Read cisena CHIDZIWISO 6 Bible Online

CHIDZIWISO 6 - cisena bible

CHIDZIWISO 6

¹Tenepo ndidaona Mwanabira akukanandula chakumyatira chakutoma papinomwe pile, pontho ndidava fala ya chibodzi cha pyakulengwa pyamoyo pinayi pile kulonga ninga chiphaliwali kuti, “Bwera!”

²Ndidayang'ana mbandionapo kavalo wakuchena. Nyakupakira kavalo ule akhaphatira uta. Iye adapaswa chipewu chachifumu, tenepo adabuluka mbaenda ninga nyakukunda kwenda kakunda.

³Kubuluka penepo Mwanabira adakanandula chakumyatira chachiwiri; ndidava chakulengwa chamoyo chachiwiri kulonga kuti, “Bwera!”

⁴Kavalo unango adabuluka, weneyu akhali wakufira. Nyakupakira kavalo weneyu adapaswa mphamvu zakubulusa mtendere padziko yapansi, towera anthu achekane. Iye adapaswa talasada ikulu.

⁵Tenepo Mwanabira adakanandula chakumyatira chachitatu; penepo ndidava chakulengwa chamoyo chachitatu chile kulonga kuti, “Bwera!” Ndidayang'ana mbandiona kavalo wakuswipa. Nyakumpakira adaphatira mdida wakuyesera kulemera kwa pinthu m'manja mwache.

⁶Ndidava chinango chakuveka ninga fala pakati pa pyakulengwa pyamoyo pinayi pile kulonga kuti, “Mdida ubodzi wa tirigu ngwakupagalwi munthu angaphata basa pansiku, pontho midida mitatu ya barele njakupagalwi munthu angaphata basa pansiku, kwache lekani vunga mafuta aolivi na vinyu!”

⁷Pidakanandula Mwanabira chakumyatira chachinayi ndidava fala ya chakulengwa chamoyo chachinayi chile kulonga kuti, “Bwera!”

⁸Ndidayang'ana mbandiona kavalo wakuchenerera. Nyakumpakira dzinache akhali imfa, pontho m'nduli mwache akhatewerwa na Hade.[4] Onsene uwiriawo adapaswa utongi pa khundu ibodzi mwa makhundu manayi a padziko yapansi kuti aphe anthu na nkhondo, njala, mliri, pontho na nyama zam'tsanga.

⁹Pidakanandula Mwanabira chakumyatira chachishanu ndidaona mizimu ya anthu kunsi kwa guwa yansembe, ale adaphiwa thangwi ya kulalika mafala a Mulungu pontho na umboni udachita iwo.

¹⁰Iwo adakhuwa mwakugaluza fala mbati, “Mbuya Wamphamvu zonsene, wakuchena na wakuonadi! Munadikhira kufikirana lini kukhonda tonga mseru anthu akukhala pansi pano kubwezera chiropa chathu?”

¹¹Penepo munthu onsene wa iwo adapaswa mkhanjo wakuchena mbapangwa kuti abange puma pang'ono kufikirana konta yamumphu ya anyabasa anzawo na abale ale adathema kuphiwa ninga iwo ikwane.

¹²Tenepo ndidaona Mwanabira akukanandula chakumyatira chachitanthatu. Chiteke-teke chikulu chidachitika. Dzuwa idasanduka yakuswipa ninga nguwo yalopa, pontho mwezi udasanduka wakufira monsene mwene ninga chiropa.

¹³Nyenyezi zonsene zakuthambo zidatchodoka mbazigwa pansi ninga kutchodoka kumbachita nkhuyu ziwisi muti ungatekenyeka na mphepo ikulu.

¹⁴Thambo idakununduka ninga kufunywa kwa mpukutu. Mapiri na ntchuwa pidabuluka m'mbuto mwapyo.

¹⁵Kubuluka penepo mafumu a padziko yapansi, atongi na akadamu ankhondo, anyakufuma, anyamphamvu na anthu anango onsene, mabitchu na atumbe, adabisala m'madzimba na m'miyala ya m'mapiri.

¹⁶Iwo adakhuwa kuna mapiri na kuna miyala mbati, “Tigwereni mutibise kuti tileke kuoniwa na nyakukhala pampando wachifumu, pontho kuti tibisike gopa ukali wa Mwanabira!

¹⁷Thangwi nsiku ya kugoswa ya kutchunyuswa kwawo ili pano, mbani, mphapo, anakwanisa kuwangisira?”