Read cisena 1 SAMUELE 27 Bible Online

1 SAMUELE 27 - cisena bible

1 SAMUELE 27

¹Davite adalonga yekha ene mbati, “Nsiku inango Sauli anati andiphe. Chadidi chache ntchakuti ndithawire kudziko ya Afilisti. Tenepo Sauli anatopa kundisaka mu Israele muno, natenepo ndinakhala pakupata.”

²Natenepo Davite na amunache madzana matanthatu adenda kabodzi kene kuna Akisi mwana wamamuna wa Maoki, mfumu wa ku Gati.

³Davite na anache adakhazikika ku Gati pabodzi pene na mabanjawo. Davite akhali na akazache awiri, Ahinoamu wa ku Yezereele na Abigaile mamfelwa wa Nabali wa ku Karimele.

⁴Pidava Sauli kuti Davite adathawira ku Gati, iye adaleka kumsaka-saka.

⁵Davite adalonga kuna Akisi mbati, “Ngakhala ndiwedi shamwalianga, nditawirise kuti ndikhale na luwani yanga ene ing'ono kuti ndikhalemo. Mbuyanga, ine nkhabe funika kuti ndikhale na imwe pabodzi pene mumzinda ukuluwu tayu.”

⁶Tenepo Akisi adampasa luwani ya Zikilagi, natenepo na thangwi yeneyi luwani ya Zikilagi ili m'manja mwa mafumu a Yuda kutomera kale ene.

⁷Davite adakhala m'dziko ya Afilisti miyezi khumi na mitanthatu.

⁸Ndzidzi wenewo Davite na amunache akhamenya nkhondo na anthu a ku Geshuri, Girizi na Aamaleki ale na kale ene akhakhala m'nthemba mwawo kutomera ku Shuri mpakana ku Iguputo.

⁹Ndzidzi onsene ukhachita nkhondo Davite panthemba, iye hakhasiya na moyo mamuna penu mkazi tayu, mbwenye akhakwata mabira na ng'ombe, mabulu, ngamila na nguwo. Tenepo iye akhabwerera ku Akisi.

¹⁰Akisi angamvunza mbati, “Ai udendera kupi lero kamenya nkhondo?” Davite akhatawira mbati, “Ndidenda kuthando yatchetcha ya Negebu mu Yuda” penu “Ndidenda kunthemba ya Ayerameeli” penu “Ndidenda kunthemba ya Akeni.”

¹¹Iye hakhasiya na moyo mamuna penu mkazi tayu kuti adze nawo ku Gati, thangwi akhanyerezera kuti iwo anakalonga kuti pinthu pikhachita Davite na amunache mphipi. Ipi mphinthu pyachita Davite ndzidzi onsene ukhakhala iye na moyo m'dziko ya Afilisti.

¹²Mbwenye Akisi adanyindira Davite mbalonga yekha ene mbati, “Iye akuzondiwa pyakwanga na anthu a kwawo ku Israele. Tenepo iye anakhala nyabasanga kwenda na kwenda.”