Read cisena 1 SAMUELE 14 Bible Online

1 SAMUELE 14 - cisena bible

1 SAMUELE 14

¹Nsiku inango Yonatani adalonga kuna mphale unango ule akhathukula pida pyache mbati, “Tende tiwambukire kumsasa wa Afilisti.” Kwache Yonatani hadampange babache tayu,

²ule akhakhala mumsasa mwache pansi pa muti wantheme ku Migironi chifupi na Gibea. Sauli akhali na amuna ninga madzana matanthatu.

³Pakati pawo pakhali Ahia nyansembe wakuthukula efodi ule. Iye akhali mwana wamamuna wa Ahitubu mbaleache Ikabodi ule akhali mwana wamamuna wa Finiasi pontho chidzukulu cha Eli nyansembe wa MBUYA ku Shilo. Anthu hadadziwe tayu kuti Yonatani adabulukapo.

⁴Pa Makata a Mikimashi, pale padathema Yonatani kugwanda napo kwenda kumsasa wa Afilisti, pakhali maphanzwi mawiri kukhundu zonsene za njirayo; ibodzi ikhachemerwa Bozezi, inangombo ikhachemerwa Sene.

⁵Phanzwi ibodzi ikhali kukhundu yakumpoto kwa njirayo, inangombo ikhali kukhundu yakumwera kuyang'anisana na Geba.

⁶Yonatani adalonga kuna mphale ule mbati, “Tende tiwambukire kumsasa wa Afilisti, anthu okhonda dziwa Mulungu ale, mwinango MBUYA anatiphedza. Nkhabe chingachimwanise MBUYA tayu kutichitisa kukunda podi ife tikhale pyathu akuchepa tani.”

⁷Mphale ule adatawira mbati, “Chinthu chonsene chinafuna imwe kuchitacho ine ndili namwe.”

⁸Yonatani adatawira mbati, “Tende tiwambuke kuna anthuko, pontho mbatialeke kuti atione pyawo.

⁹Ngakhala iwo anatipanga kuti tiadikhire kudza kuna ife, penepo ife tinakhala pana ifepo.

¹⁰Mbwenye ngakhala iwo anatipanga kuti tiende kuna iwoko, ife tinati tiendeko thangwi chenechi ntchitsikimizo chakuti MBUYA anatichitisa kuakunda.”

¹¹Tenepo adachitisa kuti Afilisti aaone pyawo; penepo Afilisti adalonga mbati, “Yang'anani, Aheberi anango akudza kuna ife kubulukira m'dzenje mukhadabisala iwo mule.”

¹²Iwo adachemera Yonatani na mphale ule mbati, “Idzani kuno, muone chinafuna kubuluka m'mabondo mwanu!” Yonatani adalonga kuna mphale ule mbati, “Nditewere MBUYA achitisa Aisraele kuakunda.”

¹³Yonatani adakwira mwakuchita kukambadza, tenepo mphale ule adamtewera. Yonatani adasosa Afilisti ale mbaamenya kuagwisiratu pansi, tenepo mphale ule adaapha.

¹⁴Kupha kwakutomaku Yonatani na mphale ule adapha amuna ninga makumawiri pambuto yakukwana ninga mathanyo makumanomwe ulaphi na umimbache.

¹⁵Afilisti onsene a kumidzi adachita mantha, pontho anyankhondo mumsasamo adatetemera na mantha; dziko idatekenyeka, pontho iwo akhali pampani-pani ukulu.

¹⁶Amuna akhali na Sauli ale ku Gibea m'nthemba ya Benjemani adaona Afilisti akuthawa mwakuzunguzika.

¹⁷Tenepo Sauli adalonga kuna amunache ale mbati, “Lengesani anyankhondo mbamuone kuti mbani nkhabepo.” Iwo adachitadi tenepo mbagumana kuti Yonatani na mphale ule akhathukula pida pyache nkhabepo.

¹⁸Sauli adalonga kuna Ahia nyansembe mbati, “Idza kuno na efodi.” Pansiku yeneyo Ahia akhathukula efodi patsogolo pa anthu a ku Israele.

¹⁹Pikhalonga Sauli kuna anyansembe ale chimpiningu chidanyanyiratu mumsasa wa Afilisti, tenepo Sauli adalonga kuna iye mbati, “Nkhabe ndzidzi wakuvunza nzeru kuna MBUYA tayu.”

²⁰Penepo iye na amunache ale adenda kamenya nkhondo na Afilisti, ale akhamenyana pyawo okhokha thangwi ya kuzunguzika.

²¹Aheberi anango ale akhali kukhundu ya Afilisti, pontho ale akhadenda nawo pabodzi kumsasa kwawo, adabuluka khundu yeneyo mbaenda kakhala kukhundu ya Sauli na Yonatani.

²²Anango ale akhabisala m'mapiri m'dziko ya Eferemu adava kuti Afilisti akhathawa, tenepo iwombo adakhala gulu ibodzi kumenyana na Afilisti.

²³Iwo adaamenya njira yonsene kupiringana Beti-Aveni. MBUYA adapulumusa Aisraele nsiku yeneyo.

²⁴Aisraele adalenduka pyakwanga na njala, thangwi Sauli akhadatonga na kudumbira pikulu pene kuti, “Dzedze kuna munthu onsene anadya chinthu chamtundu onsene lero ine mbandidzati kubwezera anyamalwanga.” Tenepo nkhabe munthu adadya chinthu nsiku yeneyo.

²⁵Onsene adafika mumsitu mbagumana uchi ponsene pene.

²⁶Msituwo udadzala na uchi kwache nkhabe na mbodzi ene adadya tayu, thangwi onsenewa akhachita mantha na kutemberera kudachita Sauli kule.

²⁷Mbwenye Yonatani hadave tayu pya kutemberera kudachita babache kule; tenepo na ndodo ikhaphatira iye m'manja mwache ile adakhophola pang'ono uchi ule mbadya. Kabodzi kene mphamvu zidabwerera m'manungo mwache.

²⁸Mbwenye mbodzi penepo adalonga mbati, “Ife talenduka na njala, thangwi babako atikhondesa pakutithuswa kuti, ‘Dzedze kuna munthu onsene anadya chinthu cha mtundu onsene lero.’ ”

²⁹Yonatani adatawira mbati, “Chinthu chachita babanga kuna anthu athu ntchakugoswa pyakwanga. Ngayang'anani inetu ndina mphamvu pyakwanga, thangwi ndadya uchi pang'ono.

³⁰Anyankhondo mbadadya pinthu pyapokosera iwo anyamalwawo, mbapidakhala pyadidi pyakwanga, pontho mbadapha Afilisti akuinjipa pyakwanga.”

³¹Nsiku yeneyo Aisraele adakunda Afilisti, kumenyana nawo njira yonsene kubulukira ku Mikimashi mpakana ku Aialoni. Kufikirana ndzidzi wenewu Aisraele adalenduka pyakwanga pene na njala,

³²natenepo adathamangira kuna pinthu pikhadapokosera iwo anyamalwawo mbakwata mabira, na ng'ombe mbapicheka ponthopo, tenepo adadya nyamacheyo uku chiropa chache chikali monthomo.

³³Sauli adapangwa mbati, “Anthu akudawira MBUYA pakudya nyama uku chiropa chache chikali monthomo.” Sauli adalonga mbati, “Imwe mwadawa pikulu! Ndigulung'undisireni mwala ukulu kuna ine kuno.”[28]

³⁴Tenepo iye adalonga pontho mbati, “Ndokoni kuna anthu mbamukaapange kuti adze na ng'ombe pontho na mabirawo kuno. Iwo athema kupichekera pano mbapidyera pontho pano; iwo mbaleke dawa pamaso pa MBUYA pakudya nyama uku chiropa chache chikali monthomo tayu.” Tenepo mosiku wenewo onsenewo adadza na ng'ombe pontho mabira mbazicheka ponthopo.

³⁵Sauli adamangira MBUYA guwa yansembe, guwa idatomambo iye kuimanga ile.

³⁶Sauli adalonga kuna amunache mbati, “Tendeni tikasose Afilisti mosiku uno mbatipokosera pinthu pyawo mpakana makalakwecha mbatikaapha onsenenewo.” Iwo adatawira mbati, “Chitani pyonsene pinanyerezera imwe kuti mphyadidipyo.” Mbwenye nyansembe adalonga mbati, “Tendeni chakutoma tivunze nzeru kuna Mulungu.”

³⁷Natenepo Sauli adavunza Mulungu mbati, “Ayi tiende kasosa Afilisti? Ayi imwe munatichitisa kukunda?” Kwache Mulungu hadatawire tayu nsiku yeneyo.

³⁸Penepo Sauli adalonga kuna akadamu a Aisraele mbati, “Idzani kuno towera tione ninji chadawa ife lero.”

³⁹Ndinadumbira na dzina ya MBUYA wa moyo ule ambachitisa Aisraele kukunda kuti nyakugumanwa adawayo anati aphiwe, podi kwene kuti akhale mwananga Yonatani. Kwache nkhabe munthu na mbodzi ene adalongapo chinthu tayu.

⁴⁰Tenepo Sauli adalonga kuna iwo mbati, “Monsenene imirani apo, ine na Yonatani tinaimirambo pano.” Anthu ale adatawira mbati, “Chitani pyonsene pinaona imwe kuti mphyadidipyo.”

⁴¹Sauli adalonga kuna MBUYA Mulungu wa Israele mbati, “MBUYA mwatani mwakhonda kunditawira lero? MBUYA Mulungu wa Israele nditawireni na miyala yakupambulika. Ngakhala adawa ndine pano penu Yonatani titawireni na Urimu, mbwenye ngakhala adawa mba Aisraele[29] titawireni na Tumimu.” Kutawira kudathonya Yonatani na Sauli; tenepo anthu adapidziwa.

⁴²Sauli adalonga mbati, “Mbani adawa pakati pa mwananga Yonatani na ine pano?” Penepo Yonatani adathonywa.

⁴³Sauli adamvunza mbati, “Ninji chachita iwe?” Yonatani adatawira mbati, “Ndidadya uchi pang'ono na ndodo yanga ikhaphatira ine m'manja mwanga ile. Ndili pano; ine ndasasanyika kuphiwa.”

⁴⁴Sauli adalonga kuna Yonatani mbati, “Mulungu mbandiphe pyache iwe ungakhonda kuphiwa lero.”

⁴⁵Mbwenye anthu adalonga kuna Sauli mbati, “Ayi Yonatani adachitisa kuti Aisraele akunde ule aphiwe? Nkhabe! Ife tinadumbira na dzina ya MBUYA kuti iye hanataya tayu tsisi na ibodzi ene ya mumsolo mwache. Pyachita iye leropi apichita na chiphedzo cha Mulungu.” Tenepo anthu adapulumusa Yonatani kuti aleke phiwa.

⁴⁶Kubuluka penepo Sauli adaleka kuthamangisa Afilisti, tenepo Afilisti adabwerera kunthemba zawo.

⁴⁷Pidapita Sauli ufumu wa Israele iye adamenyana na anyamalwache konsene kwene. Enewa mbanthu a ku Moabu, Amoni, na Edomu, mafumu a ku Zoba, pontho na Afilisti. Konsene kwene kukhamenya iye nkhondo, iye akhakunda.[30]

⁴⁸Iye adamenya nkhondo mwamphamvu mbakunda Aamaleki. Tenepo iye adapulumusa Aisraele kuna anyamalwawo onsene ale.

⁴⁹Ana achimuna a Sauli akhali Yonatani, Ishivi na Malikishua. Mwanache wamkulu wamkazi akhali Merabi, pontho wamng'ono akhali Mikaela.

⁵⁰Mkazache akhali Ahinoamu mwana Ahimaazi; mkadamu wa anyankhondo ache akhali Abineri mwana wamamuna wa mbuyache Neri.

⁵¹Kishi babache Sauli na Neri babache Abineri akhali ana a Abiele.

⁵²Ndzidzi onsene wa moyo wache Sauli adamenya nkhondo zakugoswa na Afilisti, pontho ndzidzi onsene ukhagumana Sauli munthu wamphamvu penu wakuwanga mtima iye akhamuikha kukhala mbodzi wa anyankhondo ache.