Read cisena 1 SAMUELE 24 Bible Online

1 SAMUELE 24 - cisena bible

1 SAMUELE 24

¹Pidabwerera Sauli kamenyana na Afilisti, adapangwa kuti Davite akhali m'thando yatchetcha chifupi na Engedi.

²Sauli adakwata pikwi pitatu pya anyankhondo aluso pyakwanga mu Israele mbaenda kasaka Davite na amunache chakumabulukiro dzuwa a Phanzwi yakuchemerwa Mbuzi Zam'tsanga.

³Iye adafika padzimba chifupi na mathanga a mabira m'khundu mwa njira mbapita kuti akachite chimbudzu. Pidachitika kuti dzimba yontho-yonthoyo kuchingolokodyo kwache ndiye kudabisala Davite na amunache.

⁴Amunache ale adalonga kuna iye mbati, “Uno ndi mwayi wanu. MBUYA adakupangani kuti anaikha nyamalwanu m'manja mwanu, pontho imwe munakwanisa kuchita naye pyonsene pene pinafuna imwe.” Davite adakambadza mbagwanda phidzo ya mkhanjo wa Sauli, iye mbakhonda kupidziwa.

⁵Mbwenye chikumbu mtima cha Davite chidatoma kumsanyisa mumtima mwache

⁶mbalonga kuna amunache mbati, “MBUYA mbandikhondese kuchita chakuipa kuna mbuyanga, ule adasankhulwa na MBUYA kukhala mfumu. Ine sidatheme kumchita chakuipa na pang'ono pene tayu, thangwi iye ndi mfumu adasankhulwa na MBUYA ule!”

⁷Tenepo amuna a Davite ale adaphatwa mtima na mafala adalonga Davite ale kuti aleke kuchita chakuipa kuna Sauli. Sauli adalamuka kubuluka m'dzimba mule mbatoma ulendo wache.

⁸Tenepo Davite adabulukambo kumtewera mbachemera mbati, “Mbuyanga mfumu!” Pidazungunuka Sauli, Davite adalamba pansi kumulemedza

⁹mbalonga mbati, “Thangwi yache ninji mukuvesera anthu analonga kuti ine ndikufuna kukuchitani pyakuipa?

¹⁰Munakwanisa kuona mwekha ene kuti chinchino pano m'dzimbamu MBUYA adakuikhani m'manja mwanga. Anango a amunanga adandipanga kuti ndikupheni, mbwenye ine ndidakuverani nsisi mbandilonga kuti ine sinachita chakuipa na pang'ono pene kuna imwe tayu, thangwi imwe ndimwe mfumu adasankhulwa na MBUYA ule!

¹¹Babanga, yang'anani phidzo ya mkhanjo wanu inaphatira ine m'manja mwangayi. Ine mbidakwanisa kukuphani, mbwenye ndidagwanda kwene phidzoyi basi. Penepi pikutsikimizira kuti ine nkhabe manyerezero akukupandukirani penu kukuchitani chakuipa tayu. Imwe ndiye munafuna pyakundipha podi kwene kuti ine sidakudawireni tayu.

¹²MBUYA mbapitonge kuti wakudawa mbani pakati pathupa! Iye mbakutchunyuseni thangwi ya pinandichitira imwepi, thangwi ine sinachita chakuipa na pang'ono pene kuna imwe tayu.

¹³Imwe mumbadziwa kulonga kwakale kule kwakuti, ‘Pyakuipa pimbachitwa na anyakuipa.’ Tenepo sinachita chakuipa na pang'ono pene kuna imwe tayu.

¹⁴Yang'anani chinthu chinafuna mfumu wa ku Israele kuchipha! Yang'anani chinthu chinathamangisa iye! Mwanambwa wakufa pyache, nkhukupa pyayo.

¹⁵MBUYA mbapitonge kuti wakudawa mbani pakati pathupa. Iye mbanditchinjirize pontho mbandipulumuse m'manja mwanu.”

¹⁶Pikhadamalisa Davite kulonga, Sauli adalonga mbati, “Kani ndiwedi mwananga Davite?” Penepo pene iye adagwisa msozi

¹⁷mbalonga kuna Davite mbati, “Iwe ndiwe wakulungama kupiringana ine. Iwe wandichitira pinthu pyadidi mbwenye ine ndakuchitira pyakuipa.

¹⁸Chinchino pano iwe wandionesa kundikomera kwako mtima, thangwi hudandiphe tayu podi kwene kuti MBUYA adandiikha m'manja mwako.

¹⁹Kangasi munthu angaphata nyamalwache mbamsiya kwene kuti aende pyache okhonda kumchita chinthu chakuipa? MBUYA mbakutsanzayise thangwi ya pinthu pyandichitira iwe leropi.

²⁰Chinchino ndikupidziwa kuti unakhala mfumu wa ku Israele, pontho kuti ufumu wako unathimiza kukhala pansi pa utongi wako.

²¹Kwache dumbira kuna ine na dzina ya MBUYA kuti hunapha pidzukulu pyanga tayu, towera dzinanga na banjanga pileke duwalika monsene mwene.”

²²Tenepo Davite adadumbira kuna Sauli. Kubuluka penepo Davite na amunache adabwerera kukhabisala iwo kule.