Read cisena 1 SAMUELE 1 Bible Online

1 SAMUELE 1 - cisena bible

1 SAMUELE 1

¹Pakhali munthu unango dzinache Elikana wa dzinza ya Eferemu, ule akhakhala muluwani ya Rama m'nthemba ya mapiri ya Eferemu. Iye akhali mwana Yerohamu pontho mdzukuluache Elihu wa m'banja ya Tohu, pontho wa m'mbumba ya Zufu.

²Elikana akhali na akazi awiri Hana na Penina. Penina akhali na ana, mbwenye Hana akhali nkhabe ana.

³Chaka na chaka Elikana akhabuluka ku Rama kwenda ku Shilo kapembedza na kupereka nsembe kuna MBUYA Wamphamvu zonsene, kule kukhali ana awiri achimuna a Eli, Hofini na Finiasi kuphatira basa MBUYA ninga anyansembe.

⁴Ndzidzi onsene ukhapereka Elikana nsembe yache, iye akhapereka khundu ibodzi ya nyama kuna Penina, khundu inangomboyo akhaipereka kuna ana a Penina onsene ale.

⁵Podi kwene kuti iye akhamfuna pikulu Hana, iye akhampasa khundu ibodzi ene basi, thangwi[1] MBUYA adamchitisa kuuma nthumbo.

⁶Penina nyakumsedegula ule akhamsingirira Hana mbamululupisa thangwi MBUYA adamchitisa kuuma nthumbo.

⁷Penina adathimiza kuchita tenepo chaka na chaka; ndzidzi onsene ukhaenda iwo ku Nyumba ya Mulungu, Penina akhamsingirira pyakwanga Hana mwakuti iye akhalira mbakhonda kudya na chinthu chene.

⁸Mamunache Elikana akhamvunza mbati, “Hana, watani unalira? Watani unakhonda kudya? Watani unatsukwala ndzidzi onsene? Kadi ine kuna iwe si ine wakufunika pikulu tayu kupiringana ana khumi achimuna?”

⁹Nsiku inango pikhadamalisa iwo kudya m'Nyumba ya Mulungu ku Shilo, Hana adalamuka. Iye akhasanyika pyakwanga mumtima mwache, tenepo adalira pikulu pene pikhapemphera iye kuna MBUYA. Ndzidzi wenewu Eli, nyansembe ule akhakhala pambuto pache chifupi na msuwo wa Nyumba ya MBUYA.

¹¹Hana adadumbira pikulu pene mbati, “MBUYA Wamphamvu zonsene, ndionenimbo ine, nyabasanu! Yang'anani nyatwa zanga mbamundikumbuke. Lekani duwalira nyabasanu. Ngakhala munandipasa mwana ndinadumbira kuti ndinampambulira kuna imwe moyo wache onsene, pontho kuti iye hanachingwa tsisi yache tayu.”[2]

¹²Hana adathimiza kupemphera kuna MBUYA ndzidzi ukulu ene, Eli akhayang'ana mulomo wache.

¹³Iye akhapemphera chibwalo-bwalo uku milomo yache mbiyapula mbakhonda bulusa fala. Tenepo Eli adanyerezera kuti iye akhadaledzera

¹⁴mbalonga kuna iye mbati, “Ayi unakhala wakuledzera kufikirana lini? Leka kumwa vinyuyo.”

¹⁵Iye adatawira mbati, “Ine sidaledzere tayu, mbuyanga. Ine sidamwe vinyu penu bwadwa tayu. Ine ndine pyache mkazi wakusanyika mumtima, pontho pano ndikupemphera kutula nyatwa zanga kuna MBUYA.

¹⁶Lekani nyerezera kuti ndine mkazi wakuipa. Ine ndikhapemphera ninga tenepa thangwi ndine wakutsukwala, pontho wakusanyika pyakwanga mumtima.”

¹⁷Eli adatawira mbati, “Ndoko na mtendere, pontho Mulungu wa Israele mbakupase pyampempha iwepyo.”

¹⁸Hana adalonga mbati, “Nyabasanu mbagumane kukoma mtima pamaso panu.” Tenepo adenda pyache, iye adadya na kumwa mbakhonda tsukwala pontho.

¹⁹Bzobzo mangwana mwache Elikana na banjache adalamuka, tenepo pidamala iwo kupembedza pamaso pa MBUYA, adabwerera kwawo ku Rama. Elikana adapita m'bonde na Hana mkazache, tenepo MBUYA adava kupemphera kwache.

²⁰Tenepo iye adakwata mimba mbabala mwana wamamuna mbamthula Samuele.[3] Iye adalonga mbati, “Ine ndidachita kumpempha kuna MBUYA.”

²¹Ndzidzi udafika pontho wakuti Elikana na banjache aende ku Shilo kapereka nsembe ya chaka na chaka kuna MBUYA pontho nsembe yakupambulika idadumbira iye ile.

²²Ndzidzi wenewu Hana hadendeko tayu. Iye adalonga kuna mamunache mbati, “Sindzidzi mwanayi nkhuleka bele ndinati ndiende naye ku Nyumba ya MBUYA, kunafuna kakhala iye moyo wache onsene kule.”

²³Elikana adatawira mbati, “Chita pyonsene pinaona iwe kuti mphyakuthema kuna iwepyo; khala pyako kuno kufikirana mwanayo aleka bele. MBUYA mbachitise kudumbira kwako[4] kukwana-kwana.” Tenepo Hana adakhala pyache kumusa mbamyamwisa mwanache mpakana adaleka bele.

²⁴Pidamulekesa iye bele, adamkwata mbaenda naye ku Nyumba ya MBUYA ku Shilo podi kwene kuti akhali wamng'ono pyakwanga. Iye adakwata pontho ng'ombe imuna ya pyaka pitatu,[5] ufa wakulemera makilogramu khumi, pontho na budu ya nthembe yakudzala na vinyu mbaenda naye.

²⁵Pidamala iwo cheka ng'ombe ile, adenda na mwana ule kuna Eli

²⁶mbalonga mbati, “Dikhirani pang'ono, mbuyanga. Ayi mukukumbuka kuti ndine mkazi adaimira pamaso panu ule, kupemphera kuna MBUYA?

²⁷Ine ndidampempha mwanayu, tenepo iye adandipasa chidampempha ine chile.

²⁸Natenepo ndikumpambulira kuna MBUYA. Ndzidzi onsene wa moyo wache anakhala wa MBUYA.” Penepo iwo[6] adapembedza MBUYA.