Read cisena RUTE 1 Bible Online

RUTE 1 - cisena bible

RUTE 1

¹Kale ene mwenemo Israele mbadzati khala na mfumu, m'dzikomo mukhali njala ikulu. Tenepo Elimeleki wa mbumba ya Efurata, pontho ule akhakhala ku Betelehemu m'nthemba ya Yuda pabodzi pene na mkazache Naomi na anawo achimuna awiri, Mahiloni na Kilioni adenda kabanga khala m'dziko ya Moabu. Pikhakhala iwo kweneko,

³Elimeleki adafa, tenepo Naomi adasala yekha na anache awiri,

⁴ale adasemba Oripa na Rute, akazi a ku Moabu. Pidagwanda pyaka ninga khumi

⁵Mahiloni na Kilioni adafambo, tenepo Naomi adasaliratu yekha ene wakusowa mamuna penu ana achimuna.

⁶Pidagwanda ndzidzi pang'ono Naomi adava kuti MBUYA akhadatsanzayisa anthu ache pakuapasa pyakuvuna pyadidi, natenepo iye adasasanyika kubuluka ku Moabu pabodzi pene na akwenyache ale.

⁷Iwo adautoma ulendo wawo wakubwerera kunthemba ya Yuda kubulukira kukhakhala iwo kule na njira yakuafikisa kwawo. Mbali panjira,

⁸iye adalonga kuna akwenyache ale mbati, “Bwererani pyanu mukakhale na amanu. MBUYA mbakukomereni mtima ninga mukhadachitira iye kuna ine na adefuntu ale.

⁹MBUYA mbapichitise kukwanisika kuti munthu onsene wa imwe asembwe pontho mbamukhala na mabanja anu ene.” Tenepo Naomi adaampsompsona kugonekana nawo. Mbwenye iwo adatoma kulira

¹⁰mbalonga mbati, “Nkhabe ife tinati tiende namwe pabodzi kuna anthu anu.”

¹¹Naomi adalonga mbati, “Ananga, imwe mwathema kubwerera pyanu. Mwatani munafuna kwenda nane pabodzi? Ayi mukunyerezera kuti ine ndinakwanisa kukhala pontho na ana achimuna kuti akusembeni?

¹²Bwererani pyanu kwanu, thangwi ine ndakalamba pyakwanga kuti ndisembwe pontho. Podi ndinyerezere pyanga kuti chidikhiro chilipo basi mbandikhala na mamuna mosiku ene uno penepo mbandibala ana achimuna.

¹³Ayi imwe mungaadikhire kuti anawo agolosali? Ayi penepi pingakuchitiseni kuti muleke sembwa na mamuna unango? Nkhabe, ananga, imwe ene mukupidziwa kuti penepi si pyakukwanisika tayu. Chinthu chakuchitikiranichi ntchakundivesa kupha pyakwanga,[1] thangwi MBUYA andipasa nkhodolo.”

¹⁴Penepo iwo adatoma kulira pontho. Oripa adampsompsona mebzalache ule kugonekana naye mbabwerera pyache kwawo,[2] mbwenye Rute adamkakamira.

¹⁵Naomi adalonga kuna Rute mbati, “Nanako abwerera pyache kwawo kuna anthu ache na kuna milungu yache, ndoko naye pabodzi.”

¹⁶Mbwenye Rute adamtawira mbati, “Lekani kuchita kundidembetera kuti ndikusiyeni. Ndilekeni ndiende namwe. Konsene kwene kunaenda imwe, ndinaendambo konthoko. Konsene kwene kunakakhala imwe, ndinakakhalambo konthoko; anthu anu anakhalambo anthu anga, pontho Mulungu wanu anakhalambo Mulungu wanga.

¹⁷Konsene kwene kunafera imwe, ndinaferambo konthoko; kweneko ndiye kunafuna ine ikhwa m'masiye. MBUYA mbanditchunyuse pikulu pene, ngakhala panakhala chinthu chinango chene chakutilekanisa imwe na ine kupambula imfa!”[3]

¹⁸Pidaona Naomi kuti Rute adachita phinga kwenda naye pabodzi, iye hadalongeve pinthu tayu.

¹⁹Iwo adathimiza kwenda mpakana ku Betelehemu. Pidafika iwo anthu onsene a muluwanimo adakomerwa pyakwanga, pontho akazi adalonga mwakugaluza fala mbati, “Ayi weneyu angakhaledi Naomi?”

²⁰Iye adatawira mbati, “Lekani kundichemera Naomi mbwenye Mara,[4] thangwi Nyamphamvu zonsene achitisa moyo wanga kukhala ninga chinthu chakuwawa.

²¹Ndzidzi udabuluka ine kuno ndikhali na pizinji, mbwenye MBUYA andibweza chimanja-manja. Mwatani munandichemera Naomi, podi MBUYA anditchunyusa, pontho Nyamphamvu zonsene andichitisa kusanyika?”

²²Mwenemu ndi mule mudabwerera Naomi ku Betelehemu pabodzi pene na Rute mkwenyache wa ku Moabu mbafika ku Betelehemu ndzidzi wakuvuna barele ukutoma kwene.