Read cisena 1 SAMUELE 2 Bible Online

1 SAMUELE 2 - cisena bible

1 SAMUELE 2

¹Hana adapemphera mbati, “MBUYA adzaza mtimanga na kukomerwa; ndakomerwa pyakwanga thangwi ya pinthu pyachita iye! Mulomo wanga ukugaya pana anyamalwanga; ndakomerwa pyakwanga na kundipulumusa kwachita Mulungu!

²“Nkhabe unango wakuchena ninga MBUYA; nkhabe unango ninga iye tayu, nkhabe Phanzwi inango ninga Mulungu wathu tayu.

³Lekani kulonga mwakulunkuma kunachita imweko; matamisani milomo yanu yakugayayo. Thangwi MBUYA ndi Mulungu ule ambadziwa, pontho iye ambatonga pyonsene pimbachita anthu pile.

⁴Mauta a anyankhondo amphamvu amala tchoka-tchoka, mbwenye anyakusowa mphamvu apaswa mphamvu.

⁵Anthu akhakhuta ale, lero akuchita ganyo towera agumane phoso, mbwenye anyakukhala na njala akhuta. Mkazi wakuuma nthumbo ule, lero abala ana anomwe, mbwenye mama wa ana azinji ule, lero akukhumata.

⁶MBUYA ambapha mbabwezera pontho moyo; iye ambagwinya anthu kudziko ya anyakufa mbaabwezako pontho.

⁷Iye ambachitisa anthu anango kukhala akutcherenga, anango mbaachitisa kukhala akufuma; iye ambachepesa anango, anangombo iye ambaakuza.

⁸Iye ambalamusa anyakutcherenga kufumbi mbabulusa anyakusowa pamulu wa dotha. Iye ambaachitisa kukhala pabodzi na mafumu mbaapasa mpando wachilemedzo. Maziko a dziko yapansi nga MBUYA; penepo iye amangapo dziko yonsene yapansi.

⁹“Iye ambayang'anira mwadidi moyo wa anthu ache akukhulupirika, mbwenye anyakudawika ambamaliratu mumdima; si mphamvu zache zene munthu zimbamchitisa kukunda tayu.

¹⁰Anyamalwa a MBUYA ananyedzwa-nyedzwa; iye anagwisa chiphaliwali pana iwo kubulukira kudzulu. MBUYA anatonga mseru anthu a dziko yonsene yapansi; iye anapereka mphamvu kuna mfumu wache mbachitisa mfumu wache wakusankhulika kukunda.”

¹¹Tenepo Elikana adabwerera kwawo ku Rama, mbwenye mwana Samuele adasalira ku Shilo mbatumikira MBUYA pansi pa Eli nyansembe.

¹²Ana achimuna a Eli akhali akudawika mbakhonda tsalakana pya MBUYA,

¹³penu matongero ache akulonga pya pinthu pidathema anyansembe kutambira kuna anthu. M'mbuto mwache munthu angapereka nsembe nyabasa wa anyansembe akhadza na chakujobolera nyama chakukhala na nsonga zitatu. Mwenemo nyama ikuterekwa, iye

¹⁴akhapitisa chakujoboleracho m'phale, m'chiwaya penu m'chikalango, tenepo chinthu chonsene chikhajobolwacho chikhali cha nyansembe. Aisraele onsene ale akhadza ku Shilo dzapereka nsembe akhachitwambo basi ninga tenepo.

¹⁵Pontho mafuta mbadzati otchiwa, nyabasa wa nyansembe akhadza kuna munthu anapereka nsembe ule mbalonga mbati, “Ngandipaseni kuno nyama kuti nyansembe aiotche; iye nkhabe tawira nyama yakutereka tayu mbwenye iwisi ene basi.”

¹⁶Ngakhala munthuyo anatawira mbati, “Chakutoma aotche mafutawa, kubuluka penepo munakwata pyanu pyonsene pinafunikapyo.” Nyabasa wa nyansembeyo akhalonga mbati, “Tayu, ndipase chinchino pano. Mungakhonda kuipereka ndinati ndiikwate mwakukhakhamiza.”

¹⁷Kudawa kwa ana a Eli kukhali kwakuipa pyakwanga pamaso pa MBUYA, thangwi iwo akhalulupisa nsembe ya MBUYA.

¹⁸Pandzidzi wenewo mphale Samuele adathimiza kutumikira MBUYA uku avala efodi wa nguwo yakuchena.

¹⁹Chaka na chaka mache akhamsasanyira mkhanjo kampasa pikhaenda iye pabodzi pene na mamunache kapereka nsembe ya chaka na chaka.

²⁰Penepo Eli akhatsanzayisa Elikana na mkazache mbalonga kuna Elikana mbati, “MBUYA mbakupase ana anango na mkazi weneyu, towera akwate mbuto ya mwana apambulira iwe kuna MBUYA.” Kubuluka penepo iwo akhabwerera kwawo.

²¹MBUYA adatsanzayisadi Hana, tenepo iye adabala ana anango achimuna atatu na achikazi awiri. Mphale Samuele adakula akuphatira basa MBUYA.

²²Ndzidzi wenewu Eli adakalamba pyakwanga. Iye akhava basi pikhachita anache kuna Aisraele pontho kuti akhachita pyauputa na akazi akuphata basa pamsuwo wa Chikhumbi cha Mulungu chile.

²³Tenepo iye adalonga kuna iwo mbati, “Ayi munachitiranji pinthu ninga penepi? Munthu onsene akundipanga pyakuipa pinachita imwepi.

²⁴Ananga, lekani pinachita imwepi. Mbiri inaveka pakati pa anthu a MBUYA si yadidi tayu.

²⁵Ngakhala munthu adawira mwanzache Mulungu anakwanisa kumuikhira kunduli; apo mbani anakwanisa kuikhira kunduli munthu wakudawira MBUYA?” Kwache iwo hadavesere babawo tayu, thangwi MBUYA adanyerezera pyakuapha.

²⁶Mphale Samuele adathimiza kukula na makhaliro akukomera MBUYA na anthu ene.

²⁷Mprofeti adadza kuna Eli na mphangwa zakubulukira kuna MBUYA mbati, “Pikhali kholo yako Aroni na banjache mabitchu a mfumu wa ku Iguputo, ine ndidapionesera ndekha ene kuna Aroni.

²⁸Ine ndidasankhula makolo ako pakati pa madzinza khumi na awiri a Israele kukhala nyansembe wanga kuti andiphatire basa paguwa yansembe, kupyereza pyakufukiza pyakununkhira, pontho kuvala efodi pamaso panga. Inembo ndidaapasa utongi kukwata khundu inango ya nsembe zidapyereza Aisraele zile.

²⁹Thangwi ninji munalulupisa nsembe na pyakupereka pidatonga ine kuti anthu anga andipase? Thangwi ninji iwe Eli ukulemedza anako piringana ine pakuatawirisa kupinenepesa okha ene na khundu zadidiletu za nsembe zonsene zinapereka anthu anga kuna inezi?

³⁰Ine, MBUYA Mulungu wa Israele, ndidadumbira m'nduli mule kuti banjako na mbumbako munanditumikira ninga anyansembe ndzidzi onsene. Mbwenye chinchino ndikulonga kuti ine nkhabeve napyo pinthu tayu. M'mbuto mwache ine ndinalemedza anyakundilemedzambo, pontho ndinalulupisa anyakundilulupisa onsene.

³¹Ndzidzi ukudza unafuna ine dzapha aphale onsene m'banja mwako, pontho na m'mbumba mwako, towera paleke khala mwana na mbodzi ene m'banja mwako wakukhala na moyo mpakana kukalamba tayu.

³²Iwe unaipirwa na mtsanzayiso onsene unafuna ine dzaupereka kuna anthu anga anango onsene mu Israele, kwache nkhabe na mbodzi ene m'banja mwako anakhala na moyo mpakana kukalamba tayu.

³³Kwache ndingakoya na moyo chidzukulu chako chibodzi, iye anakhala nyansembe wanga, mbwenye iye[7] anasanduka boli-boli thangwi ya kulira mbatayiratu chidikhiro chache chonsene, pontho pidzukulu pyache pyonsene pinaphiwa na talasada.

³⁴Anako awiri achimuna ale, Hofini na Finiasi, angafa pansiku ibodzi ene, penepi pinakuonesa kuti pyonsene pyalonga ine pinakwana-kwana.

³⁵Ndinasankhula nyansembe ule anakhala wakukhulupirika kuna ine mbachita pyonsene pinafuna ine kuti apichite pile. Ine ndinampasa pidzukulu, pile ndzidzi onsene pinatumikira pamaso pa mfumu wanga wakusankhulika.

³⁶Chidzukulu chako chonsene chile chinasala na moyo chathema dzaenda kuna nyansembe mbakapempha kobiri na phoso, pontho kuti amtawirise kuphedza nyansembe, towera akwanise kugumana chinthu chakuti adye.”