Read cisena 1 SAMUELE 29 Bible Online

1 SAMUELE 29 - cisena bible

1 SAMUELE 29

¹Afilisti adagumanyisa magulu awo ankhondo onsene pa Afeki, mwenemo Aisraele amanga msasawo pamphuno za madzi m'phedi ya Yezereele.

²Mafumu mashanu a Chifilisti adabuluka m'magulu-magulu a amuna madzana na a amuna chikwi; Davite na amunache adabulukambo m'nduli mwawo pabodzi pene na Mfumu Akisi.

³Akadamu a nkhondo a Chifilisti adaaona mbavunza mbati, “Aheberiwa akuchitakonjimbo kuno?” Akisi adatawira mbati, “Uyu ndi Davite thubu wa Sauli mfumu wa ku Israele. Iye akhala na ine ndzidzi ukulu ene. Iye hadachite chinthu chakuti ndinakwanisa kumdawisa nacho tayu kutomera nsiku idadza iye dzakhala na ine.”

⁴Mbwenye akadamu a nkhondo a Chifilisti adazhangali na Akisi mbalonga kuna iye mbati, “Bweza munthu weneyu kuluwani idampasa iwe. Mbaleke kwenda nafe pabodzi kunkhondo; iye anakwanisa kitisandukira uku tikumenya nkhondo. Chadidi kuna iye ninji? Ayi si kupha amunathuwa tayu kuti mbuyache akomerwe naye?

⁵Pontho weneyu ndi Davite ule akazi akhaimba pya iye uku akuvina mbati, ‘Sauli apha anthu pikwi, mbwenye Davite apha anthu pikwi khumi na kumanyalo.’ ”

⁶Akisi adachemera Davite mbalonga kuna iye mbati, “Ndinadumbira na dzina ya Mulungu wamoyo wa Israele kuti iwe wakhulupirika kuna ine, mbapidandikomera kukupanga kuti uende nane kamenya nkhondo yeneyi. Ine sidakugumane na chinthu chakuti ndinakwanisa kukudawisa nacho tayu kutomera nsiku idadza iwe dzakhala na ine. Mbwenye mafumu anangowa hakukukhulupira tayu.

⁷Natenepo bwerera pyako m'mudzi na mtendere pontho leka kachita pinthu pyokhonda komera mafumu a Chifilisti.”

⁸Davite adatawira mbati, “Ayi mbuya chadawa ine ninji? Ngakhala imwe hamudandigumane na chinthu chakuti munakwanisa kundidawisa nacho ine nyabasanu tayu kutomera nsiku idadza ine dzakhala namwe, ninga munapilongera imwe, apo thangwi yache ninji kuti ine sinaenda namwe tayu, imwe mbuyanga mfumu, mbandikamenyana na anyamalwanu?”

⁹Akisi adatawira mbati, “Ndimomwene kuti kuna ine ndiwe okhonda dawa ninga mngelo wa Mulungu. Mbwenye mafumu anango alonga kuti iwe hunakwanisa kwenda nafe ku nkhondo tayu.

¹⁰Natenepo Davite, mangwana na machibese, monsenene ale mudasiya Mfumu Sauli mbamudza kuna ine kuno, mwathema kulamuka kubwerera sindzidzi kunja nkhuchena.”

¹¹Tenepo mangwana mwache na machibese Davite na amunache adautoma ulendo wawo kubwerera kudziko ya Afilisti, tenepo Afilisti adathimiza kwenda ku Yezereele.