Read cisena 1 SAMUELE 28 Bible Online

1 SAMUELE 28 - cisena bible

1 SAMUELE 28

¹Ndzidzi unango pidamala penepi, Afilisti adagumanyisa magulu a anyankhondo awo kuti akamenyane na Aisraele. Tenepo Akisi adalonga kuna Davite mbati, “Ndimomwene kuti iwe ukupidziwa kuti iwe na amunako mwathema kakhala kukhundu kwanga kumenya nkhondo.”

²Davite adatawira mbati, “Ande, ine ndine nyabasanu, tenepo imwe munati mupione mwekha ene pinafuna ine kuchita.” Akisi adatawira mbati, “Pyakhala pyadidi. Ndinati ndikuikhe kukhala nyakunditchinjiriza kwenda na kwenda.”

³Pandzidzi wenewo Samuele akhadafa kale, tenepo Aisraele onsene adamsintili pontho adamuikha m'masiye a kumzinda wa kwawo ku Rama. Sauli adathamangisa anyakuombedza na anyakukhumira onsene mu Israele.

⁴Magulu ankhondo a Afilisti adagumanyikana pa Shunemu mbamanga msasa. Sauli adagumanyisa Aisraele mbamanga msasa paphiri ya Giliboa.

⁵Pidaona Sauli anyankhondo a Afilisti adachita mantha,

⁶natenepo iye adavunza MBUYA chakuti achite. Kwache MBUYA hadamtawire na pang'ono pene tayu, nee kundoto penu pakuphatisa basa Urimu na Tumimu penu kudzera muna maprofeti tayu.

⁷Tenepo Sauli adatonga mathubu ache mbati, “Kasakeni mkazi ule ambakhumira, tenepo ine ndinati ndivunze nzeru kuna iye.” Iwo adatawira mbati, “Muno mu Endori alimo mbodzi ene basi.”

⁸Natenepo Sauli adapizimbaisa yekha ene; iye adachinja nguwo zache, tenepo pidagwa mdima iye adenda pabodzi pene na amunache awiri kaonana na mkazi ule mbalonga mbati, “Ngandivunzirembo kuna mizimu mbundipange ninji chinafuna chitika, pontho chemera mzimu wa munthu anakuthulira ineyi.”

⁹Mkazi ule adatawira mbati, “Ndimomwene imwe mukupidziwa pinthu pyachita Mfumu Sauli, mule mudathamangisira[42] iye mu Israele anyakuombedza na anyakukhumira onsene. Apo thangwi yache ninji mukuyesa kunditeyera msampha kuti ndiphiwe?”

¹⁰Penepo Sauli adadumbira pikulu pene mbati, “Na dzina ya MBUYA wamoyo ndinadumbira kuti iwe hunatchunyuswa tayu thangwi ya kuchita tenepo.”

¹¹Mkazi ule adavunza mbati, “Munafuna ndikuchemerereni ani?” Iye adatawira mbati, “Samuele.”

¹²Pidaona mkazi ule Samuele adakhuwa mbalonga mbati, “Thangwi yache ninji mwandinyengeza? Imwe ndimwe Mfumu Sauli.”

¹³Mfumu adalonga mbati, “Leka chita mantha. Ayi ukuona ani?” Mkazi ule adatawira mbati, “Ndikuona mzukwa[43] ukubulukira pansi.”

¹⁴Sauli adavunza mbati, “Ukuoneka ninganji?” Mkazi ule adatawira mbati, “Ukuoneka ninga nkhalamba akubuluka pansi pontho avala chakufinika.” Penepo Sauli adapidziwa kuti weneyo akhali Samuele, tenepo iye adalamba kumulemedza.

¹⁵Samuele adalonga kuna Sauli mbati, “Thangwi yache ninji mwandizunguza? Thangwi yache ninji mwandichitisa kuti ndibwerere?” Sauli adatawira mbati, “Ine ndili panyatwa ikulu pyakwanga. Afilisti akuchita nane nkhondo, pontho MBUYA andipasa nkhodolo. Iye nkhabeve kunditawira tayu, penu kudzera muna maprofeti penu kundoto tayu. Natenepo ndakuchemerani kuti mundipange chathema ine kuchita.”

¹⁶Samuele adalonga kuna Sauli mbati, “Thangwi yache ninji unandichemera mwenemo MBUYA akupasa nkhodolo mbasanduka nyamalwako?

¹⁷MBUYA achita kuna iwe pidalonga iye kudzera muna ine. Iye akupokosera ufumu mbaupereka kuna Davite.

¹⁸Iwe udaswa matongero a MBUYA mbukhonda kuvunga monsene mwene Aamaleki na pyonsene pikhali na iwo. Ndi thangwi yache MBUYA akuchita penepi kuna iwe.

¹⁹Iye anaikha iwe na Aisraele m'manja mwa Afilisti. Mangwana iwe na anako munati mudzembo kuno, pontho MBUYA anapereka anyankhondo a Israele m'manja mwa Afilisti.”

²⁰Kabodzi kene Sauli adagwa mbagona pansi kwala thangwi ya mantha na pidalonga Samuele. Iye adasowa mphamvu thangwi hadadye na chinthu chene tayu nsiku yonseneyo mosiku na masikati.

²¹Mkazi ule adenda kuna Sauli mbaona kuti iye akhachita mantha, tenepo iye adalonga kuna Sauli mbati, “Yang'anani, nyabasanu akuverani. Ine ndidasasanyika kufa pakuchita pidapempha imwe.

²²Chinchino ndaphata miyendo veserani pinalonga nyabasanu, mbamumtawirise kuti akusasanyireni pyakudya thangwi mwathema kudya, towera mukhale na mphamvu kuti mukwanise kufamba.”

²³Iye adakhonda mbalonga mbati, “Ine sinadya tayu.” Mbwenye mathubu ache adamdembetera kuti adye. Pakumalisira pache iye adatawira, mbalamuka tenepo adakhala pakadera.

²⁴Msanga-msanga mkazi ule adapha mwanamphulu wakunenepa ule. Kubuluka penepo iye adakwata ufa mbausasanya mikate yakusowa chakufufumisira.

²⁵Iye adaikha pyakudya pile pamaso pa Sauli na mathubu ache, iwo mbadya. Tenepo mosiku onthowo iwo adalamuka mbaenda pyawo.