Read cisena 1 SAMUELE 22 Bible Online

1 SAMUELE 22 - cisena bible

1 SAMUELE 22

¹Davite adathawa kumzinda wa Gati mbaenda kakhala kunkhwimba chifupi na luwani ya Adulamu. Pidapiva abale ache na anango onsene kuti iye akhali kweneko, iwo adenda kaphatana naye.

²Anthu onsene ale akhaponderezwa penu a mangawa na okhonda komerwa na pyakuchita pya Sauli adenda kuna iye, amuna onsene pabodzi pene adakwana ninga madzana manayi, Davite mbakhala mkadamu wawo.

³Davite adenda ku Mizipa wa ku Moabu mbalonga kuna mfumu wa kweneko mbati, “Ndaphata miyendo tawirisani babanga na mama dzakhalambo kuno kufikirana ndadziwa ninji pinafuna kundichitira Mulungu.”

⁴Tenepo adasiya makolo ache kweneko na mfumu wa ku Moabu mbakhala kweneko mwenemo Davite akhabisala m'nkhwimba.

⁵Tenepo mprofeti Gadi adadza kuna Davite mbalonga mbati, “Leka khala kuno, ndoko kabodzi kene kudziko ya Yuda.” Tenepo Davite adabuluka kweneko mbaenda kumsitu wa Hereti.

⁶Nsiku inango Sauli akhali ku Gibea. Iye adakhala pansi pa muti wambwemba paphiri na dipache m'manja mwache, pontho mathubu ache adamzungulira. Iye adapangwa, kuti Davite na amunache akhadagumanwa.

⁷Tenepo adalonga kuna mathubu ache mbati, “Veserani amuna a dzinza ya Benjemani! Kani mukunyerezera kuti Davite anakupasani minda na minda yamfesa kuna monsenene mbakuchitisani kukhala akadamu ache a nkhondo?

⁸Ayi ndi thangwi ache monsenene mukusasanya pyakundipha? Nee mbodzi wa imwe adandipanga kuti mwananga makayo akhadasasanya chiverano na Davite. Nkhabe munthu na mbodzi ene akutsalakana pya ine kundipanga kwene kuti Davite, mbodzi wa amunanga, ndzidzi uno akusaka-saka mpata kuti andiphe pontho kuti mwananga ndiye adampasa chipapu chenechi!”

⁹Doegi akhaimira penepo pabodzi pene na mathubu a Sauli mbalonga mbati, “Ine ndidamuona Davite ndzidzi udenda iye kuna Ahimeleki mwana Ahitubu wa ku Nobu.

¹⁰Ahimeleki adavunza MBUYA pinthu pidathema Davite kuchita, tenepo adampasa pyakudya na talasada ya Goliati Mfilisti ule.”

¹¹Natenepo Mfumu Sauli adachemeresa nyansembe Ahimeleki na abale ache onsene, ale akhalimbo anyansembe ku Nobu, tenepo iwo adadza kuna iye.

¹²Sauli adalonga kuna Ahimeleki mbati, “Vesera kuno, Ahimeleki!” Iye adatawira mbati, “Ndawo, Mbuya,”

¹³Sauli adamvunza mbati, “Thangwi yache ninji iwe na Davite mukusasanya pyakundipha? Thangwi yache ninji iwe udampasa pyakudya pontho talasada mbuvunza kuna Mulungu pyathema iye kuchita? Chinchino iye andipandukira pontho akusaka-saka danga yakuti andiphe!”

¹⁴Ahimeleki adatawira mbati, “Davite ndi munthu wakukhulupirika pyakwanga pakati pa anyakukutumikirani onsene. Iye ndi mkamweneanu mkadamu wa anyakukuyang'anirani, pontho wakulemedzwa na munthu onsene m'nyumba mwanu.

¹⁵Ande, ndidavunza Mulungu m'mbuto mwache pontho keneko nee kakhali kakutoma tayu kuchita tenepo. Mbwenye kulonga pyakusasanya pyakufuna kukuphani Mfumu, lekani thonya chala ine penu mbodzi wa m'banja mwanga. Ine sinadziwa chinthu na chibodzi chene papinthu penepi tayu!”

¹⁶Mfumu adalonga mbati, “Ahimeleki, iwe na abale ako onsene mwathema kuphiwa.”

¹⁷Penepo iye adalonga kuna anyakumuyang'anira akhaimira chifupi na iye ale mbati, “Iphani anyansembe a MBUYA ale! Iwo adaverana na Davite pyakundipha pontho hadandipange tayu kuti iye adathawa podi kwene kuti iwo akhapidziwa mwadidi mwene.” Kwache anyakumuyang'anira ale adakhonda kuthukula dzanjawo kupha anyansembe a MBUYA ale.

¹⁸Tenepo Sauli adalonga kuna Doegi mbati, “Iwe ipha anyansembe ale!” Penepo Doegi wa Chiedomu adaapha onsenewo. Pansiku yeneyo iye adapha anyansembe akukwana makumasere na ashanu akuthema pabasa ya unyansembe yakuthukula efodi.

¹⁹Sauli adalonga pontho kuti anyakukhala mu Nobu onsene aphiwe, mzinda wa anyansembe: amuna na akazi, ana na akachiya ene, ng'ombe, mabulu na mabira, pyonsene pidamala phiwa.

²⁰Mbwenye Abiatara mbodzi wa ana achimuna a Ahimeleki, ulembo babache akhali Ahitubu, adathawa mbaenda kaphatana na Davite.

²¹Iye adampanga mule mukhadachekera Sauli anyansembe a MBUYA.

²²Davite adalonga kuna iye mbati, “Pidaona ine Doegi wa Chiedomu penepo nsiku yeneyo ndidapidziwa kuti iye anati akapilonge kuna Sauli. Tenepo ndine ndaaphesa abale ako onsenewo.

²³Khala na ine pontho leka chita mantha. Sauli anafuna pyakupha tonsene uwiriathu, kwache iwe unati ukhale pakupata na ine.”