Read cisena RUTE 4 Bible Online

RUTE 4 - cisena bible

RUTE 4

¹Boazi adenda kumsuwo wa luwaniyo kumbuto yakugumanikirako mbakhala pansi penepo. Tenepo mbaleache Elimeleki chadi-chadi mamuna akhadalonga Boazi ule, adadza penepo. Tenepo Boazi adalonga kuna iye mbati, “Shamwali ngadza kuno mbukhale pansi.” Tenepo iye adenda mbakakhala pansi.

²Boazi adachemeresa akadamu khumi a muluwani mule mbaapempha kuti akhalembo pansi. Pidakhala iwo pansi,

³iye adalonga kuna mbaleache Elimeleki ule mbati, “Podi Naomi abwerako kubulukira ku Moabu, iye anafuna kugulisa munda wa mbaleathu Elimeleki.

⁴Ine ndapinyerezera kuti iwe wathema kudziwa penepi. Tenepo ngakhala iwe unafuna kuugula wathema kuugula pamaso pa amuna akhala pansi panowa, pontho pamaso pa akadamu a anthu anga. Mbwenye ngakhala hunapifuna tayu longa, thangwi utongi wakugula munda chakutoma una iwepo, kubuluka penepo ndinembo.” Mamuna ule adalonga mbati, “Ndinati ndiugule.”

⁵Boazi adalonga mbati, “Mphyadidi, kwache ngakhala unagula mundawo kuna Naomi wathema kugula pontho na Rute ene,[6] mamfelwa wa ku Moabu ule, towera mundawo ukhale m'banja ya defuntu ule.”

⁶Mamuna ule adatawira mbati, “Ngakhala pili tenepo, ine sinakwanisa kuugula tayu, thangwi ananga nkhabe dzasiyirwa mundawo. Ugule pyako ndiwe, ine sinakwanisa tayu kuugula.”

⁷Nsiku zenezo kugulisa chinthu penu kuchinjisana chinthu, ukhali mtemo kuna nyakugulisayo kudula nkhwairache mbaipereka kuna nyakugula. Pakuchita tenepo Aisraele akhaonesa kuti mseru wandendemera.

⁸Mamuna ule adalonga kuna Boazi mbati, “Iwe wathema kuugula pyako.” Tenepo iye adadula nkhwairache mbaipereka kuna Boazi.[7]

⁹Tenepo Boazi adalonga kuna akadamu ale na kuna anthu anango onsene penepo mbati, “Monsenene pano ndimwe mboni lero kuti ndagula kuna Naomi pyonsene pya Elimeleki, na pya anache achimuna Kilioni na Mahiloni.

¹⁰Kuthimiza penepo Rute wa Chimoabu, mamfelwa wa Mahiloni, lero asanduka mkazanga. Penepi pinakoya mfumayo m'banja ya defuntuyo, pontho mbumbache inathimiza kukhalapo pakati pa anthu ache na muluwani mwache; imwe ndimwe mboni lero.”

¹¹Akadamu na anthu anango ale adalonga mbati, “Ande, ndife mboni. MBUYA mbachitise mkazako kukhala ninga Rakele na Lea ale adabalira Yakobo ana azinji. Iwe mbukhale wakufuma m'mbumba ya Efurata pontho wakuveka m'Betelehemu.

¹²Ana anafuna kukupasa MBUYA na mkazi weneyu mbachitise banjako kukhala ninga banja ya Perezi mwana wamamuna wa Yuda na Tamara.”

¹³Tenepo Boazi adakwata Rute kukhala mkazache. MBUYA adamtsanzayisa Rute mbakwata mimba, tenepo adabala mwana wamamuna.

¹⁴Akazi adalonga kuna Naomi mbati, “MBUYA mbakuzwe! Iye akupasani chidzukulu lero chakuti chikuyang'anireni mwadidi. Mwanayu mbakhale wakuveka mu Israele!

¹⁵Mkwenyanu ambakufunani, pontho akuchitirani pikulu kupiringana ana anomwe achimuna. Iye akupasani chidzukulu chile chinadzesa moyo wachinchino kuna imwe, pontho ule anakhala nyakukuphata pamkono na kukalamba kwanu kweneku.”

¹⁶Naomi adakwata mwana ule mbamuikha pa miyendo pache[8] mbakhala makayayache.

¹⁷Atsanthembache achikazi ale adalonga mbati, “Naomi ana mwana wamamuna!” Tenepo mwana ule adamthula Obedi. Kubuluka penepo Obedi adabala Yese. Yese adabalambo Davite.

¹⁸Yeneyi ikhali mbumba ya Perezi: Perezi adabala Hezironi,

¹⁹Hezironi adabala Ramu, Ramu adabala Aminadabu,

²⁰Aminadabu adabala Nashoni, Nashoni adabala Salimoni,

²¹Salimoni adabala Boazi, Boazi adabala Obedi,

²²Obedi adabala Yese, Yese adabala Davite.