Read cisena 1 SAMUELE 3 Bible Online

1 SAMUELE 3 - cisena bible

1 SAMUELE 3

¹Nsiku zenezo pikhatumikira mphale Samuele pamaso pa MBUYA pansi pa Eli, pakhali mphangwa zakuchepa za MBUYA pontho pakhali nkhabe masomphenya azinji tayu.

²Mosiku unango Eli ule chinchino maso ache akhachita nkhunguwisi akhagona kusubi kwache;

³Samuele akhagonambo m'Nyumba ya MBUYA mukhali Bokosi ya Chiverano mule. Makalakwecha mbadzati fika, mwenemo nyale ikugaka,

⁴MBUYA adachemera Samuele. Tenepo Samuele adatawira mbati, “Ndawo, ndili pano!”

⁵Iye adathamangira kukhali Eli kule mbalonga mbati, “Imwe mudandichemera, tenepo ndadza.” Mbwenye Eli adalonga mbati, “Ine sidakuchemere tayu, bwerera pyako ukagone.” Tenepo Samuele adenda mbakagona pyache.

⁶MBUYA adachemera pontho Samuele. Tenepo Samuele adalamuka mbaenda kukhali Eli kule mbalonga mbati, “Imwe mudandichemera, tenepo ndadza.” Eli adatawira mbati, “Mwananga ine sidakuchemere tayu, bwerera pyako ukagone.”

⁷Ndzidzi wenewu Samuele akhadadzati kumdziwa MBUYA tayu, thangwi MBUYA akhadadzati longa naye tayu.

⁸MBUYA adamchemera pontho kachitatu kache. Tenepo Samuele adalamuka mbaenda kukhali Eli kule mbalonga mbati, “Imwe mudandichemera, tenepo ndadza.” Penepo Eli adadzindikira kuti MBUYA ndiye akhamchemera mphale ule.

⁹Tenepo iye adalonga mbati, “Ndoko pyako ukagone, ngakhala anakuchemera pontho kalonge kuti, ‘Longani, MBUYA, nyabasanu akuvesera.’ ” Tenepo Samuele adenda mbakagona pyache.

¹⁰MBUYA adadza mbaimira penepo mbachemera ninga pakutoma pale mbati, “Samuele, Samuele!” Samuele adatawira mbati, “Longani nyabasanu akuvesera.”

¹¹MBUYA adalonga kuna iye mbati, “Yang'ana, ndinafuna ndichite chinthu chakugoswa pyakwanga pene kuna Aisraele mwakuti munthu onsene anachivayo anatutumuka nacho.

¹²Pansiku yeneyo ndinachita pyakugoswa pyanga pyonsene pidalonga ine kuna banja ya Eli kutomera pakutoma mpakana pakumalisa.

¹³Ine ndampanga kale[8] kuti ndinati nditchunyuse banjache kwenda na kwenda, thangwi anache achimuna andishola. Eli akhapidziwa kuti iwo akhachita penepi, mbwenye iye hadafune kuasumulula tayu.

¹⁴Natenepo ndinadumbira pikulu pene kuna banja ya Eli kuti na kutani kwene iwo nkhabeve dzalekererwa tayu na nsembe penu pyakupereka, thangwi ya kudawa kwawo.”

¹⁵Samuele adagona patalimba mpakana machibese; tenepo adalamuka mbafungula misuwo ya Nyumba ya MBUYA. Iye akhachita mantha pyakwanga kupanga Eli pya masomphenya ale.

¹⁶Eli adamchemera mbati, “Samuele mwananga!” Iye adatawira mbati, “Ndawo, ndili pano.”

¹⁷Eli adamvunza mbati, “MBUYA akupanganji? Leka kundibisira na chibodzi chene, thangwi Mulungu anakutchunyusa pikulu pene ngakhala unandibisira pyonsene pyakupanga iye.”

¹⁸Tenepo Samuele adampanga pyonsene pidampanga MBUYA pile; iye hadabise chinthu na chibodzi chene tayu. Eli adalonga mbati, “Iye ndi MBUYA; mbachite pyonsene pinaona iye kuti mphyakuthema pamaso pache.”

¹⁹Pikhakula Samuele MBUYA akhakhala naye mbachitisa kukwana-kwana pyonsene pidalonga Samuele.

²⁰Tenepo Aisraele onsene kubulukira nkhomo mpakana nkhomo inango ya dziko adapidziwa kuti Samuele akhalidi mprofeti wa MBUYA.

²¹MBUYA adathimiza kupitchulula yekha ene kuna Samuele ku Shilo kukhadaoneka iye kuna Samuele, pontho mbalonga naye kule. Natenepo ndzidzi ukhalonga Samuele, Aisraele onsene akhavesera.