Read cisena 1 SAMUELE 15 Bible Online

1 SAMUELE 15 - cisena bible

1 SAMUELE 15

¹Samuele adalonga kuna Sauli mbati, “Ine ndine ule adatumwa na Mulungu kuti ndikudzoze ufumu pakati pa Aisraele. Tenepo vesera pinalonga MBUYA.

²Penepi ndiye pinalonga MBUYA Wamphamvu zonsene kuti iye anati atchunyuse Aamaleki, thangwi makolo awo adapokanya Aisraele pikhabuluka iwo m'dziko ya Iguputo.

³Ndoko ukasose Aamaleki mbukavungiretu pyonsene pene pina iwo. Leka siya chinthu na chibodzi chene. Iphani amuna onsene, akazi, ana na akachiya ene; ng'ombe, mabira, ngamila na mabulu ene.”

⁴Sauli adachemeresa anyankhondo ache mbaaona mwadidi pa Telemu: pakhali anyankhondo pikwi madzana mawiri a ku Israele na anyankhondo pikwi khumi a ku Yuda.

⁵Penepo iye na amunache ale adenda kumzinda wa Amaleki mbadikhirira m'tsanga mumkulo wakusowa madzi.

⁶Iye adatumiza mphangwa kuna Akeni, anthu ale makolo awo adakomera mtima Aisraele pikhabuluka iwo ku Iguputo kuacheuza kuti abuluke pakati pa Aamaleki, towera aleke kuaphera kubodzi kwene na iwo. Tenepo Akeni adabulukadi.

⁷Sauli adakunda Aamaleki kuamenya njira yonsene kubulukira ku Havila mpakana ku Shuri kumabulukiro dzuwa a Iguputo.

⁸Iye adakoya na moyo Agagi mfumu wa Aamaleki mbapha anthu ache onsene na talasada.

⁹Mbwenye Sauli na anyankhondo ache hadaphe tayu Agagi mbakhonda pontho kupha mabira na ng'ombe pyadidiletu, pontho anabira na anamphulu adidiletu, penu chinthu chonsene chadidiletu; iwo adavunga kwene pinthu pile pikhali pyakupupwa pontho pyakusowa basa.

¹⁰MBUYA adalonga kuna Samuele mbati,

¹¹“Ine ndikutsamala pyakwanga kuti ndidamuikha Sauli kukhala mfumu, iye abauka kubuluka kuna ine mbakhonda kuvera matongero anga.” Samuele adazhangali pyakwanga, tenepo mosiku onsenewo adadembetera MBUYA.

¹²Mangwana mwache na machibese adenda kagumanika na Sauli. Iye adapangwa kuti Sauli akhadenda kuluwani ya Karimele kukhadapimangira iye guwa ya chikumbuso chache kule. Kubulukira penepo adenda ku Giligala.

¹³Samuele adenda kuna Sauli mbampasa mwenyikiro mbati, “MBUYA mbakutsanzayiseni imwe Samuele, ine ndavera matongero a MBUYA.”

¹⁴Samuele adamvunza mbati, “Apo ninji ndikuva kulira kwa mabira na ng'ombe?”

¹⁵Sauli adatawira mbati, “Amunanga apikwata kuna Aamaleki. Iwo adakoya mabira na ng'ombe zadidiletu towera tikapipereke nsembe kuna MBUYA Mulungu wanu; pyakusalirapyo tamala kupivunga.”[31]

¹⁶Samuele adalonga mbati, “Matama ndikupange pyandipanga MBUYA mosiku wagwandawu.” Sauli adalonga mbati, “Ndipangeni.”

¹⁷Samuele adatawira mbati, “Kale iwe udapiona pyako ninga munthu wakusowa basa, mbwenye iwe wasanduka mkadamu wa madzinza a Israele. MBUYA adakudzoza kukhala mfumu wa ku Israele,

¹⁸tenepo iye adakutonga kuti uende kavunga Aamaleki, anthu akudawika ale. Iye adakupanga kuti ukamenye nawo nkhondo mpakana wamala kuapha onsene.

¹⁹Apo thangwi yache ninji iwe hudavere MBUYA tayu? Thangwi yache ninji udathamangira kukwata pinthu pidapokosera imwe mbuchita chinthu chokhonda komera MBUYA?”

²⁰Sauli adatawira mbati, “Ine ndidavera MBUYA, ine ndidachita pyonsene pyandipanga MBUYA. Ine ndavunga monsene mwene Aamaleki mbandidza na mfumu wawo Agagi.

²¹Anyankhondo anga akwata mabira na ng'ombe kubulukira pa pinthu pidapokosera ife, pinthu pyadidiletu pidapambulirwa kuna MBUYA, towera apipereke nsembe kuna MBUYA Mulungu wanu kuno ku Giligala.”

²²Samuele adalonga mbati, “Chinafuna MBUYA ninji, kuvera, penu kupereka nsembe zakupyerera na pyakupereka pinango? Mphyadidi kuvera MBUYA kusiyana na kupereka nsembe kuna iye mabira adidiletu.

²³Kupandukira MBUYA nkhwakuipa pyakwanga ninga ufiti, pontho kutumbama nkhwakuipa pyakwanga ninga kupembedza mifanikizo. Na thangwi yakuti iwe wakhonda kuvera matongero a MBUYA, iyembo akukhonda kuti ukhale mfumu.”

²⁴Sauli adatawira mbati, “Ande, ine ndadawa. Ine ndaswa matongero a MBUYA mbandikhonda kuchita pidandipanga imwe pile. Ine ndikhachita mantha na anyankhondo anga tenepo ndidachita ninga mukhapifunira iwo.

²⁵Chinchino ndikukupemphani kuti mundilekerere kudawa kwanga mbatibwerere pabodzi pene, towera ndikwanise kapembedza MBUYA.”

²⁶Samuele adatawira mbati, “Ine nkhabe kwenda nawe pabodzi tayu, thangwi iwe wakhonda kuvera matongero a MBUYA, tenepo iye akukhondambo kukhala mfumu wa ku Israele.”

²⁷Penepo Samuele adazungunuka kuti aende pyache, mbwenye Sauli adaphata chakufinika chache mbuching'amba.

²⁸Samuele adalonga kuna iye mbati, “MBUYA ang'amba ufumu wa Israele lero kubulukira kuna iwe mbaupereka kuna munthu unango wadidi kupiringana iwepo.

²⁹Mulungu, ule ndi Mphamvu za Israele nkhabe nama, penu kusanduza manyerezero ache tayu. Iye si munthu tayu kuti asanduze manyerezero ache.”

³⁰Sauli adatawira mbati, “Ine ndadawa, kwache ndaphata miyendo, ndilemedzenimbo pamaso pa akulu-akulu a anthu anga pontho Aisraele onsene. Bwererani pabodzi pene na ine, towera ndikakwanise kupembedza MBUYA Mulungu wanu.”

³¹Natenepo Samuele adabwerera naye pabodzi pene, Sauli mbakapembedza MBUYA.

³²Tenepo Samuele adalonga mbati, “Idza naye kuno Mfumu Agagi. Tenepo Agagi adadza kuna iye uku akutetemera na mantha, kunyerezera mumtima mwache kuti kufa ntchinthu chakupha pyakwanga.[32]

³³Ninga mudachitira talasadako kuchitisa akazi azinji kukhala akusowa ana, tenepombo mako anakhala wakusowa ana.” Penepo iye adagwanda Agagi mapindi-mapindi patsogolo pa guwa yansembe ku Giligala.

³⁴Kubuluka penepo Samuele adenda ku Rama, tenepo Mfumu Sauli adenda kwawo ku Gibea.

³⁵Ndzidzi onsene ukhali Samuele na moyo hadamuone pontho mfumu tayu, mbwenye iye adasintili thangwi ya Sauli. MBUYA adatsamala, thangwi adaikha Sauli kukhala mfumu wa ku Israele.