Read cisena 1 SAMUELE 21 Bible Online

1 SAMUELE 21 - cisena bible

1 SAMUELE 21

¹Davite adenda ku Nobu kuna Ahimeleki nyansembe. Ahimeleki adatetemera na mantha pidagumanikana iye naye mbamvunza mbati, “Watani wadza kuno wekha ene?”

²Davite adatawira mbati, “Ndadza kuno dzachita pyanditonga mfumu, pontho andipanga kuti ndileke panga munthu na mbodzi ene pya basa yadzera ine kuno. Amunanga ndaapanga kuti ndikagumanikane nawo pambuto panango pontho.

³Apo china imwe ninji? Ngandipaseni mikate mishanu penu chinthu chonsene china imwe.”

⁴Nyansembe ule adalonga mbati, “Ine nkhabe na mkate ene tayu, mbwenye mikate yakupambulika; iwe unakwanisa kuikwata ngakhala amunako hana manungo akupisa tayu.”

⁵Davite adatawira mbati, “Nkhabe tayu. Amunanga ndzidzi onsene ambapichitisa kukhala akuchena podi kwene kuti tikufambira pinango pene, ndiye ndi tani na ndzidzi uno unafambira ife basa yakufunikayi!”

⁶Tenepo nyansembe ule adampasa Davite mikate yakupambulika ile, thangwi mikate ikhali na iye ene ikhali ile ikhadaperekwa kuna MBUYA, pontho ile ikhadabuluswa kwene pathebulu yakupambulika kuti paikhwe inango yadidi.

⁷Pidachitika kuti tsamgudu wa amakabuswa a Sauli, dzinache Doegi wa ku Edomu, akhali penepo nsiku yeneyo, thangwi iye adathema kuchita mwambo wachipembedzo pamaso pa MBUYA.

⁸Davite adamvunza Ahimeleki mbati, “Ayi imwe muna dipa penu talasada pyakuti munakwanisa kundipasa? Matongero a mfumu ndiye adandichitisa kuti ndichimbize mwakuti ndidasowa na ndzidzi ene wakuti ndikwate talasada penu chida changa.”

⁹Ahimeleki adatawira mbati, “Ine ndina talasada ya Goliati Mfilisti adapha iwe m'phedi ya Ela ule; ili kunsi kwa efodi, yakukutizwa na nguwo. Ikwate ngakhala unaifuna chida chili kuno ntchenecho chene basi.” Davite adalonga mbati, “Ngandipaseni, thangwi nkhabe kunango pontho kuna talasada yadidi kupiringana yeneyi!”

¹⁰Tenepo Davite adenda pyache kuthawa Mfumu Sauli mbaenda kuna Akisi mfumu wa ku Gati.

¹¹Mathubu a mfumu adalonga kuna Akisi mbati, “Ayi weneyu si Davite tayu, mfumu wa dziko yachembo? Weneyu si ule tayu akazi akhaimba pya iye uku akuvina mbati, ‘Sauli apha pikwi pya anthu mbwenye Davite apha anthu pikwi khumi na kumanyalo?’ ”

¹²Davite adaikha mafala enewo mumtima mwache, tenepo adachita mantha pikulu pene na Mfumu Akisi.

¹³Tenepo pamaso pawo iye adasanduza makhaliro ache mbakhala ninga nyansala pakulemba-lemba pyache pamsuwo ukulu wa kupitira mumzindamo,[38] pontho mbayuya pyache masilili pandevu pache.

¹⁴Akisi adalonga kuna mathubu ache mbati, “Yang'anani, munthuyu ndi nyansala. Mwadzeranji naye kuno?

¹⁵Ine ndatopa nawo anyansala. Mwadzeranji na unango wakuchita pyache pyakupupwa m'nyumba mwanga muno?”