuzuda, mphandu, anyakupembedza mifanikizo na ale kunama nkhudya kwawo na pyakuchita pyawo pene.

¹⁶“Ine, Yesu, ndatuma mngelo wanga kudzachitira umboni pya pinthu penepi kuna imwe m'mipingo. Ndine chidzukulu cha dzinza ya Davite. Ine ndine nthanda.”

¹⁷Mzimu Wakuchena na mwali wakufuna kukazhali alonga mbati, “Bwera!” Onsene anapiva alongembo mbati, “Bwera!” Mbadze anyakuva nyota; anapifunayo atambire mwakukhonda pagali madzi akupasa moyo.

¹⁸Ine Yohani ndikucheuza onsene anava mafala auprofeti a m'bukhumu: ngakhala unango anathimizira chinango pamafala enewa, Mulungu anamthimizirambo miliri yalembwa m'bukhumu.

¹⁹Ngakhala unango anabulusa chinthu pa mafala auprofeti m'bukhumu, Mulungu anambulusirambo khundu yache pamuti wakupasa moyo na ya Mzinda Wakuchena unalongwa m'bukhumu.

²⁰Nyakuchitira umboni pyonsenepi alonga mbati, “Andedi! Ndikudza chinchino pano!” Pikhale tenepo. Idzani Mbuya Yesu!

²¹Kukoma mtima kwa Mbuya Yesu mbakukhale na anthu onsene a Mulungu.[10] Ameni.