Read cisena 1 SAMUELE 4 Bible Online

1 SAMUELE 4 - cisena bible

1 SAMUELE 4

¹Pandzidzi wenewo Afilisti adagumanyikana kamenya nkhondo na Aisraele, tenepo[9] Aisraele adenda kamenyana nawo. Iwo adamanga msasawo pa Ebenezeri, Afilisti adamangambo msasawo pa Afeki.

²Afilisti adenda kasosa, tenepo pakumala nkhondo yakugoswa iwo adakunda Aisraele mbapha amuna pikwi pinayi kuthando yankhondo.

³Anyakusalira kukhonda phiwa kunkhondo ale adabwerera kumsasa, tenepo akadamu a Aisraele adalonga mbati, “Thangwi yache ninji MBUYA atawirisa Afilisti kutikunda lero? Tendeni tikwate Bokosi ya Chiverano ku Shilo, towera MBUYA aende nafe pabodzi pene, pontho kuti atipulumuse kuna anyamalwathu.”

⁴Natenepo iwo adatuma anthu kwenda ku Shilo mbakwata Bokosi ya Chiverano ya MBUYA Wamphamvu zonsene ule akhala pakati pa pyakulengwa pyakukhala na maphaphido. Ana awiri achimuna a Eli, Hofini na Finiasi adadza pabodzi pene na Bokosi ya Chiverano ile.

⁵Pidafika Bokosi ya Chiverano kumsasako, Aisraele onsene adakhuwa pyakwanga mwakukomerwa mwakuti dziko idatekenyeka.

⁶Afilisti adava kukhuwa kweneku mbalonga mbati, “Veserani kukhuwa konsene kunaveka kumsasa wa Aheberi! Penepi pikufuna kulonganji?” Pidapidziwa iwo kuti Bokosi ya Chiverano ya MBUYA ikhadafika kumsasa wa Aheberi,

⁷iwo adachita mantha mbalonga mbati, “Milungu yatchitha kumsasa kwawo! Ife takundwa. Chipo chinthu ninga chenechi nee chidzati chachitika kuna ife tayu.

⁸Mbani anakwanisa kutipulumusa m'manja mwa milungu ya mphamvuyi? Milungu yache njontho ile idacheka anthu a ku Iguputo m'thando yatchetcha mule.

⁹Wangani mtima, Afilisti! Chitani chamuna, gopesera tinakhala mabitchu a Aheberi, ninga montho mukhali iwo mabitchu athu. Tenepo menyani nkhondo ninga amuna.”

¹⁰Afilisti adawangisa kumenya nkhondo mbakunda Aisraele ale adabwerera kwawo akuthamanga. Anthu adafa azinji ene; anyankhondo pikwi makumatatu adaphiwa.

¹¹Bokosi ya Chiverano ya MBUYA idapokoserwa, pontho ana awiri achimuna a Eli, Hofini na Finiasi adaphiwa.

¹²Pansiku yontho-yonthoyo mamuna unango wa dzinza ya Benjemani adabuluka kumbuto yakumenyera nkhondo mbaenda ku Shilo uku nguwo zache zang'ambika, pontho fumbi mumsolo mwache kuonesa kutsukwala.

¹³Pidafika iye, Eli akhakhala pampando chifupi na njira maso mbali kunjira, thangwi iye akhaswipa mtima na Bokosi ya Chiverano ile. Munthu ule adavekesa muluwani monsene mule pinthu pidachitika pile, natenepo munthu onsene adakalala na mantha.

¹⁴Eli adava chiliro chile mbavunza mbati, “Chiliro chonsenechi ntchanji nacho?” Munthu ule adathamangira kuna Eli mbampanga pyonsene pidachitika pile.

¹⁵Eli akhali na pyaka makumafemba na pisere, pontho iye adasanduka zimola.

¹⁶Munthu ule adalonga mbati, “Ine ndathawa kunkhondo mbandifika kuno lero ene pano.” Eli adamvunza mbati, “Chachitika ninji mwananga?”

¹⁷Munthu ule adatawira mbati, “Aisraele adathawa Afilisti, pontho takundwa pyakwanga pene. Padzulu pache ananu achimuna Hofini na Finiasi aphiwa, pontho Bokosi ya Chiverano ya Mulungu yapokoserwa!”

¹⁸Pidathula munthu ule Bokosi ya Chiverano, Eli adagwa namadede kubulukira pa mpando padakhala iye pale chifupi na msuwo wa mpanda. Iye akhali wakukalamba pontho wakukula manungo mwakuti adatchoka khosi mbafa. Iye akhali mtongi wa Israele pyaka makumanayi.

¹⁹Mkwenyache, mkazi mwanache Finiasi akhali na mimba mbasala chifupi kubala. Tenepo pidava iye kuti Bokosi ya Chiverano ya Mulungu yapokoserwa, pontho kuti tebzalache na mamunache ene afa, iye adakhukhunyika mbabala.

²⁰Pikhafa iye nyakumbazika ule adalonga mbati, “Wangisa! Wabala mwana wamamuna!” Mbwenye iye hadapiikhe konta tayu mbakhonda pyache kutawira.

²¹Iye adamthula mwana ule Ikabodi[10] kulonga kuti, “Demelero ya Mulungu yabuluka pakati pa Aisraele!” thangwi kupokoserwa kwa Bokosi ya Chiverano ya Mulungu, kufa kwa tebzalache, pontho na mamunache.

²²Iye adalonga mbati, “Demelero ya Mulungu yabuluka pakati pa Aisraele, thangwi ya kupokoserwa kwa Bokosi ya Chiverano ya Mulungu.”