Read cisena 1 SAMUELE 6 Bible Online

1 SAMUELE 6 - cisena bible

1 SAMUELE 6

¹Pidamala Bokosi ya Chiverano ya MBUYA miyezi minomwe m'dziko ya Afilisti,

²anthu adachemeresa anyansembe na anyamatsenga mbaavunza mbati, “Tichitenji nayo Bokosi ya Chiverano ya MBUYA? Ngakhala tinafuna pyakuibwezera kwawo, tinaitumiza nanji?”

³Iwo adatawira mbati, “Ngakhala munabwezera kwawo Bokosi ya Chiverano ya Mulungu wa Israele imwe nee mwathema kuitumiza chimanja-manja tayu, mbwenye mwathema kuitumiza na mtukwa wakupagali pyakudawa pyanu. Penepo imwe munawangiswa pontho munadziwa thangwi ikhakutchunyusirani iye ninga tenepa.”

⁴Anthu adavunza mbati, “Mtukwache unafuna ife kumtumizira ngwanji?” Iwo adatawira mbati, “Mifanikizo mishanu ya mabuka pontho matchiru mashanu pyagolidi kada mfumu onsene a Afilisti, thangwi muliri wenewu udagwiswa kuna monsenene pontho na kuna mafumu monsenene mashanu.

⁵Imwe mwathema kusasanya mifanikizo ya mabuka pontho matchiru imbavunga dziko yanu ile, pontho imwe mwathema kupereka chilemedzo kuna Mulungu wa Israele. Mwinango iye analeka kukutchunyusani, imwe na milungu yanu, pontho na dziko yanu.

⁶Mwatani munaumisa mtima ninga mfumu wa ku Iguputo na anthu ache? Lekani duwalira mudaapupwisira Mulungu kufikirana adatawirisa Aisraele kubuluka mu Iguputo.

⁷Tenepo kwatani chingolo chitswa na ng'ombe ziwiri zamkaka zile chipo zidzati kweya chingolo tayu. Mangirirani ng'ombezo kuchingolocho, abuluseni anawo kubwerera nawo kuthanga.

⁸Kwatani Bokosi ya Chiverano ya MBUYA mbamuikwizike m'chingolomo, pontho ikhani bokosi inango pakhundu mbamuikhamo mifanikizo yagolidi inatumiza imwe kuna iye ninga mtukwa kupagali pyakudawa pyanu. Gwinyani chingolocho mbamuchileke chifambe chokha chene.

⁹Tenepo chiyang'aneni, ngakhala icho chinaendera kuluwani ya Beti-Shemeshi penepo ndiye kuti Mulungu wa Israele ndiye adagwisa nyatwa yakugoswayi pana ife. Mbwenye ngakhala nee chinaenda kweneko tayu penepo ife tinapidziwa kuti si iye adagwisa muliri wenewu tayu, pidalira kwene chitika kuna ife mwasusudewu.”

¹⁰Iwo adachita pidapangwa iwo pile. Tenepo adakwata ng'ombe ziwiri zamkaka mbazimangirira pachingolocho mbabweza anawo, tenepo adaafungira m'thanga.

¹¹Iwo adakwizika Bokosi ya Chiverano ya MBUYA m'chingolomo pabodzi pene na bokosi mukhali mifanikizo yagolidi ya mabuka na matchiru ile.

¹²Ng'ombezo zidatoma kwendera kunjira ya ku Beti-Shemeshi mbazienderatu kweneko okhonda bauka. Ng'ombezo zikhaenda mbazilira njira yonsene. Mafumu mashanu a Chifilisti adazitewera m'nduli mwazo mpakana kumadire a Beti-Shemeshi.

¹³Anthu a ku Beti-Shemeshi akhavuna tirigu wawo paphedi. Tenepo pidakwiza iwo maso adaona Bokosi ya Chiverano mbakomerwa pyakwanga na pidaiona iwo.

¹⁴Chingolo chile chidafika m'munda mwa munthu unango dzinache Yoswa wa kuluwani ya Beti-Shemeshi mbichiimira chifupi na mwala ukulu. Anthu adapandula-pandula chingolo chile mbapereka nsembe yakupyerera ng'ombe zile kuna MBUYA.

¹⁵Alevi adatchithisa Bokosi ya Chiverano ya MBUYA pabodzi pene na bokosi muna mifanikizo yagolidi ile mbaiikhazika pamwala ukulu. Tenepo anthu a ku Beti-Shemeshi adapereka nsembe zakupyerera na pyakupereka pinango kuna MBUYA.

¹⁶Mafumu mashanu a Chifilisti ale akhayang'ana ndzidzi ukhachita iwo pyonsenepi. Tenepo pidamala iwo kuchita penepi adabwerera kwawo nsiku yonthoyo.

¹⁷Afilisti adatumiza kuna MBUYA mifanikizo mishanu ya mabuka yagolidi ninga mtukwa wakupagali pyakudawa pyawo, kuimirira mizinda ya Ashidodi, Gaza, Ashikeloni, Gati na Ekroni.

¹⁸Iwo adatumiza pontho mifanikizo mishanu ya matchiru yagolidi kuimirira mizinda mishanu yakutongwa na mafumu mashanu, pontho maluwani akutchingwa na mpanda pabodzi pene na akusowa mpanda. Mwala ukulu m'munda mwa Yoswa munthu wa kuluwani ya Beti-Shemeshi padakhazikwa Bokosi ya Chiverano ya MBUYA pale, ulimo basi na lero ninga umboni wa pinthu pidachitika pile.

¹⁹Mbwenye MBUYA adapha anthu makumanomwe a ku Beti-Shemeshi, thangwi adafungula Bokosi ya Chiverano ya MBUYA mbasuzumira m'bwalo mwache. Tenepo anthu adasintili, thangwi ya shoko yamphamvu ya MBUYA pana iwo.

²⁰Tenepo amuna a ku Beti-Shemeshi adavunza mbati, “Mbani anakwanisa kuimira pamaso pa MBUYA, Mulungu Wakuchenayu? Nkhwa ani pontho kunafuna kwenda Bokosi ya Chiverano kubulukira kuna ife?”

²¹Iwo adatuma anyamphangwa kwenda kuna anthu a ku Kiriati-Yearimu kalonga mbati, “Afilisti abwezera Bokosi ya Chiverano ya MBUYA. Tendeni mukaikwate.”