Read cisena 1 SAMUELE 30 Bible Online

1 SAMUELE 30 - cisena bible

1 SAMUELE 30

¹Pidagwanda nsiku ziwiri Davite na amunache adafika ku Zikilagi. Aamaleki adasosa anthu a m'thando yatchetcha ya Negebu mbasosa pontho Zikilagi. Iwo adapisa luwaniyo,

²mbaphata akazi onsene; iwo hadaphe munthu na mbodzi ene tayu, mbwenye adakwata anthu onsene mbaenda nawo.

³Pidafika Davite na amunache, adagumana kuti luwani yawo yapiswa pontho kuti akazawo, anawo achimuna na achikazi ene amala phatwa.

⁴Davite na amunache adatoma kulira mpakana mphamvu zawo zidamaliratu.

⁵Podi na akazi ene awiri a Davite, Ahinoamu wa ku Yezereele, na Abigaile, adaphatwambo.

⁶Davite akhali panyatwa ikulu na amunache, ale akhaganagana pyakumponyera miyala thangwi akhava napyo kupha pyakwanga kutaya anawo; mbwenye MBUYA Mulungu wache adampasa kuwanga mtima.

⁷Davite adalonga kuna Abiatara nyansembe, mwana Ahimeleki, mbati, “Pase kuno efodi,” Tenepo Abiatara adampasa.

⁸Davite adavunza MBUYA mbati, “Ayi ndiatewere mapangawa? Apo ndinaaphata?” MBUYA adatawira mbati, “Atewere, iwe unati uphate mbupulumusa anyakuphatwawo.”

⁹Natenepo Davite na amunache madzana matanthatu adalamuka. Pidafika iwo pamkhwawa wa Besori anango a iwo adasala penepo.

¹⁰Davite adathimiza kwenda na amuna madzana manayi; amuna anango madzana mawiri adatopa pyakwanga kuwambuka mkhwawawo, natenepo adasalira pyawo m'nduli.

¹¹Amuna akhali na Davite ale adagumana mphale wa ku Iguputo kuminda mbadza naye kuna Davite. Iwo adampasa pyakudya na madzi

¹²nkhuyu zakuuma na matsaputu awiri amfesa zakuuma. Pidamala iye kudya mphamvu zache zidabwerera. Nsiku zitatu zamumphu iye hadadye na kumwa na chinthu chene tayu.

¹³Davite adamvunza mbati, “Mbuyako mbani, pontho ukubulukira kupi?” Iye adatawira mbati, “Ine ndine wa ku Iguputo bitchu wa Muamaleki. Mbuyanga adandisiya m'nduli nsiku zitatu zapitazo thangwi ndikhava manungo kupha.

¹⁴Ife tapokosera nthemba ya Akereti kuthando yatchetcha ya Negebu mu Yuda, pontho na nthemba ya mbumba ya Kalebu, pontho tapisa luwani ya Zikilagi.”

¹⁵Davite adavunza mbati, “Ayi unatipangiza kuna mapanga enewa?” Iye adatawira mbati, “Ndinakupangizani ngakhala munadumbira na dzina ya Mulungu kuti nee munandipha tayu, pontho kuti nee munandipereka m'manja mwa mbuyanga tayu.”

¹⁶Tenepo iye adathonyeza Davite kukhali iwo. Mapanga ale akhali ponsene pene kudya, kumwa, na kusekera thangwi ya kuinjipa kwa pinthu pidapokosera iwo kudziko ya Afilisti na Yuda.

¹⁷Mangwana mwache m'makalakwecha Davite adaasosa mbachita nawo nkhondo mpakana mawulo. Nee padapulumuka munthu na mbodzi ene tayu kupambula aphale madzana manayi ale adapakira ngamila mbathawa.

¹⁸Davite adapulumusa munthu onsene na pyonsene pidapokosera Aamaleki kuthimizapo akazi awiri a Davite;

¹⁹nee chinthu na chibodzi chene chidasowa tayu. Davite adabweza ana achimuna na achikazi ene pontho na pyonsene pidapokosera Aamaleki.

²⁰Iye adabweza pontho mikumbi yonsene ya mabira na ng'ombe zene; amunache adafambisa pifuyo pyonsene patsogolo pawo mbalonga mbati, “Penepi mphya Davite!”

²¹Tenepo Davite adabwerera kukhali amuna madzana mawiri ale adasowa mphamvu zakuwambuka nazo mkhwawa wa Besori. Iwo adadza dzagumanikana na Davite na amunache, tenepo Davite adenda kuna iwo mbaapasa mwenyikiro.

²²Mbwenye amuna anango akuipa na amungu akhadenda na Davite ale adalonga mbati, “Iwo hadende nafe tayu, tenepo nee tinaapasabi pinthu pyapokosera ifepi. Iwo anakwanisa kukwata akazawo na anawo mbaenda pyawo.”

²³Mbwenye Davite adatawira mbati, “Abale anga imwe nkhabe chita tenepo na pinthu pyatipasa MBUYA pile tayu. Iye atitchinjiriza mbatichitisa kukunda mapanga ale.

²⁴Nkhabe munthu na mbodzi ene anatawirizana na pinthu pinalonga imwepi tayu. Tonsene tathema kugawana sasawa: onsene ale adasalira m'nduli kuyang'anira pyakudya anagawana sasawa na onsene ale adenda kunkhondo.”

²⁵Davite adalonga kuti pikhale tenepo, natenepo matongero enewa akutewezwa mu Israele kutomera ndzidzi wenewo na lero.

²⁶Pidabwerera Davite ku Zikilagi adatumiza pyakupokoserapyo kuna ashamwaliache, akadamu a ku Yuda na mphangwa zakuti: Tambirani mtukwa kubulukira kuna ine wa pinthu pidapokosera ife anyamalwa a MBUYA.

²⁷Iye adatumiza kuna anthu a ku Betele, kuna anthu a ku Rama kuthando yatchetcha ya Negebu na kuna anthu a kumaluwani a Yatiri,

²⁸Aroeri, Sifimoti, Eshitemoa na

²⁹Rakali, kuna mbumba ya Yerameele, kuna Akeni;

³⁰kuna anthu a m'maluwani a Horima, Borashani, Athaki,

³¹na Hebroni. Iye adautumiza kuna mbuto zonsene kule kukhadafambira iye na amunache.