Read cisena CHIDZIWISO 9 Bible Online

CHIDZIWISO 9 - cisena bible

CHIDZIWISO 9

¹Tenepo mngelo wachishanu adaliza ngomache. Ndidaona nyenyezi, ile ikhadagwa padziko yapansi, tenepo idapaswa mfungulo wakufungula nawo Chiphompho chikulu.

²Nyenyezi ile idafungula Chiphompho chikulu chile, tenepo utsi udabuluka kweneko ninga utsi wakubulukira kudzenje yakunyungulusiramo utale. Dzuwa na thambo pidaswipiswa na utsi wakubulukira ku Chiphompho chikuluchi.

³Nyadzombe adabuluka muutsi mule mbaphamira padziko yapansi. Nyadzombe weneyu adapaswa mphamvu sasawa na mphamvu za akong'a

⁴mbapangwa kuti aleke vunga miti penu udzu na mbewu zinango zene tayu, mbwenye akwanise kuboneresa anthu akusowa chidindo cha Mulungu papipumu pawo.

⁵Nyadzombe hadatawiriswe kupha anthu ale tayu, mbwenye kuasanyisa miyezi mishanu. Kuva kwache kupha kwakhala ninga kupha kumbava munthu angalumwa na kong'a.

⁶Nsiku zenezo iwo anasaka-saka imfa, kwache nkhabe kuigumana tayu. Anafuna kuti afe, mbwenye imfa inaathawa.

⁷Nyadzombe weneyu akhaoneka ninga akavalo akusasanyika kamenya nkhondo. Pamsolo pache pakhali pinthu pyakuoneka ninga pipewu pyachifumu pya golidi, nkhope yache mbikhala ninga nkhope za anthu.

⁸Tsisi yache ikhali ninga tsisi ya akazi, mano yache akhali ninga mano a nkhalamu.

⁹Anyakaditi ache adagudumirwa na chinthu chakuoneka ninga mayala a simbi akutchinjiriza nawo pagangafuwa. Mungu wakubuluka m'maphaphido mwache ukhaveka ninga mungu wa akavalo azinji akuthamangira kunkhondo.

¹⁰Nyadzombeyi akhali na michira na mbolera ninga ya akong'a, pontho mphamvu zakukuwaza nazo anthu miyezi mishanu zikhali kumichirache.

¹¹Iye ana mfumu wakuatonga, ule ndi mngelo wakutonga Chiphompho chikulu. M'Chiheberi dzinache ndi Abadoni; m'Chigriki dzinache ndi Apolioni kulonga kuti Nyakuvunga.

¹²Dzedze yakutoma yagwanda, kwache pasala awiri kuti adze.

¹³Tenepo mngelo wachitanthatu adaliza ngomache. Ndidava fala yakubulukira kunkhomo zinayi za guwa yansembe ya golidi ikhali pamaso pa Mulungu ile.

¹⁴Fala idalonga kuna mngelo wachitanthatu ule kuti, “Sudzula angelo anayi amangwa pamkulo ukulu wa Yufurate!”

¹⁵Angelo anayi adasudzulwa; iwo adasasanyika kale kuti aphe konta ibodzi ya makonta matatu a anthu a padziko yapansi paora yontho-yonthoyi ya nsiku yonthoyo ya mwezi onthowo na chaka chonthochi.

¹⁶Ndidapangwa konta ya anyankhondo akupakira akavalo ale kuti akhalipo chikwi cha pikwi madzana mawiri.

¹⁷Kumasomphenya mwanga ndidaona akavalo na anyakuapakirache. Iwo akhali na mayala a utale akutchinjiriza nawo pagangafuwa pawo akufira ninga moto, a choza ninga thambo, na akhare ninga sulufule. Misolo ya akavalo ikhali ninga nkhalamu, pontho m'kanwa mwawo mudabuluka moto, utsi na sulufule.

¹⁸Konta ibodzi mwa makonta matatu a anthu a padziko yapansi adaphiwa na miliri mitatuyi: moto, utsi na sulufule wakubulukira m'kanwa mwa akavalo.

¹⁹Thangwi mphamvu za akavalo ili m'kanwa mwawo na kumichira kwawo. Michirawo ikhali na misolo ninga wa nyoka mbaiphatisa basa kukuwaza nayo anthu.

²⁰Anthu anango onsene a padziko yapansi, ale adasala okhonda phiwa na miliri ile, hadaleke pyakudawa pyawo pakupembedza pidasasanya iwo na manjawo tayu. Iwo hadaleke kupembedza mizimu yakuipa, pontho mifanikizo ya golidi, siliva, mkuwa, miyala na miti, pinthu pile nkhabe kwanisa kuona, kuva penu kufamba tayu.

²¹Iwo hadaleke pyakudawa pyawo kuchita pyaupandu, pyamatsenga, pyakuzuda na kuba tayu.