Read cisena 1 SAMUELE 7 Bible Online

1 SAMUELE 7 - cisena bible

1 SAMUELE 7

¹Tenepo anthu a ku Kiriati-Yearimu adenda kakwata Bokosi ya Chiverano ya MBUYA mbaenda nayo kunyumba ya munthu unango dzinache Abinadabu, akhakhala m'mapiri ule. Iwo adapambulira mwanache wamamuna Eleazara kuiyang'anira.

²Bokosi ya Chiverano ya MBUYA idakhala ku Kiriati-Yearimu ndzidzi ukulu ene ninga pyaka makumawiri, tenepo Aisraele onsene adalira kuna MBUYA kuti aaphedze.

³Samuele adalonga kuna Aisraele mbati, “Ngakhala munazungunukira kuna MBUYA na mtimanu onsene, imwe mwathema kubulusa milungu yachilendo yonsene na adzimunthu a milungu Asitarite. Pipambuleni mwekha ene monsene mwene kuna MBUYA mbamupembedze iye ene basi, tenepo anakupulumusani m'manja mwa Afilisti.”

⁴Natenepo Aisraele adabulusa mifanikizo ya milungu Baala na Asitarite mbapembedza MBUYA yekha basi.

⁵Tenepo Samuele adalonga kuna Aisraele mbati, “Gumanyikanani pa Mizipa tenepo ine ndinakupemphererani kuna MBUYA.”

⁶Pidamala iwo gumanyikana pa Mizipa, iwo adatunga madzi mbaakhuthula pamaso pa MBUYA, pontho iwo adapimana kudya nsiku yonseneyo. Iwo adalonga mbati, “Ife tadawira MBUYA.” Mpha Mizipa padasanduka Samuele kukhala mtongi wa Israele.

⁷Pidava Afilisti kuti Aisraele akhadagumanyikana pa Mizipa, mafumu mashanu a Chifilisti adenda kweneko kaasosa. Aisraele adapiva mbachita mantha,

⁸tenepo adalonga kuna Samuele mbati, “Thimiza kupemphera kuna MBUYA Mulungu wathu kuti atipulumuse m'manja mwa Afilisti.”

⁹Samuele adapha mwanabira mbampereka wamumphu nsembe yakupyerera kuna MBUYA mbapemphera kuna MBUYA kuti aphedze Aisraele. MBUYA adava kupemphera kwache.

¹⁰Pikhapereka Samuele nsembe zakupyerera, Afilisti adadza dzasosa Aisraele; mbwenye penepo pene MBUYA adaguma m'chiphaliwali mbaikha Afilisti pampani-pani mwakuti adathawa pamaso pa Aisraele.

¹¹Aisraele adabuluka pa Mizipa mbathamangisa Afilisti mpakana ku Beti-Kari mbaapha na njira yonseneyo.

¹²Tenepo Samuele adakwata mwala mbauimirisa pakati pa Mizipa na Sheni mbathula mwalawo Ebenezeri[12] mbalonga mbati, “MBUYA atiphedza njira yonseneyi.”

¹³Natenepo Afilisti adakundwa, MBUYA mbaachitisa kuti aleke pokosera dziko ya Israele ndzidzi onsene ukhali Samuele na moyo.

¹⁴Mizinda yonsene ikhadapokosera Afilisti pakati pa Ekroni na Gati idabwerera kuna Israele. Tenepo Aisraele adakwata nthembawo yonsene, pontho pakhali mtendere pakati pa Aisraele na Akanani.

¹⁵Samuele akhali mtongi wa Israele ndzidzi onsene ukhali iye na moyo.

¹⁶Chaka na chaka iye akhaenda mbazungulira Betele, Giligala na Mizipa kutonga miseru ya Aisraele m'mbuto zonsenezi.

¹⁷Kubuluka penepo iye akhabwerera kwawo ku Rama, pontho kukhaphata iye basa yakutonga miseru kule. Kweneko iye adamangira MBUYA guwa yansembe.