Read cisena RUTE 2 Bible Online

RUTE 2 - cisena bible

RUTE 2

¹Naomi akhali na mbaleache wa kuchimuna dzinache Boazi. Iye akhali wa mbumba ya Elimeleki, pontho akhali munthu wakufuma.

²Nsiku inango Rute wa Chimoabu adalonga kuna Naomi mbati, “Nditawiriseni kwenda kaphalakatira mapira anasiya anyakuvuna m'mindawa, ale ndikupidziwa kuti mbodzi anati andikomere mtima basi kuphata naye basa pabodzi.” Naomi adatawira mbati, “Ndoko pyako mwananga.”

³Tenepo Rute adenda kuminda mbatoma kuphalakatira mapira m'nduli mwa anyakuvuna ale. Pidachitika kuti iye akhali m'munda mwa Boazi wa mbumba ya Elimeleki.

⁴M'nduli mwache Boazi ene mwenechiroache adafika kubulukira ku Betelehemu mbamwenyika anyakuvuna ale mbati, “MBUYA mbakhale namwe.” Iwo adatawira mbati, “MBUYA mbakutsanzayiseni.”

⁵Boazi adavunza mkadamu wa anyakuvuna ale mbati, “Mtsikana weneyu mbani?”

⁶Mkadamu ule adatawira mbati, “Iye ndi mkazi wa ku Moabu adadza pabodzi na Naomi ule.

⁷Iye adandipempha kuti ndimtawirise kuphalakatira pyache mapira m'nduli mwa anyakuvunawa. Iye atoma machibese kuphata basa, tenepo akhala pamthunzi kuti apume ndzidzi pang'ono basi.”

⁸Tenepo Boazi adalonga kuna Rute mbati, “Mwananga vesera kuno. Leka kwenda kaphalakatira m'munda mwa munthu unango, mbwenye m'munda muno mwene basi. Khala kuno na anyabasanga achitsikanawa.

⁹Ikha maso pamunda unavuna amunawa, pontho khala m'nduli mwawo. Ine ndaapanga kuti aleke kukukhuya. Ungava nyota ndoko kamwe madzi adza na iwo m'pitombamo.”

¹⁰Rute adalamba mbalonga kuna Boazi mbati, “Mwatani munatsalakana pya ine pano? Thangwi yache ninji kuti mukomere mtima mlendo pyache ninga ine?”

¹¹Boazi adatawira mbati, “Ine ndava pyonsene pyachitira iwe mebzalako kutomera pidafa mamunako. Ine ndadziwa mule mudasiyira iwe dziko yako, pontho mule mudadzera iwe dzakhala pakati pa anthu ale chipo hudzati kuadziwa tayu.

¹²MBUYA mbakufupe thangwi ya pinthu pyachita iwepi. MBUYA Mulungu wa Israele mbakufupe na mfupo wamumphu, kuna iye kule kwadza iwe kuti utchinjirizwe.”

¹³Rute adatawira mbati, “Imwe mwandikomera mtima pyakwanga.[5] Mbuya, imwe mwandichitisa kukomerwa pakulonga mwakukoma mtima kuna ine, podi kwene kuti ine na anyabasanuwa ndife akusiyana.”

¹⁴Pandzidzi wakudya Boazi adalonga kuna Rute mbati, “Bwera ukwate mkate mbufonde muvinyu.” Tenepo iye adakhala pansi na anyakuvuna ale, Boazi adakwata barele wakukazinga mbampasira. Iye adadya mbakhuta mbasiya basi pyakudya pinango.

¹⁵Pidalamuka iye kwenda kaphalakatira barele, Boazi adatonga anyabasa ale mbati, “Mulekeni pyache kuphalakatira podi na mwagona misumbu mwenemo. Lekani longa chinthu na chibodzi chene kumkhondesa. M'mbuto mwache sololani pang'ono barele m'misumbumo kuti iye alokote, pontho lekani kumsumulula.”

¹⁷Rute adathimiza kuphalakatira mpakana mawulo. Tenepo adabubuda barele akhadaphalakatira iye ule mbaona kuti akhadadzaza chifupi-fupi makilogramu khumi.

¹⁸Iye adakwata barele ule mbabwerera muluwani mbakaaonesa mebzalache mbampasa pontho pyakudya pyakusalira pikhadasiya iye ndzidzi wakudya ule.

¹⁹Naomi adamvunza mbati, “Pyonsenepi wapiphalakatira kupi? Mundache ngwa ani waphata iwe basa? Mulungu mbatsanzayise munthu adakukomera mtima ule!” Tenepo Rute adalonga kuti iye akhadaphalakatira m'munda mwa munthu unango dzinache Boazi.

²⁰Naomi adalonga mbati, “MBUYA mbatsanzayise Boazi.” Iye adathimiza kulonga mbati, “MBUYA ambachita pidadumbira iye kuna anyamoyo na anyakufa ene. Munthu weneyu ndi mbaleathu chadi-chadi, mbodzi wa anthu ambatsalakana pya ife ule.”

²¹Tenepo Rute adalonga mbati, “Padzulu pa penepi iye adandipanga kuti ndithimize kukhala pabodzi pene na anyabasache mpakana kumala kwa kuvuna.”

²²Naomi adalonga kuna Rute mbati, “Mwananga mphyadidi kuti iwe uphate basa pabodzi na anyabasa achitsikana m'munda mwa Boazi, gopesera unakuwazwa ngakhala unaenda m'munda mwa munthu unango ene.”

²³Tenepo Rute adaphata nawo basa mbaphalakatira mpakana barele na tirigu onsene adamala vunwa. Tenepo iye adathimiza kukhala na mebzalache.