Read cisena CHIDZIWISO 5 Bible Online

CHIDZIWISO 5 - cisena bible

CHIDZIWISO 5

¹Ndidaona mpukutu kudzanja yamadyo ya nyakukhala pampando wachifumu ule. Mpukutu ule ukhali na pyakulembwa khundu zonsene ziwiri mbumyatirirwa na pyakumyatira pinomwe.

²Ndidaona mngelo wamphamvu akuvunza mwakugaluza fala mbati, “Mbani athema kukanandula pyakumyatira kufungula mpukutuwu?”

³Mbwenye kudzulu, penu padziko yapansi na dziko ya pansi pamataka[3] pakhali nkhabe munthu na mbodzi ene wakukwanisa kufungula mpukutu ule mbayang'ana m'bwalo mwache tayu.

⁴Ndidalira pikulu pene thangwi pakhali nkhabe munthu na mbodzi ene wakuthema kufungula mpukutu ule mbayang'ana m'bwalo mwache.

⁵Natenepo mbodzi wa akulu-akulu ale adalonga kuna ine mbati, “Leka kulira. Yang'ana! Nkhalamu yakubulukira kudzinza ya Yuda, Chidzukulu cha Davite, nyakukunda ule, ndiye anakwanisa kukanandula pyakumyatira pinomwepi mbafungula mpukutuwo.”

⁶Penepo ndidaona Mwanabira aimira pakati na kati pa mpando wachifumu wakuzungulirwa na pyakulengwa pyamoyo pinayi pontho na akulu-akulu. Mwanabira adaoneka ninga akhadaphiwa. Akhali na nyanga zinomwe, pontho maso manomwe, yeneyi ndi mizimu minomwe ya Mulungu yakutumizwa padziko yonsene yapansi.

⁷Mwanabira adenda mbakakwata mpukutu ukhali m'dzanja yamadyo ya nyakukhala pampando wachifumu ule.

⁸Pidachita iye tenepo, pyakulengwa pyamoyo pinayi pile pabodzi na akulu-akulu makumawiri na anayi ale adalamba pamaso pa Mwanabira. Onsene akhali na nyakatangale na ndilo za golidi zakudzala na pyakununkhira, pile nkhupemphera kwa anthu a Mulungu.

⁹Iwo adaimba nyimbo yachinchino mbati, “Ndimwe mwathema kukwata mpukutu mbamukanandula pyakumyatira pyache kuufungula. Thangwi imwe mudaphiwa, tenepo na imfanu ninga nsembe mudagulira Mulungu anthu a madzinza, malongero, madziko na mitundu yonsene.

¹⁰Imwe mwaachitisa kukhala dzinza yachifumu, pontho anyansembe kuphatira basa Mulungu wathu, pontho iwo anatonga padziko yapansi.”

¹¹Ndidayang'ana pontho mbandiva angelo pikwi-pikwi, mwinji okhonda lengeseka! Iwo adaimira mwakuzungulira mpando wachifumu, pyakulengwa pyamoyo pinayi pile na akulu-akulu ale

¹²mbaimba mwakugaluza fala mbati, “Mwanabira akhadaphiwa ule athema kutambira mphamvu, mfuma, nzeru, mboko, chilemedzo, demelero na ukulu!”

¹³Penepo ndidava pyakulengwa pyonsene pyakudzulu, pya dziko yapansi, pya dziko ya pansi pamataka na pya m'bara, pyakulengwa pyonsene pyamoyo pikhaimba kuti: “Kuna nyakukhala pampando wachifumu, pontho na kuna Mwanabira kukhale ukulu, chilemedzo, demelero na mphamvu kwenda na kwenda!”

¹⁴Pyakulengwa pyamoyo pinayi pile pidatawira kuti, “Ameni!” Penepo akulu-akulu ale adalamba mbapembedza.