Read cisena 1 SAMUELE 20 Bible Online

1 SAMUELE 20 - cisena bible

1 SAMUELE 20

¹Tenepo Davite adathawira ku Naioti ku Rama mbaenda kuna Yonatani. Iye adamvunza mbati, “Ayi chadawa ine ninji? Mseru wache wasosa ine ngwanji? Chadawira ine babako ninji chakuti afune pyakundipha?”

²Yonatani adatawira mbati, “Mulungu akhonda kuti iwe ufe! Babanga ambandipanga pyonsene pimbachita iye chakufunika penu tayu, pontho iye nkhabe kundibisira penepi tayu. Penepyo si pyakuona tayu.”

³Mbwenye Davite adatawira mbati, “Babako akudziwa mwadidi mwene kundifuna kumbachita iwe, tenepo iye anyerezera kukubisira pinafuna iye kuchita, thangwi pinakuchitisa kutsukwala pyakwanga pene. Ndinadumbira kuna iwe na dzina ya MBUYA kuti ndili kwene thanyo ibodzi basi na imfa!”

⁴Yonatani adatawira mbati, “Ine ndinati ndichite pyonsene pinafuna iwepyo.”

⁵Mbwenye Davite adatawira mbati, “Mangwana ndi Phwando yakusekera Kubalwa kwa mwezi, tenepo ine ndathema kudya pabodzi pene na mfumu. Mbwenye ngakhala pyonsene mphyadidi kuna iwe, ine ndinati ndiende kabisala kuminda mpakana mkuchono na mawulo.

⁶Ngakhala babako anakandisowa pathebulupo kampange kuti iwe wanditawirisa kwenda kwathu ku Betelehemu kapereka nsembe za pachaka pabodzi pene na banjathu yonsene.

⁷Ngakhala iye analonga kuti, ‘Pyakoma,’ penepo ine ndapulumuka. Mbwenye ngakhala anazhangali napyo, penepo unapidziwa kuti ana phinga kufuna kundikuwaza.

⁸Ndaphata miyendo ndikomerembo mtima pakukoya kudumbira kudachita iwe kuna ine kule. Mbwenye ngakhala ine ndadawa, iwe ene undiphe pyako! Thangwi yache njanji kuti uende nane kuna babako kuti akandiphe?”

⁹Yonatani adatawira mbati, “Leka nyerezera pinthu ninga penepyo! Ngakhala ine ndikhapidziwa mwadidi kuti babanga akuchita phinga kufuna kukupha, ine mbidakupanga.”

¹⁰Penepo Davite adavunza mbati, “Mbani anafuna kundidziwisa kuti babako akutawira mwakuzhangali?”

¹¹Yonatani adatawira mbati, “Tende kuminda.” Tenepo iwo adenda,

¹²Yonatani adalonga kuna Davite mbati, “MBUYA Mulungu wa Israele mbakhale mboni yathu![35] Pandzidzi ninga uno mangwana ndinamvunza babanga, tenepo ngakhala manyerezero ache kuna iwe ngadidi, ndinati ndikutumire mphangwa.

¹³Mbwenye ngakhala iye anafuna pyakukupha, MBUYA mbandiphe pyache ngakhala sinakudziwisa penu kukuthawisa kukutchinjiriza tayu. MBUYA mbakhale nawe ninga mukhachitira iye kuna babanga!

¹⁴Ngakhala ndinakhala na moyo koya chiverano chakupambulika chachita iwe chile mbukhulupirike kuna ine; mbwenye ngakhala ndinafa,[36]

¹⁵onesa sasawa kuna banjanga yonsene kwenda na kwenda kukhulupirika kwako. Tenepo MBUYA angavunga monsene mwene anyamalwako onsene,

¹⁶chiverano chathu chachita ifechi chithimize kukhalapo. Ngakhala chinasweka, MBUYA anati akutchunyuse.”

¹⁷Yonatani adachitisa Davite kudumbira pontho kutsikimizira kumfuna kwache, thangwi Yonatani akhamfuna pyakwanga Davite ninga mukhapifunira iye yekha ene.

¹⁸Tenepo Yonatani adalonga kuna Davite mbati, “Podi Mangwana ndi Phwando yakusekera Kubalwa kwa mwezi, pinati pidziwike kuti iwe nkhabepo paphwandopo.

¹⁹Mkuchono kusowa kwako paphwandopo ndiye kunanyanya kudziwika; tenepo ndoko kumbuto kudabisala iwe pakutoma kule mbukabisale kunsi kwa mulu wa miyala.

²⁰Ine ndinati ndiponye matswimo matatu penepo ninga kuti ndiye pikhanyerezera ine.

²¹Ndinatuma nyabasanga kaalokota. Tenepo ngakhala ndinampanga kuti, ‘Yang'ana matswimo ali kukhundu kwako uko alokote, penepo nkhulonga kuti wapulumuka, pontho unakwanisa kubulukapo. Ndinadumbira na dzina ya Mulungu wa moyo kuti nkhabe chinthu na chibodzi chene chinafuna kukugoswa tayu.’

²²Mbwenye ngakhala ndinampanga kuti, ‘Matswimo ali kukhundu kwako uko,’ penepo thawa, thangwi MBUYA akukuthawisa.

²³Kulonga pya chiverano chachita ife kuna unango na mwanzache, MBUYA anaonesesa kuti tikuchikoya kwenda na kwenda.”

²⁴Tenepo Davite adabisala kuminda. Pidafika Phwando yakusekera Kubalwa kwa Mwezi Mfumu Sauli adakhala pansi kudya,

²⁵mbakhala pambuto pache pandzidzi onsene chifupi na fufu. Abineri adakhala chifupi naye, Yonatani adakhala mwakuyang'anisana naye.[37] Pambuto ya Davite pakhali nkhabe munthu.

²⁶Kwache Sauli hadalonge pinthu tayu nsiku yeneyo thangwi akhanyerezera kuti chinthu chinango chidachitika kuna iye tenepo iye hakhali wakuchena tayu.

²⁷Mangwana mwache pidagwanda Phwando yakusekera Kubalwa kwa Mwezi pampando wa Davite pakhali nkhabe munthu basi, tenepo Sauli adavunza Yonatani mbati, “Thangwi yache ninji Davite hadakhale nafe tayu pa phwando pano dzulo na lero?”

²⁸Yonatani adatawira mbati, “Iye adandipempha kuti ndimtawirise kwenda ku Betelehemu mbati,

²⁹‘Ndaphata miyendo nditawirise kwenda thangwi banjanga akuchita mwambo wakupereka nsembe mu luwanimo, tenepo nananga andipanga kuti ndikakhale nawo kweneko. Tenepo ngakhala ndiwedi shamwalianga nditawirise ndiende kaona abale.’ Ndi thangwi yache iye hali pambuto pachepa tayu.”

³⁰Sauli adamtuzulira maso Yonatani mbalonga mbati, “Mako akhali wakupandukira pontho wakusowa chikhulupiro! Chinchino ndikupidziwa kuti iwe uli kukhundu ya Davite, pontho ukupilulupisa wekha ene na mako ene ule!

³¹Ayi iwe nkhabe kupidziwa tayu kuti Davite angakhala na moyo iwe nkhabe dzapita ufumu wa dzikoyi. Ndoko ukamkwate udze naye kuno chinchino pano. Iye athema kuphiwa.”

³²Yonatani adatawira mbati, “Thangwi yache ninji kuti iye athema kuphiwa, chachita iye ninji?”

³³Na mafala enewo Sauli adaponyera dipa Yonatani kuti amphe, penepo Yonatani adadzindikira kuti babache akhachitadi phinga kufuna kupha Davite.

³⁴Yonatani adalamuka pathebulu pale mwakuzhangali pyakwanga, pontho okhonda kudya na chinthu chene nsiku yeneyo, nsiku yachiwiri yache ya Phwando yakusekera Kubalwa kwa Mwezi. Iye adasanyika pyakwanga mumtima mwache thangwi ya Davite, thangwi Sauli akhadamselusa.

³⁵Mangwana mwache Yonatani adabuluka kwenda ku minda kagumanikana na Davite ninga mukhadapanganirana iwo mule. Iye adakwata mphale

³⁶mbalonga kuna iye mbati, “Thamanga ukalokote matswimo anafuna ine kuponyawa.” Mphale ule adathamanga, tenepo Yonatani adaponya tswimo mbimpiringana mphale ule.

³⁷Pidafika padagwera tswimo pale, Yonatani adakhuwa mbati, “Tswimo ili kutsogolo kwakoko!

³⁸Leka imira kwene penepo chimbiza!” Mphale ule adalokota tswimo ile mbaipereka kuna mbuyache

³⁹okhonda dziwa kuti ninji chikhachitika; akhapidziwa ndi Yonatani na Davite ene basi.

⁴⁰Yonatani adapereka pida pyache pile kuna mphale ule mbampanga kuti abwerere napyo ku luwani.

⁴¹Pidenda mphale ule Davite adabuluka pamulu wa miyala pakhadabisala iye pale mbagodama mbalamba katatu. Iye pabodzi pene na Yonatani onsene akhalira uku akupsompsonana unango na mwanzache. Kwache kutsukwala kwa Davite kukhali kukulu pyakwanga kupiringana kwa Yonatani.

⁴²Tenepo Yonatani adalonga kuna Davite mbati, “Mulungu mbakhale nawe. MBUYA anaonesesa kuti iwe na ine, pidzukulu pyako na pidzukulu pyanga pinakoya chiverano chakupambulika chachita iwe na inechi kwenda na kwenda.” Kubuluka penepo Davite adenda, Yonatani adabwerera kuluwani.