Read cisena 1 SAMUELE 23 Bible Online

1 SAMUELE 23 - cisena bible

1 SAMUELE 23

¹Davite adapiva kuti Afilisti akhamenya luwani ya Keila, pontho akhaba mapira akhadavunwa kwene chinchino ale.

²Natenepo Davite adavunza MBUYA mbati, “Ayi ndiende kamenyana nawo Afilistiwa?” MBUYA adamtawira mbati, “Ndoko ukamenyane nawo mbupulumuse luwani ya Keila.”

³Mbwenye amuna a Davite adalonga kuna iye mbati, “Ngakhala muno mu Yuda tikuchita mantha. Apo nditani tingaenda ku Keila kamenyana na anyankhondo a Chifilisti?”

⁴Natenepo Davite adavunza pontho nzeru kuna MBUYA, tenepo MBUYA adalonga kuna iye mbati, “Ndoko kachite nkhondo ku Keila thangwi ndinakuchitisa kukunda Afilisti.”

⁵Tenepo Davite na amunache adenda kachita nkhondo na Afilisti. Iwo adapha anthu azinji a iwo mbakwata pifuyo pyawo. Mwenemu ndi mule mudapulumusira Davite luwani ile.

⁶Pidathawa Abiatara mwana Ahimeleki mbaphatana na Davite adakwata efodi.

⁷Sauli adapangwa kuti Davite adenda ku Keila mbalonga mbati, “Mulungu amuikha m'manja mwanga. Davite apiteyera yekha ene msampha pakupita mumzinda wakutchingwa na mpanda yakukhala na misuwo na mphinga zasimbi.”

⁸Tenepo Sauli adachemeresa anyankhondo ache kamenya naye nkhondo kwendera ku Keila kuti akazungulire Davite na amunache ene.

⁹Pidapiva Davite kuti Sauli akhasasanya pyakumpha, iye adalonga kuna Abiatara nyansembe mbati, “Idza kuno na efodi.”

¹⁰Penepo Davite adalonga mbati, “MBUYA Mulungu wa Israele, ine ndava kuti Sauli akusasanya pyakudza kuno ku Keila dzavunga luwaniyi thangwi ya ine pano nyabasanu.

¹¹Ayi anthu a muluwani anandipereka m'manja mwa Sauli? Ayi Sauli anadzadi kuno ninga mwapivera ine? MBUYA Mulungu wa Israele ndikukupemphani kuti munditawire!” MBUYA adamtawira mbati, “Sauli anati adzedi.”

¹²Davite adavunza pontho mbati, “Ayi mzika za muluwani muno zinati zipereke ine na amunanga m'manja mwa Sauli?” MBUYA adatawira mbati, “Ande, anati akupereke.”

¹³Tenepo Davite na amunache, ale akhalipo ninga madzana matanthatu onsene pabodzi, adabuluka ku Keila kabodzi kene mbaenda mbuto na mbuto. Pidapiva Sauli kuti Davite akhadathawako ku Keila, iye adasanduza manyerezero ache mbakhonda kwendakove.

¹⁴Davite adabisala pyache m'nthemba ya mapiri m'thando yatchetcha chifupi na Zifi. Sauli akhayesa-yesa basi ndzidzi onsene kufuna kumgumana, mbwenye Mulungu hadapereke Davite m'manja mwa Sauli tayu.

¹⁵Pikhali Davite pa Horeshi m'thando yatchetcha chifupi na Zifi iye adapidziwa kuti Sauli akhadadza kuti amphe.

¹⁶Yonatani mwana Sauli adenda kweneko kamuwangisa mtima kuti Mulungu anamtchinjiriza

¹⁷mbalonga mbati, “Leka chita mantha. Babanga Sauli nkhabe kwanisa kukuchita pinthu tayu. Iye akupidziwa mwadidi mwene kuti ndiwe anafuna dzakhala mfumu wa ku Israele ine mbandikhala wachiwiri wako.”

¹⁸Uwiriawo adachita pontho chiverano cha ushamwali pamaso pa MBUYA. Davite adakhala ku Horeshi, Yonatani adabwerera kwawo.

¹⁹Anthu anango a ku Zifi adenda kuna Sauli ku Gibea mbakalonga mbati, “Davite akubisala kunthemba kwathu ku Horeshi paphiri ya Hakila kumwera kwa thando yatchetcha ya Yudea.

²⁰Ife tikupidziwa kuti imwe mfumu mukumfuna pyakwanga kuti mumphate. Natenepo idzani kunthemba kwathu ife tinaonesesa kuti imwe mwamphata.”

²¹Sauli adatawira mbati, “MBUYA mbakutsanzayiseni thangwi ya kundikomera kwanu mtima!

²²Ndokoni pontho mukasake-sake mwadidi mwene kunabisala iyeko, pontho mudziwe mbani adamuona kwenekoyo. Ndava kuti iye ndi mpheswe pyakwanga.

²³Kavunze-vunzeni mwadidi mbuto yache chadi-chadi inabisala iyeyo mbamuonesesa kuti mwadza dzandipanga chinchino pano. Tenepo ine ndinaenda namwe pabodzi, natenepo ngakhala iye akuthimiza kubisala kunthemba kweneko, ine ndinati ndimphe podi na kumsaka-saka kwene dziko yonsene ya Yuda.”

²⁴Iwo adabwerera ku Zifi patsogolo pa Sauli. Davite na amunache akhali m'thando yatchetcha ya Maoni, phedi ya payokha kumwera kwa thando yatchetcha ya Yudea.

²⁵Sauli na amunache adautoma ulendo wa kusaka Davite. Pidapiva Davite iye adenda kuphiri yamiyala m'thando yatchetcha ya Maoni mbakhala kweneko. Pidava Sauli penepi iye adenda kasaka Davite kuthandoko.

²⁶Sauli na amunache akhali kukhundu inango ya phiri kulekanisa na Davite na amunache, ale akhali kukhundu inango ya phiriyo. Iwo akhachimbiza kuti athawe Sauli na amunache, ale akhali chifupi na iwo, pontho kuti akhali chifupi kuaphata.

²⁷Penepo pene nyamphangwa adafika kuna Sauli mbati, “Bwererani kabodzi kene! Afilisti akupokosera dziko!”

²⁸Tenepo Sauli adaleka kutewera Davite mbaenda kamenyana na Afilisti. Ndi thangwi yache mbuto yeneyi imbachemera phiri ya Kulekanisa.

²⁹Davite adenda kunthemba ya Engedi, kudabisala iye kule.