Read cisena 1 SAMUELE 8 Bible Online

1 SAMUELE 8 - cisena bible

1 SAMUELE 8

¹Pidakalamba Samuele, iye adasankhula anache achimuna kukhala atongi mu Israele.

²Mwanache wautombo akhali Yowele, wamng'onomboyo akhali Abia; iwo akhali atongi mu Beeresheba.

³Kwache anachewo hadakwate makhaliro a babawo tayu. Iwo adabauka mbaikha mtima pakobiri, pontho akhatawira kudyekerwa mbatonga miseru mwakusowa chilungamo.

⁴Tenepo akadamu onsene a Aisraele adagumanyikana pabodzi mbadza ku Rama kukhali Samuele kule.

⁵Iwo adalonga kuna iye mbati, “Iwe wakalamba, pontho anakowa hadakwate makhaliro ako tayu. Tenepo tisankhulire pyathu mfumu kuti atitsogolere ninga munachitira madzinza anangowa.”

⁶Mbwenye pidalonga iwo kuti, “Tisankhulire pyathu mfumu kuti atitsogolere,” penepi Samuele hadakomerwe napyo tayu; tenepo iye adapemphera kuna MBUYA.

⁷MBUYA adampanga mbati, “Vesera pyonsene pinalonga anthupi kuna iwe; si iwe anakhonda iwo tayu, mbwenye akhonda ine pano ninga mfumu wawo.

⁸Kutomera ndzidzi udaabulusa ine m'dziko ya Iguputo iwo abauka kubuluka kuna ine mbapembedza milungu inango, tenepo chinchino iwo akuchita kuna iwe pinthu pyachita iwo kuna ine ndzidzi onsene.

⁹Natenepo vesera pinalonga iwopyo; kwache acheuze pikulu pene, pontho apange kuti adziwe pinthu pinafuna dzachita mfumu anafuna dzaatonga ule.”

¹⁰Samuele adapanga anthu, ale adampempha kuti aasankhulire mfumu, pyonsene pikhadampanga MBUYA.

¹¹Iye adalonga mbati, “Ipi ndiye pinafuna dzachita mfumu anafuna kukutongani ule: Iye anachitisa ananu achimuna kukhala anyankhondo; anango a iwo anafambisa pingolo na akavalo ache mbathamanga patsogolo pa pingolo pyache.

¹²Anango a iwo anapaswa basa ya ukadamu wa anyankhondo pikwi, anangombo anyankhondo makumashanu. Anango anatipula mindache, kuvuna mapira, kusasanya pida pyankhondo pontho kusasanya pinthu pya pingolo pyache.

¹³Ananu achikazi anakhala anyakumsasanyira mafuta akununkhira, anyakumphikira, pontho anyakuphika mikate.

¹⁴Iye anakwata pyadidiletu pya mindanu, mindanu yamfesa na miti yanu yaolivi, mbapipereka kuna mathubu ache.

¹⁵Iye anakwata chakhumi cha mapiranu na nsapo zanu zamfesa mbapipereka kuna mathubu ache na anyakumtumikirache.

¹⁶Iye anakwata anyabasanu na ng'ombe[13] zanu zadidiletu na mabulu mbapimphatira basa.

¹⁷Iye anakwata chakhumi cha mikumbi yanu, pontho imwe ene munakhala mabitchu ache.

¹⁸Ndzidzi wenewo ungafika munadungunya pikulu pene thangwi ya mfumu wanu asankhula imwe mwekha ene ule. Kwache MBUYA hanavesera tayu kudungunya kwanuko.”

¹⁹Anthu hadaikhe konta pidalonga Samuele pile tayu mbalonga mbati, “Nkhabe! Ife tinafuna mfumu basi kuti atitsogolere,

²⁰towera tikhalembo ninga madzinza anangowa kukhala na mfumu wakutitonga, wakutitsogolera, pontho wakutimenyera nkhondo.”

²¹Samuele adavesera pyonsene pidalonga anthu pile mbaendambo kapipanga MBUYA.

²²MBUYA adatawira mbati, “Chita pinafuna iwo, pontho asankhulire mfumu.” Tenepo Samuele adapanga Aisraele onsene ale kubwerera kwawo.