Read cisena 1 SAMUELE 18 Bible Online

1 SAMUELE 18 - cisena bible

1 SAMUELE 18

¹Sauli na Davite adamala kulongesana kukhachita iwo kule. Kubuluka penepo, Yonatani mwana wa mamuna wa Sauli adatenuka mtima na Davite mbamfuna pyakwanga pene ninga mukhapifunira iye yekha ene.

²Kubulukira nsiku yeneyo Sauli adakoya Davite m'nyumba mwache, pontho hadamtawirise kubwerera kwawo tayu.

³Yonatani adadumbira kuchita ushamwali na Davite kwenda na kwenda, thangwi ya kumfuna kwache kukulu.

⁴Iye adadula mkhanjo na mayala pikhavala iye pile mbampasa Davite, pabodzi pene na talasadache, uta na bande.

⁵Davite akhali munthu wakupikwanisa pabasa yonsene ikhamtuma Sauli. Natenepo Sauli adauikha kukhala mkadamu wa anyankhondo ache. Penepi pidakomera akadamu na amuna onsene a Sauli.

⁶Pikhabwerera Davite na anyankhondo kwawo kubulukira kudapha iye Mfilisti kule, akazi akhabuluka m'maluwani onsene mu Israele kagumana na Mfumu Sauli. Iwo akhaimba nyimbo zakuonesa kukomerwa kwawo, kuvina pontho na kuimba pisekese na malimba.

⁷Mwakukomerwa kwawo akazi akhaimba mbati, “Mfumu Sauli apha anthu pikwi, mbwenye Davite apha pikwi khumi na kumanyalo.”

⁸Sauli adaswirizwa napyo mbazhangali pyakwanga mbalonga mbati, “Pya Davite iwo akulonga kuti apha pikwi khumi na kumanyalo, mbwenye pya ine iwo akulonga pikwi basi. Kwasala anati ampitise ufumu!”

⁹Natenepo iye adachita bivu mbapenuka naye Davite kubulukira nsiku yeneyo kwenda m'tsogolo.

¹⁰Mangwana mwache mzimu wakuipa wakutumizwa na Mulungu udamgudumira Sauli kabodzi kene, natenepo adatsanda-tsanda pyache m'nyumba mwache ninga nyansala. Davite akhaimba nyakatangale ninga mukhachitira iye nsiku zonsene. Sauli akhaphatira dipa m'manja mwache.

¹¹Iye adalonga yekha ene mbati, “Ndinati ndimkhomere kufufu.” Tenepo iye adamponyera dipa ile kawiri, kwache Davite adaimzwenga ndzidzi onsene uwiriwo.

¹²Sauli akhachita mantha na Davite, thangwi MBUYA akhadamkhonda, mbwenye akhali na Davite.

¹³Natenepo Sauli adambulusa m'nyumba mwache mbamuikha kukhala mkadamu wa anyankhondo chikwi. Davite adatsogolera amunache ale pankhondo,

¹⁴pontho akhali wakupikwanisa papinthu pyonsene pikhachita iye, thangwi MBUYA akhali naye.

¹⁵Sauli adadzindikira pya kupikwanisa kwa Davite mbanyanyiratu kuchita naye mantha.

¹⁶Mbwenye munthu onsene mu Israele na Yuda adamfuna Davite, thangwi akhali mkadamu wakupikwanisa.

¹⁷Kubuluka penepo Sauli adalonga kuna Davite mbati, “Ushu Merabi mwananga wamkazi wamkulu. Ndinakupasa kuti akhale mkazako, kwache wathema kunditumikira mwakuwanga mtima pontho mwakukhulupirika mbumenya nkhondo ya MBUYA.” Sauli akhanyerezera kuti na njira yeneyi Afilisti anati aphe Davite mbakhonda kupichita ndiye ene.

¹⁸Davite adatawira mbati, “Ndine animbo ine, pontho banjanga ninji penu mbumba ya babanga mu Israele kuti ndikhale mkamweneache mfumu.”

¹⁹Mbwenye pidafika ndzidzi wakuti Merabi aperekwe kuna Davite, m'mbuto mwache iye adaperekwa kuna mamuna unango dzinache Adriele wa ku Mehola.

²⁰Kwache Mikaela mwana unango wa Sauli adamfuna Davite, tenepo pidapiva Sauli adakomerwa napyo pyakwanga.

²¹Iye adalonga yekha ene mbati, “Ndinati ndipereke Mikaela kuna Davite. Ine ndinamphatisa basa ninga msampha, tenepo iye anamphesa na Afilisti.” Tenepo Sauli adalonga kachiwiri kache kuna Davite mbati, “Iwe unati ukhale mkamweneanga.”

²²Sauli adapanga mathubu ache kulonga kuna Davite chibiso-biso mbati, “Mfumu akomerwa nawe pontho mathubu ache onsene ambakufuna; uno ndi ndzidzi wadidi wakuti iwe usembe mwanache.”

²³Iwo adampanga Davite penepi, tenepo iye adatawira mbati, “Chenechi ntchilemedzo chikulu pyakwanga kukhala mkamweneache mfumu, chikulu pyakwanga kuna munthu wakutcherenga pontho okhonda funika ninga ine.”

²⁴Mathubu adapanga Sauli pidalonga Davite pile,

²⁵natenepo Sauli adaatonga kupanga Davite kuti, “Pinafuna mfumu pene ninga chuma kupagali mwanache ndi nsonga zakumaso zachimuna dzana za Afilisti kubwezera anyamalwache.” (Yeneyi ndi njira ikhadasasanya Sauli kuti Davite aphiwe na Afilisti.)

²⁶Mathubu adapanga Davite pidalonga Sauli pile, tenepo Davite adakomerwa pyakwanga na kukhala mkamweneache mfumu. Nsiku yakukazhali mbidzati khazikiswa

²⁷Davite na amunache adenda mbakapha amuna madzana mawiri a Afilisti. Iye adagwanda nsonga zawo zakumaso kwenda nazo kuna mfumu mbakamulengesera zonsenezo, towera akhale mkamweneache mfumu. Penepo Sauli adathema kupereka Mikaela mwanache kuti asembwe na Davite.

²⁸Sauli adadzindikira mwadidi mwene kuti MBUYA akhali na Davite, pontho kuti Mikaela mwanache akhamfuna Davite.

²⁹Tenepo iye adachita mantha pyakwanga pene na Davite mbakhala nyamalwache ndzidzi onsene ukhali iye na moyo.

³⁰Anyankhondo a Chifilisti akhadza mbachita naye nkhondo, kwache nkhondo yonsene Davite akhakunda kupiringana akadamu anango a nkhondo a Sauli. Natenepo Davite adasanduka wakuveka pyakwanga.