Read NQAARIIT NE ROOG Mberaand 11 Bible Online

Mberaand 11 - NQAARIIT NE ROOG bible

Mberaand 11

¹We no lanq ke fop lak fa leng kut a layoogu, a njiriiñooraa xa ƭelem xa leng kut axe.

²Ye da inoorna no batand, a mbadiida na yulanq kam saax laa Sine’aar[24], soo a ngen maaga.

³A layra a ndeer den ee: «Fat i muul, soo ndox a den.» A njiriiñoora a muul ake nen a kac, soo ƭok ke nen sooñ.

⁴A layrahina yee: «Fat i max teeru, taax-took naa o jul ole a bugko duqaa asamaan fee. Maaga, xan i njeg gon, too i pasarooxkee took lanq ke fop.»

⁵O Yaal oxe a fudooxiida ndax ta ga teeru fee fo taax-took ne wiin we a maxoogna.

⁶O Yaal oxe a laya yee: «Nga’yo xeet fa leng koŋ! Kaa layaa lak fa leng kut, too keene refu ke da ngebooxna o mbi. Ndiiki koy, dara waagkatee o finq ke da mbosooxna o mbi.

⁷Fat i ndet njaxas lak fee den boo leng we nanirkatee fo lakas we.»

⁸O Yaal oxe a pasara a den maa goƭna maaga kam adna fee fop. Maaga, maq ne na teeru faa a dayu.

⁹Ten taxu ta ne’el Babel, yaam o Yaal oxe kaa jaxasrand’u[25] lak ke no wiin we fop, too no kaa xotitna maaga a sogu o pictoor took lanq ke fop.

¹⁰Keeke ndefu a kon ake na xa taan axe Seem: Seem a jeg’a xa kiid teemeed, soo a rim a Arpaksad, xa kiid xa ƭaq cinj o jaɓ o maak ole.

¹¹Cinj o rimel ole Arpaksad, Seem a ñoowa xa kiid teemeed ƥetik, a jeg’a xa ƥiy xa koor fo xa ƥiy xa tew.

¹²Arpaksad a jeg’a xa kiid qarɓeen tadik fo xa kiid xa ƥetaq, soo a rim a Seelax.

¹³Cinj o rimel ole Seelax, Arpaksad a ñoowa xa kiid teemeed nahik fo xa kiid xa tadaq, a jeg’a xa ƥiy xa koor fo xa ƥiy xa tew.

¹⁴Seelax a jeg’a xa kiid qarɓeen tadik, soo a rim a Ebeer.

¹⁵Cinj o rimel ole Ebeer, Seelax a ñoowa xa kiid teemeed nahik fo xa kiid xa tadaq, a jeg’a xa ƥiy xa koor fo xa ƥiy xa tew.

¹⁶Ebeer a jeg’a xa kiid qarɓeen tadik fo xa kiid xa nahaq, soo a rim a Peleg.

¹⁷Cinj o rimel ole Peleg, Ebeer a ñoowa xa kiid teemeed nahik fo xa kiid qarɓeen tadik, a jeg’a xa ƥiy xa koor fo xa ƥiy xa tew.

¹⁸Peleg a jeg’a xa kiid qarɓeen tadik, soo a rim a Rexu.

¹⁹Cinj o rimel ole Rexu, Peleg a ñoowa xa kiid teemeed ƭik fo xa kiid ɓetaa nahaq, a jeg’a xa ƥiy xa koor fo xa ƥiy xa tew.

²⁰Rexu a jeg’a xa kiid qarɓeen tadik fo xa kiid xa ƭaq, soo a rim a Serug.

²¹Cinj o rimel ole Serug, Rexu a ñoowa xa kiid teemeed ƭik fo xa kiid ɓetaa ƭaq, a jeg’a xa ƥiy xa koor fo xa ƥiy xa tew.

²²Serug a jeg’a xa kiid qarɓeen tadik, soo a rim a Nakoor.

²³Cinj o rimel ole Nakoor, Serug a ñoowa xa kiid teemeed ƭik, a jeg’a xa ƥiy xa koor fo xa ƥiy xa tew.

²⁴Nakoor a jeg’a xa kiid qarɓeen ƭik fo xa kiid ɓetaa nahaq, soo a rim a Teerax.

²⁵Cinj o rimel ole Teerax, Nakoor a ñoowa xa kiid teemeed fo xa kiid xarɓaxay fo xa kiid ɓetaa nahaq, a jeg’a xa ƥiy xa koor fo xa ƥiy xa tew.

²⁶Teerax a jeg’a xa kiid qarɓeen ɓetuu ƭik, soo a rim a Abram, a doon a Nakoor fa Haran.

²⁷Keeke ndefu a kon ake na xa taan axe Teerax: Teerax rimu a Abram, Nakoor fa Haran, soo Haran a rim a Lot.

²⁸Haran a xonta na kid Teerax fee faap um no saax le no Kaakalde we ta rimeena na teeru fee Uur.

²⁹Abram fa Nakoor a ngilga. O tew oxe Abram Saarayi a ne’’e, oxe Nakoor a ne’el Milka fee refna o ƥiy o ndew Haran fee rim’ina a Milka fa Yiska.

³⁰Saarayi kaa reeƭu o tew o timar, jeg’ee o ƥiy.

³¹Teerax a xota a Abram fee o ƥeem fa Lot fee o ndaan um fa Saarayi fee o seemir um refna o tew Abram. Den fop a inoora Uur fee no Kaakalde we, ndax da ndet no saax laa Kanaan. A mbadiida Xaraan, soo a ngenaa maaga.

³²Teerax a ñoowa xa kiid teemeed ƭik fo xa kiid xa ƥetaq, soo a xonit Xaraan.