Read cisena 1 SAMUELE 12 Bible Online

1 SAMUELE 12 - cisena bible

1 SAMUELE 12

¹Samuele adalonga kuna Aisraele mbati, “Ine ndachita pyonsene pidandipempha imwe. Ine ndakupasani mfumu kuti akutongeni,

²tenepo chinchino muli naye mfumu kuti akutongeni. Kulonga pya ine ndakalamba pontho ndina imvi, pontho ananga achimuna ali namwe pabodzi pene. Ine ndakhala mkadamu wanu kutomera uphaleanga kufikirana lero.

³Ine ndili pano, ngakhala ndachita pinthu pyakudawika pilongeni chinchino pano pamaso pa MBUYA, pontho pamaso pa mfumu asankhula iyeyi. Ayi ine ndakwata ng'ombe ya munthu, penu kumkwatira bulu wache? Mbani munthu abera ine pinthu pyache? Mbani munthu apondereza ine? Ngupi munthu atawira ine kundidyekera? Ngakhala ine ndachita chibodzi mwa pinthu penepi ndinati ndibwezere chinthu chakwata inecho.”

⁴Anthu adatawira mbati, “Nkhabe, imwe nee mudatibera pinthu pyathu, penu kutipondereza tayu; imwe nee mwakwata pinthu pyathu na chibodzi chene tayu.”

⁵Samuele adatawira mbati, “MBUYA pontho mfumu asankhula iye leroyi ndi mboni kuti imwe mwandigumana okhonda dawa monsene mwene.” Iwo adatawira mbati, “Ande, MBUYA ndi mboni yathu.”

⁶Samuele adathimiza kulonga mbati, “MBUYA ndiye adasankhula Mose na Aroni, pontho adabulusa makolo anu m'dziko ya Iguputo ule.

⁷Tenepo imwe imirani pana imwepo thangwi ndinati ndikupokanyeni pamaso pa MBUYA pa kukukumbusani[22] mabasa onsene amphamvu adachita MBUYA kupulumusa imwepo na makolo anu.

⁸Pidenda Yakobo na banjache kakhala ku Iguputo, kule Aiguputo adapondereza,[23] makolo anu adalira pikulu kuna MBUYA kufuna chiphedzo, tenepo MBUYA adatuma Mose na Aroni mbabulusa makolo anu m'dziko ya Iguputo mbaakhazikisa m'dziko yeneyi.

⁹Kwache anthu adaduwalira MBUYA Mulungu wawo, natenepo iye adatawirisa Afilisti, mfumu wa ku Moabu, pontho na Sisera, mkadamu wa anyankhondo wa ku mzinda wa Hazori, kumenyana na makolo anu mbaakunda.

¹⁰Iwo adalira kuna MBUYA kufuna chiphedzo mbalonga mbati, ‘Ife tadawa thangwi tabauka kubuluka kuna imwe MBUYA mbatipembedza mifanikizo ya milungu Baala na Asitarite. Tipulumuseni m'manja mwa anyamalwathu tenepo ife tinati tikupembedzeni!’

¹¹Tenepo MBUYA adatumiza Gideoni na Baraki,[24] Yefita pakumalisira pache ine pano. Munthu onsene wa ife adakupulumusani kuna anyamalwanu mbamukhala pakupata.

¹²Mbwenye pidaona imwe Nahashi, mfumu wa Aamoni kuti akhali chifupi kukusosani imwe mudamkhonda MBUYA ninga mfumu wanu mbamulonga kuna ine kuti, ‘Tinafuna mfumu atitonge.’

¹³“Apo mfumu ngweneyu adasankhula imwe ule; imwe mudapempha mfumu, tenepo MBUYA akupasani.

¹⁴Pinthu pyanu pyonsene pinakufambirani mwadidi ngakhala munalemedza MBUYA Mulungu wanu, kumtumikira, kumvesera, pontho kuvera matongero ache, pontho ngakhala imwe na mfumu wanuyi munakhulupirika kuna MBUYA Mulungu anu.

¹⁵Mbwenye ngakhala munakhonda kuvera matongero ache, iye anakupasani nkhodolo imwe na mfumu wanu ene.[25]

¹⁶Tenepo chinchino imirani pana imwepo, towera muone chinthu chikulu chinafuna kuchita MBUYA.

¹⁷Uno ndi ndzidzi wa malimwe, si tenepo tayu? Mbwenye ndinati ndipemphere, tenepo MBUYA anatumiza njazi na mvula. Penepi pingachitika munadzindikira kuti mwachita pyakudawika kuna MBUYA pakumpempha kuti akupaseni mfumu.”

¹⁸Tenepo Samuele adapemphera natenepo pansiku yonthoyo MBUYA adatumiza njazi na mvula. Aisraele onsene adaphatwa na mantha thangwi ya MBUYA na Samuele ene,

¹⁹mbalonga kuna Samuele mbati, “Pemphererani ife, anyabasanu, kuna MBUYA towera tileke kufa. Chinchino tadzindikira kuti padzulu pa pyakudawa pyathu pyonsene tathimizapo kudawa kunango pakumpempha MBUYA kuti atipase mfumu.”

²⁰Samuele adatawira mbati, “Lekani chita mantha, podi kwene kuti imwe mwachita chakuipa ninga chenechi. Lekani kubauka kubuluka kuna MBUYA, mbwenye mumtumikire na mtimanu onsene.

²¹Lekani kubaukira kuna milungu yapezi. Iyo nkhabe kukuphedzani penu kukupulumusani tayu, thangwi ipyo mphyakusowa basa.

²²Thangwi ya dzinache ikulu MBUYA hanasiya anthu ache tayu; iye apinyerezera kuti akuchitiseni kukhala anthu ache ene.

²³Kulonga pya ine MBUYA mbandikhondese kumdawira pakukhonda kukupemphererani pontho. M'mbuto mwache ndinakufunzisani kuchita pinthu pyadidi pontho pyakuthema.

²⁴Verani MBUYA mbamumtumikire mwakukhulupirika na mtimanu onsene. Kumbukani pinthu pikulu pyakuchitirani iye.

²⁵Mbwenye ngakhala munathimiza kudawa, imwe na mfumu wanu ene munavungwa.”