Read cisena 1 SAMUELE 13 Bible Online

1 SAMUELE 13 - cisena bible

1 SAMUELE 13

¹Sauli akhali na pyaka pitatu pikhapita iye ufumu, tenepo iye adatonga Israele pyaka makumanayi na piwiri.

²Sauli adasankhula amuna pikwi pitatu pakati pa Aisraele, tenepo adakwata amuna pikwi piwiri mbakhala na iye ku Mikimashi m'nthemba ya mapiri ya Betele, mbwenye adatuma amuna anango chikwi chibodzi kakhala na mwanache Yonatani ku Gibea nthemba ya Benjemani. Anango akusalirawo adaagwinya m'misa mwawo.

³Yonatani adasosa anyankhondo mumsasa wa Afilisti[26] ku Geba, tenepo Afilisti onsene adapiva penepi. Sauli adatuma anyamphangwa kachemera Aheberi kwenda kunkhondo pakuliza ngoma m'dziko yonseneyo.

⁴Aisraele onsene adapangwa kuti Sauli adapha anyankhondo mumpanda wa Afilisti pontho kuti Afilisti adaazonda. Tenepo anthu adatawira kwenda pabodzi pene na Sauli ku Giligala.

⁵Afilisti adagumanyikana kumenya nkhondo na Aisraele; iwo akhali na pingolo pya nkhondo pikwi makumatatu, amuna pikwi pitanthatu akutekenya akavalo, pontho na anyankhondo azinji pyakwanga ninga tchetcha ya pagombe. Iwo adenda mbakamanga msasa pa Mikimashi kumabulukiro dzuwa a Beti-Aveni.

⁶Afilisti adaotosa nkhondo, natenepo pidaona Aisraele kuti akhali pampani-pani adabisala m'nkhwimba na m'misitu, pakati pa miyala pontho m'madzenje na m'michera;

⁷anango adawambuka mkulo wa Yorodani mbaenda ku nthemba ya Gadi na Gileadi. Sauli adathimiza kukhala mu Giligala, pontho anyankhondo akhakhala na iye ale akhatetemera na mantha.

⁸Iye akhadikhira Samuele nsiku zinomwe ninga montho mukhadampangira Samuele, kwache Samuele akhadadzati fika tayu ku Giligala. Anthu adatoma kumthawira Sauli.

⁹Tenepo iye adalonga mbati, “Ndidzesereni nsembe zakupyerera na nsembe zachiphatizano.” Iye adapereka nsembe zakupyerera,

¹⁰tenepo pikhamalisa iye, penepo pene Samuele adafika. Sauli adabuluka kagumanikana naye mbampasa mwenyikiro,

¹¹mbwenye Samuele adamvunza mbati, “Ayi ninji pyachita iwepi?” Sauli adatawira mbati, “Anthu akhandithawira, pontho imwe nee mudadza ndzidzi udalonga imwe ule tayu, pontho kuti Afilisti adagumanyikana ku Mikimashi

¹²kuti andisose ku Giligala kwache ine sidampemphe kuti MBUYA andikomere mtima tayu, tenepo ine ndapiona kuti mphyadidi kuti ndipereke nsembe.”

¹³Samuele adatawira mbati, “Iwe udachita pinthu pyakupupwa. Iwe hudavere matongero adakupasa MBUYA Mulungu wako tayu. Iwe mbudavera, iye mbadatawirisa iwe na pidzukulu pyako kutonga Israele kwenda na kwenda.

¹⁴Mbwenye chinchino ufumu wako nkhabe dzathimiza kukhalapo tayu. Na thangwi yakuti iwe hudamvere tayu, MBUYA anasankhula munthu anafuna iye mbamuikha kukhala mfumu wa anthu ache.”

¹⁵Samuele adabuluka ku Giligala mbaenda pyache. Amuna akusalirawo adatewera Sauli pikhabuluka iye ku Giligala[27] kwenda ku Gibea, m'nthemba ya Benjemani. Sauli adalengesa amuna akhali na iye ale. Iwo adakwana ninga madzana matanthatu.

¹⁶Sauli na mwanache Yonatani pontho na amunawo adamanga msasa ku Geba m'nthemba ya Benjemani; Afilisti adamangambo msasawo ku Mikimashi.

¹⁷Anyankhondo a Chifilisti adabuluka mumsasa mwawo mule m'magulu matatu; gulu ibodzi idenda ku Ofara m'nthemba ya Shuali,

¹⁸gulu inango idenda ku Beti-Horoni, gulu inangoyo idenda kumadire kuyang'anisana na phedi ya Zeboimu na thando yatchetcha.

¹⁹Mu Israele nee mbodzi akhalimo wakufula simbi tayu, thangwi Afilisti akhachita phinga kukhondesa Aheberi kusasanya matalasada pontho madipa.

²⁰Aisraele akhaenda kuna Afilisti kanozwesa mapaza awo akukweyiwa na ng'ombe, mapaza ene pyawo, mbadzo na pikwakwa;

²¹kupagali kwache kukhali kobiri ibodzi ing'ono kunozwesa kokha mbadzo na kusasanyisa mitswamu yakumenyera ng'ombe za pachingolo; kobiri ziwiri kunozwesa kokha mapaza akukweyiwa na ng'ombe pontho na mapaza ene pyawo.

²²Natenepo pansiku ya nkhondo nee nyankhondo mbodzi akhali na talasada pontho dipa kupambula Sauli na mwanache Yonatani.

²³Afilisti adatuma gulu ya anyankhondo kutchinjiriza njira yakuwambukira pa Mikimashi.