Read cisena CHIDZIWISO 7 Bible Online

CHIDZIWISO 7 - cisena bible

CHIDZIWISO 7

¹Kubuluka penepo ndidaona angelo anayi aimira kunkhomo zinayi za dziko yapansi. Adaphata mphepo zonsene zinayi kuti zileke kumenya dziko yapansi, bara penu pamiti.

²Ndidaona mngelo unango akudza kubulukira kumabulukiro dzuwa na chidindo cha Mulungu wamoyo. Iye adachemera mwakugaluza fala angelo anayi ale akhadapasa Mulungu mphamvu zakuvunga nazo dziko yapansi na bara.

³Mngelo ule adalonga mbati, “Lekani vunga dziko yapansi, bara, penu miti kufikirana tidzadinde anyabasa a Mulungu wathu papipumu pawo.”

⁴Ndidapangwa kuti konta ya anthu adindwa chidindo cha Mulungu papipumu pawo ale ikhali pikwi dzana na makumanayi na pinayi. Akhali akubulukira madzinza onsene khumi na awiri a Israele.

⁵Pikwi khumi na piwiri kubulukira pa dzinza yonsene: Yuda, Rubeni, Gadi, Asheri, Nafitali, Manase, Simioni, Levi, Isakara, Zebuloni, Yosefe na Benjemani.

⁹Kubuluka penepo ndidayang'ana mbandiona mwinji ukulu okhonda lengeseka; iwo akhali anthu a mitundu yonsene, madziko onsene, madzinza onsene na a pilongero pyonsene. Adaimira patsogolo pampando wachifumu na pa Mwanabira. Iwo adavala mikhanjo yakuchena mbaphatira michindu m'manja mwawo.

¹⁰Iwo adakhuwa mwakugaluza fala mbati, “Chipulumuso chimbabulukira kuna Mulungu wathu wakukhala pampando wachifumu na kuna Mwanabira!”

¹¹Angelo onsene adaimira mwakuzungulira mpando wachifumu, pontho akulu-akulu na pyakulengwa pyamoyo pinayi pile, tenepo iwo adalamba patsogolo pampando wachifumu mbapembedza Mulungu

¹²mbati, “Ameni! Ukulu, demelero, nzeru, takhuta, chilemedzo, mphamvu na mboko mphya Mulungu wathu kwenda na kwenda! Ameni!”

¹³Mbodzi wa akulu-akulu ale adandivunza mbati, “Anthu avala mikhanjo yakuchenawa mbani, pontho akubulukira kupi?”

¹⁴Ndidamtawira kuti, “Munapidziwa ndimwe, Mbuya.” Tenepo iye adalonga kuna ine mbati, “Enewa ngale apulumuka kuna kusanyika kukulu kudaona iwo kule. Iwo afula mikhanjo yawo mbapichenesa m'chiropa cha Mwanabira.”

¹⁵Ndi thangwi yache iwo ali patsogolo pampando wachifumu wa Mulungu mbamtumikira mosiku na masikati m'Nyumba ya Mulungu. Nyakukhala pampando wachifumu ule anakhala nawo mbaakoya mwadidi.

¹⁶Iwo nkhabeve dzava njala na nyota tayu. Nee dzuwa, penu mbebe unafuna dzaavula enewa tayu,

¹⁷thangwi Mwanabira wakukhala pakati na kati pa mpando wachifumu anakhala makabuswawo mbaatsogolera kumphuno za madzi akupasa moyo. Mulungu anaapukuta misozi yonsene m'maso mwawo.