Read NQAARIIT NE ROOG Mberaand 1 Bible Online

Mberaand 1 - NQAARIIT NE ROOG bible

Mberaand 1

¹No mberaand naa Roog a saka asamaan fo lanq.

²Lanq ke o ƥor a yoq’u, too saxit’eeyo nen tig. Ke widuuna fop a fi nen poofi mayu, a niɓaan tit, Yiif le Roog[1] a yaaraa, a yooroox poofi ke.

³Maaga, Roog a laya yee: «Fat a qoolaand[2] a jeg!» A qoolaand alaa yee dañ.

⁴Roog a ga’a yee a qoolaand ale a faaxa, soo ta dalfoox o xaajin fo o niɓaan ole.

⁵A qoolaand ale, Roog a ne’aan ñaal, o niɓaan ole, ta ne’in o yeng. Naaga a yenga, a feed, ta ref ñaal eetaand ne.

⁶Roog a layahina yee: «Fat a qul a jeg, a xaaj poofi ke ƭik.»

⁷Roog a fi’a a qul ale soo a xaaj poofi ke ƭik, a qaaj alene a far took, alene a lanq. Kaaga a jegta naaga.

⁸A qul ale, Roog a ne’aan asamaan. A yenga, a feed, ta ref ñaal ƭikandeer ne.

⁹Roog a laya yee: «Fat poofi ke ndefna ɗuga asamaan fee a mbokatoor o mbiñ o leng soo beeru ke a feeñ.» Kaaga a jegta naaga.

¹⁰Beeru ke Roog a ne’aan lanq, poofi pokatooru ke ta ne a den xa maag. A ga’a itam ee tig paax oo.

¹¹Roog a laya yee: «Fat lanq ke saq a nap fo daaƭ laa saqna ax fo xa qos taxar tiirim kaa na njegkaa ax.» Kaaga a jegta naaga.

¹²Lanq ke a saxa a nap fo o xos daaƭ oluu refna fo ax um fo o xos ndaxar oluu refna fo ax um. Roog a ga’a yee paax oo.

¹³A dakooxa o yeng, a feed, ta ref ñaal ndadkandeer ne.

¹⁴Roog a layahina yee: «Fat kaa na nqoolandaa a ndef na asamaan, ndax da nqaaj ñaal ne fo o yeng ole, a ndefik itam ke na limteel camaane ke fo ñaal ke fo xa kiid axe.

¹⁵Fat a mbod na asamaan, a nqoolandaa lanq ke.» Kaaga a refta naaga.

¹⁶Roog a fi’a qoolandir ƭik maak ke, ne moƴ’ina o magin a saq ñaal ne, ne moƴ’ina o neew a saq o yeng ole. A fi’a itam xa qoor axe.

¹⁷Roog a doona a den na asamaan, ndax da nqoolandaa lanq ke,

¹⁸a saq ñaal ne fo yeng ole, a nqaaj itam a qoolaand ale fo o niɓaan ole. Roog a ga’a yee keene tig paax oo.

¹⁹A dakooxa o yeng, a feed, ta ref ñaal nahkandeer ne.

²⁰Roog a layahina yee: «Fat tikoorik a mbeeñ no poofi ke, tiiƭ a ƭisit a lanq, a yetaa ɗuga asamaan fee.»

²¹Roog a saka xa qos niŋki-naŋka maak ke fo ke na ñoowaa fop too a mbeƴaa no maag ole, a sak itam o xos ndiiƭ oluu refna. Roog a ga’a yee keene tig paax oo.

²²Roog a barke’a a den ee: «Ndimikyo, siw too mayƭandik poofi ke na xa maag axe. Fat tiiƭ ke itam a siw took lanq ke.»

²³A yenga, a feed, ta ref ñaal ƥetkandeer ne.

²⁴Cinj kaaga, Roog a laya yee: «Fat xa qos tikoorik fop a sutoor no lanq ke, muumeeniin, ƥoodiin, ƥaaɓaaniin.» Kaaga a dalfooxa jeg.

²⁵Roog a saka muumeen ke fo xa qos den, ƥood ke no lanq ke fop fo xa qos den fo ƥaaɓaan ke no lanq ke fo xa qos den. Roog a ga’a yee keene tig paax oo.

²⁶Maaga, Roog a laya yee: «Fat i sak o kiin, ta ref nitaal in, a nand fa in. Liƥ ke no maag ole, tiiƭ ke na asamaan, muumeen ke, lanq ke fop fo ƥood ke no lanq ke, fop no ɓay um a ndefkaa.»

²⁷Roog a saka o kiin ta ref nitaal um, a nand fo ten. Roog a saka o koor, a sak o tew.[3]

²⁸Roog a barke’a a den soo a lay a den ee: «Ndimikyo, mayƭand lanq ke, ke ta saqna fop a ref no ɓay nuun: Liƥ ke no maag ole, tiiƭ ke na asamaan fo muumeen ke na ñoowaa took lanq ke, fop no ɓay nuun a ndefkaa.»

²⁹Roog a layahina a den ee: «Daaƭ le fo taxar ke na ndimaa fop, cooxaanum a nuun, da ndefik ñoowir nuun.

³⁰Daaƭ luu andoona koy ee kaa xuƥaa, cooxaanum tiiƭ ke na asamaan fo muumeen ke na ñoowaa took lanq ke fop. Daaƭ leene na refkaa ñoowir den.» Kaaga a jegta naaga.

³¹Maaga, Roog a ga’a yee ke ta fi’na fop paax oo. A yenga, a feed, ta ref ñaal ɓetuu fa lengandeer ne.