Read cisena 1 SAMUELE 17 Bible Online

1 SAMUELE 17 - cisena bible

1 SAMUELE 17

¹Afilisti adagumanyikana ku Soko luwani ya Yuda kuti achite nkhondo; iwo adamanga msasa pa Efesi-Damimu pakati pa Soko na Azeka.

²Sauli na Aisraele adagumanyikana mbamanga msasawo paphedi ya Ela kule kudasasanyika iwo kumenyana na Afilisti.

³Afilisti adandandalika paphiri ibodzi, pontho Aisraele paphiri inango, pakati pawo pakhali phedi.

⁴Munthu unango dzinache Goliati wa kumzinda wa Gati adabuluka mumsasa wa Afilisti mbapikira Aisraele. Iye akhali wakulapha chifupi-fupi makhono matatu,

⁵pontho adavala pida pyankuwa pyakulemera ninga makilogramu makumashanu na manomwe, pontho na chipewu chankuwa.

⁶M'miyendo mwache mukhali pyakutchingira pyankuwa, pontho iye adathukula dipa yankuwa paphewa pache.

⁷Dipache ikhali na ntchindu pyakwanga ninga mtanda wakulukira nguwo, msolo wa dipayo ukhalemera makilogramu manomwe. Nyakuthukula chakugedera matswimo chache adadza patsogolo pache.

⁸Goliati adaimira mbakhuwa kuna anyankhondo a Aisraele mbati, “Kadi imwe mukuchitanji kweneko kumala ndandalika kufuna nkhondo? Ine ndine Mfilisti, imwe ndimwe mabitchu a Sauli! Sankhulani munthu mbodzi wa imwe kuti amenyane na ine pano.

⁹Ngakhala iye anandikunda mbandipha, ife tinasanduka mabitchu anu; mbwenye ngakhala ine ndinamkunda mbandimpha, imwe munasanduka mabitchu athu.

¹⁰Chinchino pano ndikupikira anyankhondo a Aisraele. Ndipaseni munthu mbodzi wakuti ndimenyane naye.”

¹¹Pidava Sauli na amunache penepi adagoswerwa pyakwanga pene.

¹²Davite akhali mwana wa mamuna wa Yese wa dzinza ya Eferemu wa kumzinda wa Betelehemu, m'nthemba ya Yuda. Yese akhali na ana asere achimuna, tenepo pandzidzi ukhali Sauli mfumu, iye adakalamba pyakwanga pene mbakhala na pyaka pizinji pyakubalwa.

¹³Anache achimuna akulu-akulu atatu akhaenda kunkhondo na Sauli. Eliabu mwanache wamkululetu, wachiwiri akhali Abinadabu, wachitatu akhali Shama.

¹⁴Davite akhali wamng'onoletu, tenepo pikhakhala abale ache atatu ale na Sauli,

¹⁵Davite akhabwerera ku Betelehemu kazinji kene kayang'anira mabira a babache.

¹⁶Goliati adapikira Aisraele machibese na mawulo onsene nsiku makumanayi.

¹⁷Nsiku inango Yese adalonga kuna Davite mbati, “Kwata makilogramu khumi a mapira akuotcha na mikate khumi mbuchimbize kwenda napyo kuna abale ako kumsasa.

¹⁸Kwata pabodzi pene na mafuta amkaka ukapereke kuna mkadamu wa gulu yawo. Ndoko ukaone ngakhala abale ako ali pyadidi, pontho udze na chinthu chakutsikimizira kuti iwo ali pyadidi, pontho kuti iwe waaonadi.

¹⁹Mfumu Sauli, abale ako pabodzi pene na Aisraele anango onsene ali kuphedi ya Ela kumenyana na Afilisti.”

²⁰Mangwana mwache na machibese Davite adalamuka mbasiyira munthu unango kuyang'anira mabira. Tenepo adakwata pyakudya pile mbaenda ninga montho mudampangira Yese. Iye adafika kumsasa kule pikhaenda Aisraele kakhala m'mbuto zawo kusasanyikira nkhondo uku akukhuwa mafala ankhondo.

²¹Anyankhondo a Aisraele na Afilisti adakhala m'mbuto zawo zankhondo mwakuyang'anisana.

²²Davite adasiyira pyakudya pile nyakuyang'anira mitolo, tenepo adathamangira kukhadandandalika anyankhondo kule mbaenda kuna abale ache. Iye adaavunza kuti iwo akhali tani.

²³Pikhalonga iye nawo, Goliati adabuluka pakwecha mbapikira Aisraele ninga mukhachitira iye pakutoma. Tenepo Davite adapiva.

²⁴Pidaona Aisraele Goliati adathawa na mantha.

²⁵Iwo akhalonga unango na mwanzache mbati, “Ngamuyang'aneni! Ngavani kupikira kunachita iyeku! Mfumu Sauli adumbira kupereka mfupo ukulu kuna munthu anamphayo; pontho mfumu anampasa mwanache wamkazi kuti akhale mkazache, pontho kuti banjache nkhabe dzafunika kukhoma msonkho tayu.”

²⁶Davite adavunza amuna akhali chifupi na iye ale mbati, “Kadi munthu anafuna kupha Mfilisti mbabulusira Aisraele chinthu chakuchitisa manyadzochi anapaswanji? Mfilistiyu, munthu okhonda dziwa Mulungu ule mbani kuti alulupise anyankhondo a Mulungu wamoyo?”

²⁷Iwo adampanga pinthu pinafuna dzachitika kuna munthu wakupha Goliati.

²⁸Eliabu, nanache Davite wamkululetu adamva akulonga na anthu, natenepo iye adazhangalira Davite mbamvunza mbati, “Kadi iwe ukuchitanji kuno? Mbani akuyang'anira mabirako kuthando? Iwe mwana wakulunkuma, pontho wakuipa mtima! Ayi iwe wadza kwene dzaona nkhondo kuno?”

²⁹Davite adavunza mbati, “Kadi ine ndatani? Ayi ndileke na kuvunza kwene?”

³⁰Iye adazungunukira kuna amuna anango mbavunza chibodzi-bodzi, tenepo ndzidzi onsene ukhavunza iye, akhatawirwa chibodzi-bodzi.

³¹Amuna anango adava pikhalonga Davite pile mbakapilonga kuna Sauli, ule adamchemeresa.

³²Davite adalonga kuna Sauli mbati, “Mfumu, paleke khala munthu wakugopa Mfilistiyu. Ine ndinati ndiende kamenyana naye.”

³³Sauli adatawira mbati, “Tayu, unakwanisa tani kamenyana naye weneyu? Iwe ndiwe mphale pyako, pontho iye akhala nyankhondo moyo wache onsene!”

³⁴Davite adalonga mbati, “Mfumu, ine ndimbayang'anira mabira ababanga. Tenepo ndzidzi onsene nkhalamu penu thika angaphata mwanabira,

³⁵ine ndimbaenda kampulumusa mwanabira kukanwa kwache. Pontho ngakhala nkhalamu penu thika anandipomokera, ine ndimbamshipa pakhosi mbandimmenya mpakana kumpha.

³⁶Ine ndapha nkhalamu pontho matika, tenepo ndinati ndichite chibodzi-bodzi kuna Mfilisti okhonda dziwa Mulungu ule akululupisa anyankhondo a Mulungu wamoyo.

³⁷MBUYA adandipulumusa kuna nkhalamu na matika, tenepo iye anati andipulumuse kuna Mfilistiyu.” Sauli adatawira mbati, “Ndoko, MBUYA mbakhale nawe.”

³⁸Iye adapasa Davite mayala ache; chipewu chankuwa, pontho chakuvala chakutchinga nacho manungo ache kuti avale.

³⁹Davite adamangirira talasada ya Sauli mbayesera kufamba, kwache iye adachimwana kufamba napyo, thangwi iye hadazerewere kupivala tayu. Iye adalonga kuna Sauli mbati, “Ine nkhabe kwanisa kumenya na pyonsenepi tayu. Ine sidapizerewere tayu.” Tenepo iye adadula pyonsenene pile.

⁴⁰Iye adakwata ndodo ya umakabuswache mbalokota miyala mishanu yakubulungira mumkulo mbaiikha m'thumba mwache pontho na mbemba m'manja mwache mbaenda kukhali Mfilisti ule.

⁴¹Mfilisti ule adatoma kufamba kwendera kuna Davite uku patsogolo pache pakhali nyakuthukula chakugedera matswimo chache. Iye adathimiza kudza chifupi na Davite.

⁴²Tenepo pidamuona iye mwadidi Davite ule, iye adamululupisa, thangwi iye akhali mphale ene pyache wa manungo adidi pontho wakubalika.

⁴³Iye adalonga kuna Davite mbati, “Ayi ndodo ina iweyo njanji nayo? Kadi ukunyerezera kuti ndine mwanambwa?” Natenepo Mfilisti ule adatemberera Davite na dzina ya milungu yache.

⁴⁴Iye adapikira Davite mbati, “Idza kuno, ine ndinati ndipereke manungo ako kuna mbalame na nyama zam'tsanga kuti aadye.”

⁴⁵Davite adatawira mbati, “Iwe ukudza kuna ine na talasada, dipa na momba, mbwenye ine ndikudza kuna iwe na dzina ya MBUYA Wamphamvu zonsene, Mulungu wa anyankhondo a Israele analulupisa iwe ule.

⁴⁶Lero ene pano MBUYA anati akuikhe m'manja mwanga, ndinati ndikukunde mbandikugwanda msolo wako. Pontho ndinapereka mitembo ya anyankhondo a Chifilisti kuna mbalame na kuna nyama zam'tsanga kuti zidye. Tenepo dziko yonsene yapansi inati idziwe kuti Israele ana Mulungu.

⁴⁷Pontho munthu onsene pano anati aone kuti MBUYA nkhabe funa talasada penu dipa kupulumusa napyo anthu ache. Iye ngwakukunda pankhondo, tenepo Iye anati akuikheni monsenene m'manja mwathu.”

⁴⁸Goliati adatoma pontho kwendera kukhali Davite kule, tenepo Davite adathamangira kabodzi kene kukhadandandalika anyankhondo a Chifilisti kule kuti amenyane naye.

⁴⁹Iye adapitisa m'thumba mwache mbakwata mwala kuikha pambemba pache, tenepo adaiponya kuna Goliati. Mwala ule udammenya pachipumu chache mbupita mumsolo mwache, penepo Goliati adagwa na fufumimba.

⁵⁰Natenepo Davite mwakukhonda phatisa basa talasada, adakunda na kupha Goliati na mwala pontho mbemba.

⁵¹Iye adathamanga kuna iye mbamponderera. Iye adasolola talasada ya Goliati mbagwanda nayo msolo wache mbampha. Pidaona Afilisti kuti dombo wawo afa, iwo adathawa.

⁵²Amuna a ku Israele na Yuda adakhuwa mbaathamangisa njira yonsene mpakana ku Gati[33] na kumsuwo wa mzinda wa Ekroni. Afilisti akukuwazwa adagwa kufa njira yonsene mpakana ku Shaaraimu, Gati na Ekroni.

⁵³Pidabwerera Aisraele kubulukira kathamangisa Afilisti, iwo adakwata pinthu mumsasa mwawo mule.

⁵⁴Davite adalokota msolo wa Goliati mbaenda nawo ku Yerusalemu, kwache iye adakoya pida pya Goliati m'khumbi mwache.

⁵⁵Pidaona Sauli kuti Davite akhaenda kamenyana na Goliati, iye adavunza Abineri mkadamu wa anyankhondo ache mbati, “Ayi Abineri, weneyu ndi mwana ani?” Abineri adatawira mbati, “Ine nkhabe kupidziwa tayu, Mfumu.”

⁵⁶Sauli adalonga mbati, “Ndoko ukavunze mwadidi.”

⁵⁷Tenepo pidabwerera Davite kumsasa pidapha iye Goliati, Abineri adenda na Davite kuna Sauli, mwenemo Davite aphatirira msolo wa Goliati m'manja mwache.

⁵⁸Sauli adamvunza mbati, “Ayi mphalewe ndiwe mwana ani?” Davite adatawira mbati, “Ndine mwana nyabasanu Yese wa ku Betelehemu.”