Read cisena 1 SAMUELE 11 Bible Online

1 SAMUELE 11 - cisena bible

1 SAMUELE 11

¹Pidagwanda mwezi ubodzi Nahashi mfumu wa Aamoni adenda na anyankhondo ache mbakazungulira luwani ya Yabeshi m'nthemba ya Gileadi. Amuna a ku Yabeshi adalonga kuna Nahashi mbati, “Khalani gulu ibodzi ya nkhondo na ife, tenepo ife tinakhala pansi pa utongi wanu.”

²Nahashi adatawira mbati, “Ine ndinakhala gulu ibodzi ya nkhondo na imwe munganditawirisa kuchita chinthu chibodzi chene basi kuti ndikonombole diso yakumadyo ya munthu onsene wa imwe towera ndilulupise Israele onsene.”

³Akadamu a ku Yabeshi adalonga mbati, “Tipaseni nsiku zinomwe towera tikwanise kutumiza mphangwa mu Israele monsene. Ngakhala panasowa munthu na mbodzi ene wakutiphedza penepo tinati tiimise manja kuna imwe.”

⁴Anyamphangwa adafika ku Gibea kukhali Sauli kule, tenepo pidatula iwo mphangwa zile anthu adagundika kulira mwakusanyika pikulu.

⁵Sauli akhafika kwene muluwani kubulukira kuminda na ng'ombe zache zakulima mbavunza mbati, “Chachitika ninji? Thangwi yache ninji munthu onsene akulira?” Iwo adampanga mphangwa zidadza kubulukira kuna Yabeshi zile.

⁶Pidava Sauli penepi Mzimu wa Mulungu udamgudumira, tenepo iye adazhangali pyakwanga.

⁷Iye adagwanda mapindi-mapindi ng'ombe zache zakulima ziwiri zile mbatumiza mapindi ale mu Israele monsene na kuacheuza kuti: “Munthu onsene anakhonda tewera Sauli na Samuele kunkhondo, ng'ombe zache zakulima zinachitwambo ninga tenepo!” Aisraele adachita mantha na pinthu pikhafuna kuchita MBUYA, tenepo munthu onsene okhonda kusiyapo na mbodzi ene adagumanyikana pabodzi pene.

⁸Sauli adaagumanyisa pa Bizeke. Penepo pakhali anthu pikwi madzana matatu akubulukira ku Israele, pontho anthu pikwi makumatatu akubulukira ku Yuda.

⁹Iwo adalonga kuna anyamphangwa akubulukira kuna Yabeshi ale mbati, “Kapangeni anthu anu kuti mangwana mbadzati kwana masikati imwe munapulumuswa.” Pidava anthu a ku Yabeshi mphangwa zile, iwo adakomerwa pyakwanga,

¹⁰mbalonga kuna Nahashi mbati, “Mangwana tinati tiimise manja kuna imwe, tenepo munakwanisa kuchita nafe pyonsene pinafuna imwe.

¹¹Usiku wenewo Sauli adagawa amunache m'magulu matatu, tenepo m'makalakwecha adathamangira kumsasa wa anyamalwawo mbasosa Aamoni. Pikhakwana masikati iwo adaacheka, tenepo akusala na moyowo adabalalika munthu onsene kuthawa pache yekha.”

¹²Tenepo Aisraele adalonga kuna Samuele mbati, “Ali kupi anthu ale akhalonga kuti Sauli aleke khala mfumu wathu? Adzeseni kuna ife kuti tiaphe!”

¹³Mbwenye Sauli adalonga mbati, “Nee mbodzi anafuna kuphiwa lero tayu, thangwi lero ndi nsiku yapulumusa MBUYA Aisraele.”

¹⁴Tenepo Samuele adalonga kuna iwo mbati, “Tendeni pontho ku Giligala tikatsikimizire kuti Sauli ndi mfumu.”

¹⁵Onsene adenda ku Giligala, tenepo kweneko pambuto yakupambulika adatsikimizira kuti Sauli ndi mfumu. Iwo adapereka nsembe zachiphatizano, pontho Sauli na Aisraele onsene adasekera pikulu pene thangwi ya pidachitika pile.